Más cultura asturiana na RTPA

Col títulu de ‘Por una RTPA al serviciu de la cultura asturiana’ 118 persones del campu cultural y musical roblen un escritu nel que reclamen “apostar por dignificar la presencia de conteníos culturales y musicales del país (mui especialmente n’asturianu y gallego-asturianu) na programación, con un tratamientu dignu, global y permanente nella”. La fundación nel añu 2005 de Radiotelevisión del Principáu d’Asturies (RTPA) enllenó d’esperances a los y les trabayadores/ dinamizadores/creadores culturales y musicales asturianos/es. Rixida nos primeros años pola Llei 2/2003, nel so preambulu falaba de potenciar las peculiaridades y el afianzamiento de la identidad asturiana, a través de la difusión, conocimiento y desarrollo de los valores históricos y culturales en toda su variedad y riqueza recuerden los firmantes del manifiestu. “La puesta en marcha efectiva del serviciu de televisión (TPA) fixo qu’aquelles esperances primerices s’esvanecieren en viendo’l modelu pel qu’empobinó la so programación; el fracasu social y económicu al que llevó obligó a un cambiu de rumbu radical que se caltuvo nel tiempu, con una visión de lo asturiano mui restrictiva y simplista” señalen. Tamién consideren que “los primeros pasos del serviciu radiofónicu (RPA) paecíen ufiertar bonos augurios, asina la so parrilla enllenóse de programes y espacios en llingua asturiana colos más variaos conteníos y atentos al fechu cultural y musical del país, pero namás foi un espeyismu nel tiempu y darréu foron desapaeciendo dafechu de les so emisiones”.

Read Full Post »

“El discu va contar con 14 pieces, de les que 4 son cantaes”, confirma Mielgo sobre l’esperáu trabayu de Llan de Cubel

PABLO R. GUARDADO

“Va salir esti añu”, asegura’l percusionista Fonsu Mielgo en referencia al que va ser el sestu de discu de Llan de Cubel, que “va contar con 14 pieces, de les que 4 son cantaes”. El grupu folk actúa’l sábadu nel Intercélticu d’Avilés, que dedica’l vienres al folk-rock.

Ensin plazos definitivos entovía al tar ultimando los detalles últimos, como la discográfica o les plataformes nes que se va llanzar, l’esperáu discu de Llan de Cubel yá ta grabáu y ta a piques de ser una realidá. Detrés queden venti años de llabor, “yá que empezamos a trabayar temes del mesmu enantes d’asoleyar el discu anterior”, ‘Un tiempu meyor’, editáu por Fonoastur nel 1999.

Read Full Post »

L’Anuariu la Música Asturiana repasa dafechu’l 2014

Un añu más l’Anuariu de la Música Asturiana, publicáu por Goxe Producciones, fai alcordanza de l’actividá producida nel últimu añu dientro del campu de la música d’espresión asturiana: la tradicional, aquella que la reellabora (folk y demás derivaos) y la qu’utiliza l’asturianu independientemente del estilu. Son yá dieciséis los años nos qu’esta publicación, siempre per estes feches, ve la lluz y trata fondamente temes y cuestiones rellacionaos cola nuestra música.

L’Entamu d’esti númberu, tituláu «La voluntá de ser y siguir de la música asturiana», firmáu pol so director, Xune Elipe, fala de la trayectoria de la publicación y comenta: «Echando una güeyada a los anteriores númberos vemos cómo, por desgracia, poco de lo que se propón nellos se fixo realidá, sobre too no que se refier al deséu d’una verdadera política musical por parte del Gobiernu d’Asturies, que sigue ensin da-y l’atención afechisca a esti sector, con acciones insuficientes, tímides y ensin continuidá, sacante dalguna escepción honrosa, como la creación del Premiu al Meyor Cantar.

Read Full Post »

L´asturianada ensin repolitar presta más

AURELIO ARGEL

El año recién termináu remató entregando trabayos variaos cola asturianada como protagonista. Delles voces d’esta asturianada apurrieron discos curiosos con tratamientu, acompañamientu, producción y presentación estremáes que son exemplu de pluralidá y riqueza pero tamién de cómo entender, sentir y tratar -o saber tratar – el xéneru más representativu de la música d’esti país. Títulos y pieces perclásiques, arranxos sobre la tradición, igües curiosines y hasta temes novalinos apaecen con pesu en «Poema sinfónico» de la Banda Gaites «Noega», grabación conxunta con otros artistes y tamién, d’otros modos, a manera de cantares populares reibilicoquiaos con otros sones, alcuéntrense nel discu de Fernando Valle Roso «Camín d’ayures» (EveryGoodSong) que llevó’l premiu a «Meyor discu del añu» pa la Crítica de la RPA. D’igual manera les grabaciones cencielles pero necesaries qu’entrega añu ente añu la Fonográfica Asturiana contaron con «Recordando mi niñez», de la veterana María Teresa González Soto, acompañada a la gaita por unu de los grandes del xéneru, Óscar Fernández, y que ya recibi’l premiu de la Crítica de RPA a «Meyor discu del añu» na estaya de canción asturiana. Pero sobremanera, hai tres títulos de rescample pa señalar: «Aire», «Cancios y asturianáes» y «Cola lluz de l’alborada.

Read Full Post »

«Fáltanos muncho pa da-y un matiz de normalidá a la música tradicional»

MIGUEL RODRÍGUEZ MONTEAVARO

La pandereta ta viva na música contemporánea asturiana y esto nótase nel resurdir d’esti instrumentu nestos últimos años. Les Pandereteres de Fitoria acaben de publicar un discu (Algamar, 2012), que lleva’l nome de la formación, onde xunten les melodíes tradicionales colos arranchos nuevos del folk del sieglu XXI. El primer trabayu del grupu va presentase’l 11 de febreru nel Auditoriu de La Pola Siero. Falamos con Tina Cuadriello, productora musical del conxuntu, con bien d’esperiencia nel mundu del folk asturianu (Balandrán, Batulaxe, La Martaleña).

Lo primero: preséntenos el grupu y descríbanos la so función dientro d’él.
El grupu ta formáu por seis muyeres (Guadalupe Villanueva, Lorena Álvarez, Verónica González, Silvia Rodríguez, Yolanda Díaz y Laura Ruiz), que canten canciones tradicionales y que s’acompañen de la pandereta cuando ye necesario. Elles vienen toes del mundu de los grupos de baille tradicional, que ye onde s’apriende a tocar la pandereta. Amás foron a clas con Fernando de la Puente Hevia y con Eva Tejedor, y depués de dellos cambios decidieron quedar como grupu estes seis. Más tarde contactaron comigo pa que les ayudara colos arreglos vocales (anque elles yá cantaben a dos voces de forma espontánea) y pa que les asesorara musicalmente en xeneral. Soi la moza pa too, con esto de nun xubir al escenariu…

Read Full Post »