Percorríu poles lletres asturianes n’ochobre con Asturies, Cultura en Rede

El programa Asturies, Cultura en Rede ufierta un percorríu poles lletres asturianes con un ampliu programa d’actividaes de los circuitos de lliteratura y Autores nel Camín pal mes d’ochobre. Asturies, Cultura en Rede ye un proyectu de la Conseyería de Cultura, Política Llingüística y Turismu, realizáu en collaboración colos conceyos asturianos y xestionáu pola Sociedá Pública de Xestión y Promoción Turística y Cultural del Principáu d’Asturies, que tamién incluye circuitos temáticos d’artes escéniques, Xacobéu, artes visuales, música y cultura tradicional por distintos conceyos del Principáu.

17 actividaes en 13 conceyos conformen la programación del circuitu de lliteratura pal mes viniente. Tras la Puerta Títeres va llevar Cuentos de casa a Castrillón, Gozón y Noreña; El Arca de Mozart, Operación Zanahorias, a Mieres, y ¿A qué suenan los libros? a Cuaña; Carlos Alba Cellero, La Caja Mágica, a Ribeseya; Elisabet Martín Teatro, Descubriendo a Gloria Fuertes, a La Ribera; y Producciones Viesqueswood, Asturias: voces femeninas de nuestra historia, a Tinéu. Va haber un alcuentru lliterariu con Xaime Martínez en Llangréu y va esponese en Gozón el poemariu ilustráu Una mitología. Seres y mitos del norte con alcuentru colos sos autores, Aurelio González Ovies y Toño Velasco, incluyíu. Storytellers va actuar en Cangas; El Velcro, en Llangréu; y Puppys, en Cuaña y Llaviana. Tamién van realizase los talleres Palabras como llaves, de Musa Cafeína, en Grau y La Ribera, y El sombrero que voló ¡Ilústralo tú! con Pintar-Pintar Editorial en Villaviciosa.

Read Full Post »

Piloña acueye los II Alcuentros de Músiques Feches n’Asturies

Esta selmana Valles, nel conceyu de Piloña, sedrá ún de los puntos clave nel panorama musical asturianu, col desendolcu de los II Alcuentros de Músiques Feches n’Asturies. Estes xornaes, entamaes pola Asociación Músico Cultural Bocanegra, tendrán escomienzu’l xueves, cola actuación del grupu folk Bon Tastu en primer términu, y posteriormente los perconocíos Asturiana Mining Company. El vienres sedrá turnu de Xera, qu’amosará la so interesante propuesta, onde s’amesta folk con estayes como la lletrónica.

Read Full Post »

Taranus va representar a Asturies nel Liet International de Còrsica

El cantar ‘Ensin ti’, de Taranus, resultó ganador del VII Premiu al Meyor Cantar que se celebró’l viernes nel Teatru de la Llaboral ente glayíos d’oficialidá. La banda de folk-metal va representar a Asturies nel Liet International de Còrsica.

El xuráu encargáu de decidir cuál yera’l meyor cantar n’asturianu del 2012 ente los cinco finalistes decidióse pol presentáu por Taranus, ‘Ensin ti’, una balada con lletra de Diego Díaz Martino nel que destaca la voz de la sopranu Susana Mortem y que’l grupu va interpretar na seronda en Còrsica en representación d’Asturies y de la llingua asturiana. D’esta forma, Taranus alcuentra recompensa a munchos años de trabayu y esfuerciu que culminaron na espublización del so primer discu, ‘Taranus’, el pasáu mes d’avientu gracies a l’aportación de fondos propios, ensin solicitar subvención a Cultura.

Read Full Post »

Cinco grupos finalistes compiten na gala del VII Premiu al Meyor Cantar, que celebrarase nel teatru de la Llaboral

El próximu vienres día 1 de marzu tendrá llugar la Gala d’entrega del VII Premiu al Meyor Cantar. L’escenariu sedrá’l Teatru de la Llaboral, en Xixón. L’actu entamará a les 20:30 hores y la entrada será llibre. Amás, será posible siguilu pela TPA.

El 19 de xineru cerró’l plazu pa que los interpretes o grupos interesaos solicitaren la so participación nesta sétima edición del premiu. Un xuráu formáu por espertos en música y llingua asturiana escoyó d’ente los presentaos a los cinco finalistes, qu’actuarán en directo na Gala d’Entrega del Premiu’l 1 de marzu.

