Más cultura asturiana na RTPA

Col títulu de ‘Por una RTPA al serviciu de la cultura asturiana’ 118 persones del campu cultural y musical roblen un escritu nel que reclamen “apostar por dignificar la presencia de conteníos culturales y musicales del país (mui especialmente n’asturianu y gallego-asturianu) na programación, con un tratamientu dignu, global y permanente nella”. La fundación nel añu 2005 de Radiotelevisión del Principáu d’Asturies (RTPA) enllenó d’esperances a los y les trabayadores/ dinamizadores/creadores culturales y musicales asturianos/es. Rixida nos primeros años pola Llei 2/2003, nel so preambulu falaba de potenciar las peculiaridades y el afianzamiento de la identidad asturiana, a través de la difusión, conocimiento y desarrollo de los valores históricos y culturales en toda su variedad y riqueza recuerden los firmantes del manifiestu. “La puesta en marcha efectiva del serviciu de televisión (TPA) fixo qu’aquelles esperances primerices s’esvanecieren en viendo’l modelu pel qu’empobinó la so programación; el fracasu social y económicu al que llevó obligó a un cambiu de rumbu radical que se caltuvo nel tiempu, con una visión de lo asturiano mui restrictiva y simplista” señalen. Tamién consideren que “los primeros pasos del serviciu radiofónicu (RPA) paecíen ufiertar bonos augurios, asina la so parrilla enllenóse de programes y espacios en llingua asturiana colos más variaos conteníos y atentos al fechu cultural y musical del país, pero namás foi un espeyismu nel tiempu y darréu foron desapaeciendo dafechu de les so emisiones”.

Read Full Post »

Selmana de les Lletres Asturianes en Villaviciosa

La selmana de les lletres asturianes va cellebrase esti añu de manera especial nel conceyu de Villaviciosa con una serie d’actos rellacionaos cola nuestra llingua y lliteratura. La programación entama esti xueves, 28 d’abril a les 20:00 na Casa Los Hevia, cola presentación del númberu 19 de la revista Cultures, revista de cultura asturiana centrada na antropoloxía y la etnógrafía qu’edita l’academia de la llingua asturiana. Nel actu contaráse cola presencia del director de la revista, Roberto González-Quevedo, que va tar acompañáu de Xuan Pedrayes Obaya y Carme Pedrayes Toyos, autores de sendos artículos incluyíos na revista dedicaos al conceyu maliayu.

Otramiente, el vienres 6 de mayu, día de les lletres asturianes, procederáse en collaboración cola asociación La Compaña del Ronchel al tradicional repartu de lletres de pan per centros escolares y establecimientos del conceyu.

Read Full Post »