Noreña aprueba la ordenanza d’asturianu definitiva, “que garantiza los derechos de los asturfalantes”

PABLO R. GUARDADO

Independientes por Noreña (IPÑ) y Foro sofitaron la ‘Ordenanza Municipal pal Usu de la Llingua Asturiana nel Conceyu de Noreña’ definitiva, presentada por Conceyu Abiertu por Noreña, “que garantiza los derechos de los asturfalantes”, apunta l’edil Pablo Pérez. IX astúvose, mentes que’l PSOE y el PP votaron en contra.

A pesar de que l’informe de Secretaría solicitáu por PP, PSOE y IX afitaba que’l Conceyu nun tenía competencia p’aprobar la ordenanza, l’equipu de gobiernu municipal nun s’echó atrás y finalmente la ciudadanía de Noreña va tener aseguráu’l so derechu a comunicase cola alministración na so llingua materna. La Llei d’Usu y Promoción del Bable/Asturianu y la garantía de la Direición Xeneral de Planificación Llingüística y Normalización de la so llegalidá llevó a IPÑ y a Foro a sofitar una normativa que venía apoyando dende que Conceyu Abiertu por Noreña presentara la posibilidá de desendolcala.

Read Full Post »

Noreña estrena indicadores en llingua asturiana nel ayuntamientu

PABLO R. GUARDADO

El Conceyu de Noreña ta d’estrena. Les dependencies municipales yá llucen cartelos n’asturianu que señalicen los distintos llugares del mesmu. Conceyu Abiertu por Noreña tien presentao una propuesta pa unes ordenances d’usu del idioma.

Asina, según les semeyes que colgó l’edil Inaciu Iglesias na rede social Facebook, les conceyalíes, les sales, el Rexistru y la secretaría o los baños tán señalizaos yá n’asturianu. “Coses pequeñes que cuesten bien poco y presten abondo”, apuntó’l conceyal de Foro satisfechu por esta iniciativa.

Read Full Post »

Asturies respuende al llamamientu de Bimenes pa sofitar la oficialidá

PABLO R. GUARDADO

Más d’una ventena d’organizaciones y partíos políticos participaron nel conceyu convocaú pol alcalde, Aitor García Corte, pa presentar el so proyeutu y pidir collaboración de la sociedá asturiana. “Quedé mui contentu”, afirmó’l primer edil.

Na reunión celebrada’l vienres na Casa Conceyu hebo representación de los trés partíos con representación na Xunta Xeneral que lleven la oficialidá nel so programa, Podemos, Izquierda Xunida (IX) y Foro, amás d’Andecha Astur y Conceyu Abiertu por Noreña. Tamién d’organizaciones de toda triba, dende coleutivos de defensa del idioma a culturales, pasando por centros sociales.

Read Full Post »

Decenes de conceyales usen l’asturianu na toma de posesión

IxA informa de que conceyales de más de 20 conceyos ficieron la promesa o xuramentu n’asturianu. En Xixón hasta 7 conceyales de Xixón sí Puede, IX y Foro usaron esta fórmula

No que cinca a los conceyos de les grandes ciudaes del centru d’Asturies, hebo representantes que xuraron o prometieron n’asturianu en Xixón, Avilés y Uviéu, con conceyales del PSOE, Foro, Izquierda Xunida y les formaciones venceyaes a Podemos. Amás, xuraron cargu n’asturianu o gallego-asturiano en Villaviciosa, Carreño, Llanera, Siero, Noreña, Mieres, Llangréu, Llaviana, Ribeseya, Cangues d’Onís, Peñamellera Alta, L.lena, Uviéu, La Ribera, Sobrescobiu, Pravia, Bimenes ya Ibias.

Read Full Post »

PSOE y PP nun quieren ordenances municipales d’usu del asturianu en Noreña

RADIO NOREÑA

PSOE y PP votaron en contra de tratar una moción d’urxencia de Conceyu Abiertu por Noreña p’aprobar unes ordenances d’usu del asturianu nel conceyu. InfoNoreña ofrez l’audiu completu del so tratamientu.

