Verbéu espubliza’l primer númberu de Brandal, la revista de traducción n’asturianu

Verbéu, l’asociación de traductores profesionales n’asturianu, espublizó al aniciu del mes d’avientu la revista Brandal, la revista de traducción en llingua asturiana. La so presentación fízose nel  I Congresu de Traducción Audiovisual n’Asturianu, celebráu en L.luarca mientres el 10 y 11 del mes citáu.

A lo llargo de la revista podemos alcontrar la presentación d’esta y los sos oxetivos, acompañaos de dellos ensayos al rodiu de la traducción de personaes como Aymara González, Iria Taibo, presidenta d’AGTPI, o la empresa Aitrad, amás d’una entrevista a Eloy Antuña, traductor de  la novela ‘Kim’ de Rudyard Kipling, que ye’l séptimu títulu de la colección Calume d’Ediciones Trabe.

ANEXU: Brandal, 1.

(de Formientu, 29-12-2022)

Read Full Post »

L’alcuentru que va inaugurar La Casina de la Traducción va celebrase del 17 al 19 d’avientu

Rafael Rodríguez Valdés va coordinar un alcuentru sobre la torna lliteraria al asturianu del 17 al 19 d’avientu en La Casina de la Traducción, eventu que va inaugurar esta iniciativa que tien la casa natal del Padre Galo como sede. Nestes xornaes van participar persones actives nesti campu pa esplorar les sos llinies de futuru.

Anunciáu en xunu como Xornaes de la Traducción al Asturianu, tien confirmada l’asistencia de Cristina Valdés, Marta Mori, Aida Celamín, Aymara González, Víctor Suárez, Miguel Sánchez, Xesús González, Daniel Melendi, Eloy Antuña y Ramón d’Andrés, ente otros. Un amiestu de mocedá y veteranía pa entamar un alderique sobre la traducción a distintes llingües y xéneros lliterarios y encarar les necesidaes que traviesa’l sector na actualidá.

Read Full Post »