Ástura dedica la so charra mensual a esplicar ‘¿Por qué ye necesaria la oficialidá del asturianu?’

Va encargase de ponela Inaciu Galán. Tamién va proyeutase’l documental ‘La vida ensin oficialidá: les consecuencies de la falta de drechos llingüísticos n’Asturies’.

Baxo’l nome de ‘¿Por qué ye necesaria la oficialidá del asturianu?’, el periodista y presidente d’Iniciativa pol Asturianu va esplicar “qu’esti reconocimientu ye la ferramienta llegal pa igualar los drechos llingüísticos de los y les asturianes, en cumplimientu del mandáu constitucional. Amás va ser una manera que mos va sirvir pa mantener vivu el patrimoniu llingüísticu d’Asturies. Y tamién porque va xenerar riqueza dinamizando la industria y la economía como asocede n’otros territorios del Estáu”, apunten dende Ástura.

Read Full Post »

García Arias va falar de la xunidá cultural de los territorios de fala asturlleonesa

‘La nuesa llingua y les tierres al sur’ ye’l nome de la conferencia mensual d’Ástura en collaboración col Atenéu Obreru de Xixón. Va encargase de ponela’l doctor en Filoloxía Románica pola Universidá d’Uviéu y primer presidente de l’ALLA, Xosé Lluis Garcia Arias.

La siempre interesante charra sobre cultura asturiana qu’Ástura entama’l tercer martes de cada mes va centrase nesta ocasión nel terrén llingüísticu y va empezar a les 20 hores. Asina, García Arias “encamentará la conveniencia de dir llogrando una conciencia cultural y llingüística nes tierres que foron pertenencia de los pueblos ástures (Asturies, Lleón, noroccidente de Zamora y Miranda de l Douro) qu’entá conserven güei, en dalguna midida, la vieya llingua romance común”, espliquen dende l’asociación cultural.

Read Full Post »

Arcu Lliterariu va dedicar la xornada a la normalización llingüística

L’actividá n’Arcu Lliterariu nun apara y esti vienres tien programaes delles actividaes que nesta xornada van tar dedicaes a la normalización llinguística. La presentación de la espublización ‘Xixón una ciudá abierta al mar’, destinada como complementu pa los escolinos y escolines que faen un percorríu mientres el cursu per Cimavilla, va abrir a les 17.30 hores la cita. Editada pola Oficina de Normalización Llingüística de Xixón, los sos autores son Mercedes Calzada, Xurde Fernández Fernández y María Ángeles García Rodríguez, que van ta presentes nel actu xunto cola conceyala Ana Montserrat López Moro y la responsable del organismu municipal, María Xosé Rodríguez.

A les 18 hores, mentes, va principiar la parte dedicada a la normalización cola intervención de Ramón d’Andrés, que va poner una conferencia sobre delles cuestiones básiques sobre’l debate llingüísticu n’Asturies. Darréu, Fernando de la Fuente, direutor d’Asturies.com, va intervenir como representante de l’Asociación Cultural Ástura nuna presentación d’actividaes xunto con Carlos Pulgar, voceru nacional de la Xunta pola Defensa de la Llingua Asturiana, y Inaciu Galán, presidente d’Iniciativa pol Asturianu.

Read Full Post »

“Ye la llexislatura con más diputaos a favor de la oficialidá, 17 de 45”

PABLO R. GUARDADO

Segunda y cabera parte de la entrevista a Inaciu Galán y González (Xixón, 1986), presidente d’Iniciativa pol Asturianu, que va viaxar esta selmana a Suiza pa intervenir na ONX.

Nestos trés años, dende que nació Iniciativa pol Asturianu, ¿la situación del idioma vivió avances o retrocesos?
La situación ye mala y va peor, no que cinca a la vitalidá de la llingua y a que les autoridaes siguen ensin garantizar la llibertá de los ciudadanos pa qu’al terminar el sistema educativu puedan escoyer qué llingua falen, porque salgan bien formaos n’asturianu y castellán, y porque esista una oficialidá que garantice’l drechu a usala en tolos ámbitos.

Por embargu, el sofitu de cada vegada más partíos de tol espectru políticu y l’enorme consensu social a favor del asturianu, más d’un 60% de partidarios de la oficialidá según les encuestes, faenmos ser positivos al respective del futuru. Tamos a tiempu de cambiar la tendencia que lleva l’asturianu hacia la desapaición en poques décades y tamos enfotaos en que vamos consiguilo.

Nel ámbitu de la reivindicación ta faciéndose cada vegada un meyor trabayu. L’importante llabor reivindicativu de la Xunta pola Defensa de la Llingua Asturiana impulsando la manifestación cada añu; el llabor sectorial de Softastur, nel campu de la informática; de Reciella, families pol asturianu, cola tresmisión del idioma a los neños; y otres organizaciones d’otru tipu como El Ronchel, Ástura, El Teixu, N’Ast, Faceira y Furmientu en Lleón, grupos de trabayu dientro de los partíos, asociaciones, llocales sociales…

Hai un movimientu plural, ampliu y que ye exemplu de convivencia. Tovía mos queda, sí me paez, un pasu más, una mayor coordinación de tol movimientu.

Read Full Post »

Academia, sindicatos y colectivos piden que nun se ceda ante ataques “minoritarios” contra la enseñanza d’asturianu

L’Academia de la Llingua, los sindicatos d’enseñanza Suatea, FETE-UXT y la federación d’enseñanza de CCOO, el Sindicatu d’Estudiantes, amás de la Federación d’Asociaciones de Padre Miguel Virgós, y otros colectivos como la Xunta pola Defensa de la Llingua, Iniciativa pol Asturianu o Ástura denunciaron esti vienres públicamente un intentu “tendenciosu, interesáu y minoritariu” de “determinaos sectores” p’acabar “coles cortes posibilidaes que tien la escolarización en Llingua Asturiana”.