Read Full Post »

L’Anuariu de la Música Asturiana 2012 recupera’l CD recopilatoriu y presenta un diseñu renováu dafechu

PABLO R. GUARDADO

Fiel a la so cita dende l’añu 2000, l’Anuariu de la Música Asturiana yá ta disponible nos puntos de venta habituales de la mano de Goxe Producciones. Esti númberu presenta un diseñu renováu dafechu y recupera’l CD que solía incorporar.

La edición del 2012, que dedica a Dixebra la portada por mor del so 25 aniversariu, presenta 94 páxines con una variedá grande de conteníos. Nel ‘Entamu’, los responsables de la espublización manifiesten el so enfotu de volver al orixe d’ella y recuperar los oxetivos colos que nació, amás d’afirmar que siguen “creyendo firmemente na necesidá d’un proyectu como ésti, no imprescindible de que la música del país tenga un órganu d’espresión, un escaparate onde amosar los sos llogros y esmoliciones, que dea una visión de conxuntu, que la refuerce interna y esternamente”. Darréu, los llectores van atopar entrevistes a la banda astur-chilena de folk Ta Fechu y a La Tarrancha, asina como al músicu Pablo Canalís, amás de reportaxes fotográficos del conciertu conmemorativu del venticinco aniversariu de Dixebra y de la sesta edición del Premiu al Meyor Cantar n’Asturianu, un informe sobre la baxada de conciertos y la so repercusión ente los grupos del país, comentarios sobre los discos nuevos de Mariluz Cristóbal Caunedo, Toli Morilla o Soncai System, y un diariu sobre’l procesu de creación, grabación y presentación del trabayu ‘Llume’ de Xera.

Read Full Post »

L’Asturiana gana’l Premiu del Públicu nun Liet marcáu pola reivindicación de la oficialidá

DAMIÁN BARREIRO

La cantante bretona Lleuwen Steffan -orixinaria de Gales- ganó la final del Liet International 2012 col tema tituláu «Ar gouloù bev» («La lluz viva»), nuna gala qu’axuntó a numberosu públicu nel Teatru de Llaboral Ciudá de la Cultura, en Xixón. Amás, Asturiana Mining Company fíxose col Premiu del Públicu nun actu marcáu pola reivindicación de la oficialidá. Asina, los glayíos a coru de «L’asturianu llingua oficial» y unes lletrones que formaben la frase n’inglés «S.O.S. Asturian Language» tuvieron presentes nel eventu al qu’acudió la conseyera d’Educación, Cultura y Deporte, Ana González, y de la directora xeneral de Política Llingüística, Ana Fueyo.

La gran trunfadora de la nueche, Lleuwen, llevó pela primer vez el premiu del xuráu del Liet pa Bretaña. Trátase d’una cantante nacida y criada nel norte de Gales, pero que vive normalmente en Bretaña, onde aprendió a falar y cantar en bretón. Por eso, tien una perbona reputación tanto en Bretaña como en Gales y viaxa davezu ente les dos naciones celtes. Musicalmente, ye complicao etiquetar a Lleuwen y, anque tienen dicho d’ella que tien aires de jazz, a esta cantautora tamién-y presta’l rhythm and blues y el rock.

Read Full Post »

«Préstame ser un americanu que representa a la llingua asturiana»

DAMIÁN BARREIRO . UVIÉU – 01/12/2012 A LES 07:46:36

Michael Lee Wolfe fundó Asturiana Mining Company nel añu 1998 con músicos mui conocíos de la escena folk, rock y jazz n’Asturies. La formación graba nel añu 2000 el primer discu, col títulu de Patrimoniu. A últimos del 2011, Asturiana Mining Company edita otru discu: Sones por Berto Velasco, un trabayu onde destaquen la voz y la gaita del maestru Alberto Varillas, los arreglos vocales de Silvia Fernández y l’acordión zydeco de María Álvarez. Depués de 14 años dende la so creación, l’Asturiana Mining Company esperimentó dellos cambios y promete un directu con dalgunos de los cantares más aclamaos de la música folk asturiana xunto a otros de creación nueva pero de sabor tradicional, como ye’l casu de «Si nun conoces Val.louta», el tema col que ganaron el Premiu al Meyor Cantar y col que van representar a Asturies nel festival Liet International 2012.

