La traducción de la Biblia al asturianu tará disponible en marzu nes llibreríes

La Biblia, “llibru clave de la cultura occidental”, tien por fin traducción al asturianu gracies al llabor d’una trentena de persones que s’involucraron nesti proyeutu impulsáu pol recordáu Federico González-Fierro Botas hai más de 30 años. José Luis Andavert, de la Sociedad Bíblica, nun quixo que los testos, agora na encuadernadora tres pasar pela imprenta, quedaran nun caxón y, xunto con Ramón d’Andrés, dio-y un emburrión a los trabayos estos años últimos pa facer posible esti fitu históricu pal idioma.

“Federico púnxose en contautu conmigo nel 1989. Entantes lo fixera cola Sociedá Biblica Americana, de Nueva York, y quedamos en venos”, recuerda Andavert, naquel entós director de la Sociedad Biblíca n’España. D’esi alcuentru salió una amistá grande y sincera y ún de los proyeutos más importantes de los entamaos en llingua asturiana.

Read Full Post »

El VIII Certame de Poesía Nené Losada Rico, pa Pablo Rodríguez Medina y Ricardo Candás

PABLO R. GUARDADO

Pablo Rodríguez Medina y Ricardo Candás foron los ganadores, ex aequo, del VIII Certame de Poesía Nené Losada Rico. El xuráu escoyó por unanimidá los sos trabayos ‘Mitoloxíes íntimes’ y ‘Naufraxos’ como los meyores.

Ésti tuvo conformáu por Antón García, José Luis Rendueles y Xuan Santori. “Les obres ganadores son intenses y estremaes. Entrambos autores apurren una visión densa y personal del fondu sentimental comúnmente compartíu. Los dos poemarios utilicen una carga metafórica destilada, partiendo dende posiciones poétiques mui distintes, pa lo que remanen un material lliterariu firme que fuxe de la fraxilidá cotidiana”, resalta l’acta del xuráu, que tuvo qu’escoyer ente ocho obres procedentes d’Arnáu (Castrillón), Avilés, Ciudad Real, L’Entregu, Xixón, Uviéu, La Pola Siero y Quart de Poblet (València).

Read Full Post »

Entamen un concursu de monologuistes asturianos en Les Vegues

L’Ayuntamientu de Corvera abrió yá’l plazu pa presentase al primer concursu y amuesa de monologuistes asturianos “Meyor solo…”, organizáu pola Casa de la Llingua col sofitu del Gobiernu d’Asturies y Caxastur.

Read Full Post »

El mierense José Juan González García gana’l VII Concursu de cómic n’asturianu Comarca de la Sidra

D. BARREIRO

La obra “Nel día de la victoria” del autor mierense José Juan González ye la ganadora del VII Concursu de Cómic n’asturianu Comarca de la Sidra. Nella, nárrase una escura historia ambientada nun Nueva York en ruines. L’autor, que lleva un premiu de 500 euros, ye un dibuxante autodidacta con un estilu mui personal que yá foi reconocíu con dellos premios.

Del mesmu mou, el xuráu concedió dos accésit de 200 euros caún a la futurista “Creación 3.0”, d’Enrique Carballeira y “Fuñería” del xixonés Diego Bernardo Álvarez, una obra d’ambiente mitolóxicu.

Read Full Post »

La Casa Cultura de Llanes entama’l tercer taller de ‘xíriga’, la fala de los teyeros llaniscos

La Casa Municipal de Cultura acueye’l próximu 2 de febreru’l tercer taller de ‘xíriga’, la fala de los teyeros llaniscos. La iniciativa, que yá se punxere en marcha per primer vez nel 2007, forma parte del programa ‘Cursos municipales 2009’ convocaos pol Ayuntamientu de Llanes en collaboración cola Obra Social y Cultural de Caxastur.

El cursu d’ocho hores de duración, tien un carácter d’espardimientu, con partes teóriques y práutiques, indicó l’Ayuntamientu en nota prensa. Va desarrollase demientres los cuatro llunes del mes de febreru, n’horariu de 19.00 a 21.00 hores y la tasa a abonar por cada alumnu ye de diez euros.

Tomen parte nesta actividá dellos antiguos teyeros o tamargos que dan testimoniu en cada sesión de la so esperiencia personal nesti oficiu. El taller inclúi tamién comentariu de testos, dictaos, redaiciones y tornes.

Read Full Post »