“Ye la llexislatura con más diputaos a favor de la oficialidá, 17 de 45”

PABLO R. GUARDADO

Segunda y cabera parte de la entrevista a Inaciu Galán y González (Xixón, 1986), presidente d’Iniciativa pol Asturianu, que va viaxar esta selmana a Suiza pa intervenir na ONX.

Nestos trés años, dende que nació Iniciativa pol Asturianu, ¿la situación del idioma vivió avances o retrocesos?
La situación ye mala y va peor, no que cinca a la vitalidá de la llingua y a que les autoridaes siguen ensin garantizar la llibertá de los ciudadanos pa qu’al terminar el sistema educativu puedan escoyer qué llingua falen, porque salgan bien formaos n’asturianu y castellán, y porque esista una oficialidá que garantice’l drechu a usala en tolos ámbitos.

Por embargu, el sofitu de cada vegada más partíos de tol espectru políticu y l’enorme consensu social a favor del asturianu, más d’un 60% de partidarios de la oficialidá según les encuestes, faenmos ser positivos al respective del futuru. Tamos a tiempu de cambiar la tendencia que lleva l’asturianu hacia la desapaición en poques décades y tamos enfotaos en que vamos consiguilo.

Nel ámbitu de la reivindicación ta faciéndose cada vegada un meyor trabayu. L’importante llabor reivindicativu de la Xunta pola Defensa de la Llingua Asturiana impulsando la manifestación cada añu; el llabor sectorial de Softastur, nel campu de la informática; de Reciella, families pol asturianu, cola tresmisión del idioma a los neños; y otres organizaciones d’otru tipu como El Ronchel, Ástura, El Teixu, N’Ast, Faceira y Furmientu en Lleón, grupos de trabayu dientro de los partíos, asociaciones, llocales sociales…

Hai un movimientu plural, ampliu y que ye exemplu de convivencia. Tovía mos queda, sí me paez, un pasu más, una mayor coordinación de tol movimientu.

Read Full Post »

Partidarios de la oficialidá del asturianu percuerren el centru d’Uviéu reclamando la reconocencia de la llingua

Partidarios de la oficialidá de la llingua asturiana percorrieron esti vienres les cais del centru d’Uviéu pa reclamar esta reconocencia, como tolos años nel Día de Les Lletres. La marcha, liderada por un grupu de gaiteros y percusionistes, empezó ante la Estación de Renfe d’Uviéu y percorrió tola cai Uría hasta acabar frente al Teatru Campoamor, onde ta previsto l’actu institucional de l’Academia de la Llingua.

Sindicatos Suatea, CCOO, UXT y CSI, organizaciones polítiques como Compromisu, Conceyu Abiertu, Andecha Ástur, Izquierda Unida, y delles asociaciones sociales y culturales diéronse cita y aportaron les sos pancartes a la reivindación.

Read Full Post »

El Conceyu de Samartín diz que nun va tolerar «que se critique’l nuestru respaldu a la llingua»

Gema Suárez, conceyala de Cultura de Samartín del Rei Aurelio, afirmó que nun van tolerar que se critique’l respaldu de la institución que dirixe hacia la llingua «con acusaciones infundaes». Asina, la Conceyalía respuende a les crítiques de la formación Conceyu Abiertu por que la páxina web del Conceyu nun tuviera disponible tamién en llingua asturiana, dalgo que pa los nacionalistes yera «una actitú de despresciu y marxinación pa cola llingua asturiana y pa cola cultura que representa».

La edil de Cultura, que defende’l compromisu «firme» del Conceyu de Samarín pa cola llingua, califica de «ofenses» al trabayu «responsable y eficiente» de la Oficina de Normalización Llingüística Municipal les declaraciones de Conceyu Abiertu. Nes mesmes, la formación afirmaba que Samartín tien un serviciu de normalización llinguística que debería encargase de xestionar esti tema y actualizar la web «de mou que quede una versión n’asturianu normativu».

Read Full Post »

Tiempu d’elecciones

El próximu 22 de mayo tán convocaes elecciones autonómiques y municipales en tol territoriu falante d’asturllionés que pertenez administrativamente al Reinu d’España. El resultao que salga d’estos comicios va ser, con éstes, el cuadru onde puedan desenvolvese los derechos de los falantes pa los próximos cuatro años. Anque tovía nun s’abrió oficialmente la campaña electoral, sí llegó’l tiempu de reflexionar sobre delles cuestiones llingüístiques que tán presentes yá en debate.

Read Full Post »

La Xunta Electoral de Llaviana recula y acepta les candidatures n’asturianu

Depués de presentar les alegaciones correspondientes, la Xunta Electoral de Llaviana aceptó les candidatures de Bloque por Asturies y Conceyu Abiertu en Samartín del Rei Aurelio y Llangréu, que refugara de mano por presentar la documentación n’asturianu «y nun utilizar nenguna de les llingües oficiales del Estáu español», afirmaron dende Conceyu Abiertu.

Esti foi l’únicu casu nel que se refugaron les llistes d’un partíu políticu por tar escrites n’asturianu. Asina, la Xunta Electoral Provincial y les demás de zona aceptaron la documentación n’asturianu ensin nengún problema, circunstancia que se contempla na sentencia del 48/2000 de 24 de febreru del Tribunal Constitucional, que permite l’usu del asturianu nes candidatures.

(de Les Noticies, 26-04-2011)

Read Full Post »

La Xunta Ellectoral de Llaviana refuga les candidatures de Conceyu Abiertu n’asturianu pese a la sentencia del Tribunal Constitucional

La Xunta Ellectoral de Zona de Llaviana comunicó ayeri a los representantes de Conceyu Abiertu énte la mesma que nun daba por válides les candidatures presentaes nos conceyos de Samartín del Rei Aurelio y Llangréu por emplegar l’asturianu na documentación requería al efeutu. Concretamente, lo que s’argumenta dende la XEZ de Llaviana ye que “nun s’utiliza nenguna de les llingües oficiales del Estáu español”. De momentu, ye l’únicu casu nel que se refuguen les llistes de Conceyu Abiertu por esta razón, ya que nin la Xunta Ellectoral Provincial nin nenguna de les otres de Zona nes qu’hai presentaes candidatures de Conceyu Abiertu comunicaren nada al respeutu.

Read Full Post »