¿Cómo encara la participación nel Liet?
Anque llevo munchos años dientro del mundu de la música asturiana, faime muncha ilusión ser un americanu que va a representar col so grupu a la llingua asturiana. Amás, nun concursu de llingües minoritaries a nivel européu onde la música ye cuasi lo de menos, lo importante ye l’idioma. Presta muncho. Nervios nun me parez qu’haya, lo qu’hai son munches ganes.

Read Full Post »

«Cinco televisiones rexonales europees van tar presentes nel Liet International 2012»

DAMIÁN BARREIRO

El Teatru de la Llaboral de Xixón va acoyer el sábadu 1 d’avientu, a partir de les 21.30 hores, la celebración del festival Liet International 2012, nel que participen once grupos que canten nuna llingua minoritaria europea. Con diez años de trayectoria y depués de cinco de participación d’Asturies, ye la primer vez qu’esti festival se celebra na Península Ibérica. Por eso, falamos con Ana Fueyo, directora xeneral de Política Llingüística, p’analizar lo que va suponer esti eventu pal nuestru país y cómo ye’l trabayu que se ta faciendo dende’l Gobiernu d’Asturies pa entamar esta edición del que ye conocíu como l’Eurovisión de les lingües minoritaries.

¿Qué supón p’Asturies y pa la so llingua acoyer la celebración del Liet International?
Pa la llingua asturiana nun dexa de ser una reconocencia grande dientro de la Fundación Liet, que ye una entidá qu’axunta idiomes minoritarios de toa Europa. Otra manera, qu’Asturies, col sofitu del Gobiernu autonómicu, sía la comunidá qu’entama’l festival -amás de ser la primera de la Península Ibérica-, supón da-y una relevancia al Festival Liet como eventu cultural y musical, pero tamién como actu que tien que ver col fomentu y la normalización de la nuestra llingua. Amás, p’Asturies tamién supón una plataforma turística bien importante.

Read Full Post »

El Liet va celebrase l’ún d’avientu na Llaboral

Esti añu 2012, la Dirección Xeneral de Política Llingüística ye la encargada d’entamar el festival Liet International, polo que la edición del 2012 va celebrase’l 1 d’avientu en Llaboral Ciudá de la Cultura, en Xixón. La gala va empezar a les 21.30 hores, pero pa favorecer el desenvolvimientu del espectáculu, nun se va permitir la entrada de públicu a partir de les 21.15 hores. Amás, va retresmitise en directu per televisión y Internet al traviés de TPA. Depués de les ediciones celebraes en Frisia, la zona del territoriu Sami asitiada en Suecia, Bretaña y Friul, esta ye la primer vez que Liet International se va desendolcar na Península Ibérica.

El comité de selección de la Fundación Liet International y los sos socios, compuestu por espertos en música de Frisia, Asturies y Córcega, foi l’encargáu de facer la escoyeta pa esta novena edición del festival de la canción en llingües minoritares europees. Ente 35 candidatos de 18 minoríes llingüístiques diferentes de toles esquines d’Europa, el comité escoyó los cantares de les cinco bandes o solistes siguientes: Brian Ó hEadhra con «Fathainn», en gaélico-escocés; Enkore con «Muxurik muxu», en vascu; Ivan Belosludtsev & 4 Cheber Pios con «Tau Tynyd», n’udmurtiu (Federación Rusa); Lleuwen con «Ar Gouloù Bev», bretón (Francia); y The Voodoolectric con «Slickermuul», en baxu saxón (Alemaña).

Read Full Post »

Wolfe: “El Liet representa una oportunidá pa la mio banda, la música y la llingua asturiana”

PABLO R. GUARDADO

Asturiana Mining Company convirtióse na sesta formación en ganar el Premio al Meyor Cantar gracies a la vaqueirada ‘Si nun conoces Vaḷḷouta’’. Michael Lee Wolfe (Pittsburgh, 1962) ye’l fundador d’esti grupu folk asturianu.

‘Si nun conoces Vaḷḷouta’…
“Si nun conoces Vaḷḷouta nun digas conocer´l mundu”, una frase netamente asturiana por actitú y conteníu. Ye una lletra que nos quedó perguapa. Como diz la cancion, Vaḷḷouta ta “… a la vera’l Carrielḷḷu onde los clavos de Cristu / saliéronse del maderu…”.

Read Full Post »