Conceyu Abiertu por Noreña presentó una moción d’urxencia nel Plenu Municipal del 27 de febreru pa que se trataren unes ordenances municipales sobre l’usu d e la llingua asturiana nel Conceyu, depués de que se dieren nuevos casos de represión llingüísitca. Nun se llegó a tratar la ordenanza al votar en contra d’ello PSOE y PP (6). El PP representaba’l francimientu del pactu que teníen los grupos de la oposición pa “salvar el bloquéu” a les sos iniciatives por parte del gobiernu y se pudieren tratar en plenu per esta vía. A favor votaron IPÑ, FDLI, FAC y CA NOREÑA(6), mientres qu’IDEAS (1) abstúvose. Facía falta una mayoría simple pa que se pudiera tratar.

(d’InfoNoreña, 03-04-2014)

Read Full Post »

L’Ayuntamientu de Noreña vuelve a refugar escritos n’asturianu

Casu nuevu de represión llingüística en Noreña. L’alcalde del municipiu, Cesar Movilla, niégase a tramitar dos solicitudes de documentación de Conceyu Abiertu con fecha d’entrada nel rexistru del 17 y 21 d’esti mes, por tar escritos n’asturianu. Trátase en dambos casos de testos cenciellos nos que se pide documentación: el día 17 un llistáu con documentación en xeneral de dellos temes (ponte del rebalde, actes de plenos celebraos, les normes subsidiaries que sostituyen al PGOU, los presupuestos de 2012, el borrador de los de 2013) y nel casu del 21 d’una copia de los antecedentes de les comisiones celebraes güei.

Sicasí, foi precisamente güei cuando l’Ayuntamientu fixo estrega d’una carta de contestación onde l’alcalde comunica que “previo a su tramitación deberá presentarlos en lengua castellana”. Conceyu Abiertu argumenta que los testos son dafechamente entendibles y cenciellos, simplemente se trataría de dar el so consentimientu pa que se facilite al Grupu Municipal una copia de los documentos pedíos. “La postura antiasturiana del alcalde ye bien conocida y ta suficientemente documentada, pareznos que nesta ocasión tamién se trata d’una nueva esculpia pa torgar un normal accesu a la información, como venimos denunciando tolos grupos de la oposición dende l’aniciu de la llexislatura”.

Read Full Post »

PSOE ya IDEAS eviten l’aprobación de la Ordenanza del Asturianu en Noreña

La presentación del proyectu d’Ordenanza pal Usu del Asturianu nel Conceyu de Noreña, redactada pola formación Conceyu Abiertu nun consiguió aprobase esti xueves nel plenu caberu enantes de les vacaciones de branu. El PSOE, partíu que gobierna’l conceyu con trés conceyales y qu’aprobó n’otros conceyos ordenances asemeyaes, ya IDEAS, que tien una conceyala y lleva la oficialidá nel so programa, votaron en contra, mientres qu’Independientes por Noreña, con trés conceyales y PP, con dos, decidieron abstenese. A favor votaron el propiu conceyal que presentaba la propuesta, de CA, y el de Frente de la Izquierda, mientres que l’únicu conceyal de Foru, Inaciu Iglesias, qu’amosara la so disposición a votar a favor, nun tuvo nel que yera un plenu decisivu pal futuru del asturianu nel conceyu condal.

El plenu entamó cola presentación al traviés de la vía d’urxencia, como ye vezu na oposición por mor de les torgues que l’Alcalde socialista, César Movila, pon a la discusión de toles propuestes del restu los partíos.

Read Full Post »

Noreña va debatir les ordenances sobre l’usu del asturianu que propón Conceyu Abiertu

El Plenu del Conceyu de Noreña va debatir esti xueves, 26 de xunetu, la propuesta d’ordenanza pal usu de la llingua asturiana que presentó Conceyu Abiertu por Noreña a finales de mayu. D’entós p’acá, los grupos políticos tuvieron oportunidá d’estudiar el testu y presentar aportaciones a una propuesta que, a xuiciu de Conceyu Abiertu, ye «asumible perfectamente» por toles formaciones con representación nel Conceyu y «axustada a la llegalidá vixente».

La formación asturianista pretende que la norma sía aprobada por unanimidá de los grupos porque, na so opinión, «la llingua ye patrimoniu de tolos noreñenses, independientemente de la so ideoloxía». Por esti motivu, l’aprobación d’una norma local que reconoza los derechos llingüísticos de tolos ciudadanos, que regule’l so usu nel Conceyu y incluya midíes de promoción y normalización, como ye la que se propón, diba ser, en palabres de Conceyu Abiertu por Noreña, «amás d’un actu de dignificación de la llingua y cultura asturianes, un avance democráticu necesariu».

Read Full Post »