Asina lo señalaron nun comunicáu conxuntu. Darréu comparecieron en rueda prensa representantes de tolos firmantes, encabezaos pola presidenta de l’Academia de la Llingua Asturiana, Ana Cano. La declaración pretende responder al intentu del Partíu Popular de que na enseñanza primaria, amás de Llingua Asturiana y Cultura asturiana, como asignatures de llibre configuración, s’ofreza una Segunda Llingua Estranxera.

Read Full Post »

La sociedá asturfalante reclama la normalización social na RTPA

La Xunta Xeneral ta tramitando la segunda llei de reforma del sector públicu, que va regular, sobre manera, la Radio Televisión del Principáu d’Asturies (RTPA), axustándola a la llei audiovisual nueva y a los criterios d’austeridá. Ye de reseñar que la llei actual señala ente los sos oxetivos la promoción de la cultura y la educación, «con especial protección del bable, mediante la promoción del so usu y espardimientu nos medios de comunicación social». Sicasí, esa especial protección nun llegó a más d’un 5% de la emisión na TPA y un 2% en RPA, mentes que na web rtpa.es l’asturianu cuasi nun existe. Por eso, a los firmantes d’esti manifiestu paez-yos “que resulta evidente que la llei tien que valir pa recoyer esplícitamente la necesidá de que la televisión y la radio autonómica xueguen un papel fundamental nel procesu de normalización social del idioma”.

Read Full Post »

“Destinar dineru al doblaxe n’asturianu nun ye un gastu; ye una inversión”, asegura Barreiro

PABLO R. GUARDADO

La situación del asturianu na RTPA y el camín qu’abre ‘El rostru impenetrable’ centraron la charra mensual de la asociación Ástura. Pa Damián Barreiro, “destinar dineru al doblaxe n’asturianu nun ye un gastu; ye una inversión”.

El periodista nacíu n’A Estrada y criáu n’Avilés, ex redautor d’Asturies.com, foi ún de los convidaos por Ástura a participar nel actu celebráu nel Atenéu Obreru de Xixón que llevaba’l nome ‘La llingua asturiana na televisón: El rostru impenetrable, un esperiencia de doblaxe pionera nel mediu’, nel que tamién tomaron parte Humberto Gonzali, encargáu de la traducción al nuesu idioma de los diálogos del filme protagonizáu y dirixíu por Marlon Brando, asina como del axuste d’éstos, y del trabayador del ente públicu de comunicación y responsable del espaciu ‘Naguando’ del RPA, Naciu Varillas. Los trés analizaron, dende la so posición, la presencia del asturianu na RTPA y dieron la so opinión sobre los rexistros nos qu’ha d’utilizase na programación.

Read Full Post »

La llingua asturiana na televisón: El rostru impenetrable, un esperiencia de doblaxe pionera nel mediu

El martes 21 de xineru a les 19:30, Ástura organiza una charra nel Atenéu Obreru de Xixón (C/Covadonga) sobre llingua asturiana na televisión, que tendrá como base la emisión reciente na TPA del llargumetraxe dobláu al asturianu El rostru impenetrable. Intervienen nel actu:

• Naciu Varrillas, periodista y escritor, trabayador de la Radio del Principáu d’Asturies.
• Damián Barreiro, periodista, autor del ensayu “L’espeyu onde miranos: televisiones de proximidá n’europa Occidental y procesos de recuperación identitaria”.
• Humberto Gonzali, escritor y xestor cultural, traductor/axustador del doblaxe “El rostru impenetrable”.

La entrada ye llibre.

(d’Ástura, 15-01-2014)

Read Full Post »

Software llibre y llingua asturiana

El martes 19 de payares a les 19:00, Ástura y Softastur organicen una charra nel Atenéu Obreru de Xixón (C/Covadonga) sobre Software llibre y llingua asturiana. Nella, va facese presentación la última versión d’Ubuntu. Ubuntu ye un Sistema Operativu pa PC’s que ta disponible al 100% en llingua asturiana, potente, seguru, llibre de virus y de fácil usu, y que inclúi la suite Ofimática Libreoffice (procesador de testos, fueya de cálculu, presentación de diapositives).

Softastur falará de la importancia del usu d’estes ferramientes pa la llingua asturiana, y fadrá un repasu de los programes disponibles nella: xestor de corréu, navegadores web, correutor ortográficu y delles aplicaciones más.

(d’Ástura, 15-11-2013)

Read Full Post »

Día de les Lletres Asturianes

Ástura ye una asociación nueva nel tiempu que naz pa trabayar pola llingua, la cultura asturiana y el país a la so manera, ensin interferir con otres asociaciones, sinón más bien en collaboración y bona sintonía. Los sos fines tan bien ñidios: afalar a la sociedá civil asturiana –y a tolos falantes del dominiu llingüísticu astur– al usu cotidianu y natural de la nuestra llingua en tou tipu de rellaciones, circunstancies y ámbitos d’actuación, privaos, profesionales, etc. Tamién, afitar un llugar central, una casa común, onde converxan informaciones, iniciatives, esmoliciones, etc., dende onde puedan promovese y apareyase campañes y aiciones empobinaes a la promoción y espardimientu de la llingua asturiana por entemedies d’afayadices estayes de trabayu, y, por último, acoyer y sopelexar trabayos d’investigación, propuestes d’actuación, denuncies, alderiques, etc., tolo que sía cultura viva asturiana, incluyendo, dende llueu, materies consideraes como científiques o téuniques.

Read Full Post »