PABLO ANTÓN MARÍN ESTRADA
El pasáu 23 de mayu cumplíense los venticinco años de la muerte d’una escritora esencial de la lliteratura moderna en llingua asturiana, la xixonesa María Teresa González. Autora d’una obra poética d’una singular intensidá espresiva y emocional, foi una de les primeres voces de muyer na xeneración del Surdimientu y tamién de les que más ceo empobinaron nel cultivu de la narrativa. Güei, sigue siendo una poeta viva a la que vuelven con gustu llectores y autores de toles andanaes xeneracionales, mesmo los que nin siquier nacieran de la que fueran escritos los sos testos. En 2008, la Conseyería de Cultura del Principaú dedicaba-y a la so figura la 29 Selmana de les Lletres y la so obra volvía a acoyer un nuevu interés. Agora, un cuartu de sieglu después de que nos dexara, la so familia remémbrala con una páxina web na que se puede acceder a la integridá del so llabor lliterariu n’asturianu, amás d’ufrir la so biografía, bibliografía y una completa amuesa de trabayos críticos alrodiu d’ella. Un homenaxe que val non namás pa da-y alcordanza sinón sobre too pa lleela con anováu interés.
Nacida en somantu d’una familia trabayadora nel barriu de Tremañes en 1950, cursó les sos primeres lletres nel colexu Les Maravilles y con 17 años entro a trabayar na empresa AEA Crady, na que diba tocá-y vivir y participar activamente nos conflictos llaborales que finaron col pieslle de la factoría. El desempléu encarrilóla a facese auxiliar de clínica, una profesión qu’había desempeñar hasta el so pasamentu en 1995. Casada col tamièn escritor Vicente García Oliva, tuvo al so llau una fonda implicación nel desenvolvimientu del asturianismu cultural al traviés de l’asociación Conceyu Bable. Los sos primeros poemes daten de 1984, pero diba ser tres años después cuando publique el so primer llibru: ‘Collaciu de la nueche’. En 1988 va dar a estampa un nuevu poemariu: ‘Ochobre’ y en 1993 asoleya ‘Heliocentru’, la so última entrega poética, a la que diba siguir un añu más tarde el volume de narrativa ‘La casa y otros cuentos’.
