La XDLA anuncia una campaña pa facilitar a la ciudadanía la reclamación del usu del asturianu nes páxines web de les alministraciones públiques

PABLO R. GUARDADO

La presencia del asturianu nes páxines webs de los conceyos y otres intituciones públiques, “tamién autonómiques”, ye bien escasa, al igual ques nes redes sociales. Ye por eso que la XDLA va entamar una campaña pa facilitar a la ciudadanía la reclamación a les alministraciones públiques del usu de la llingua asturiana.

“Nestos momentos cuasi puen contase colos deos d’una mano les páxines d’entidaes públiques que cuenten cola opción de poder navegar n’asturianu o en gallego-asturiano, un fechu que consideramos una falta de respetu hacia’l patrimoniu llingüísticu d’esta tierra y hacia los sos falantes”, espresa la organización cívica, que pon l’exemplu d’Avilés. Según esplica nuna nota de prensa, nel portal web nuevu del Teatru Palacio Valdés, que celebra’l so centenu aniversariu esti añu, hai “presencia nula de la llingua asturiana”.

Read Full Post »

Iniciativa pol Asturianu anima a los conceyos d’Avilés, Castrillón y Corvera a usar l’asturianu nos autobuses urbanos

El presidente d’Iniciativa pol Asturianu, Iván Llera, propon a los conceyos d’Avilés, Castrillón y Corvera l’usu del asturianu y de la toponimia oficial nes llínies d’autobús urbanu. El presidente de la organización comentó que “anque somos conscientes de que la xestión del tresporte ye privada, facemos un llamáu a los responsables de los tres conceyos pa proponer un alcuentru col Consorciu de Tresportes y la empresa concesionaria del serviciu pa fomentar l’usu del asturianu y l’emplegu de los topónimos tradicionales na cartelería de les llínies”.

Nesi sentíu, Llera recordó que “tovía queden munches coses que facer dende los conceyos y l’usu del asturianu nun elementu de tanta visibilidá como son los tresportes ye esencial pola presencia pública que tienen”.

Read Full Post »

El Reglamentu Orgánicu Municipal d’Avilés nuevu afita finalmente la posibilidá d’emplegar l’asturianu

PABLO R. GUARDADO

El Plenu d’Avilés d’esti xueves aprobó por unanimidá el Reglamentu Orgánicu Municipal nuevu. Ésti inclúi, a pidimientu de Somos Avilés, un artículu sobre la llingua nos procedimientos qu’afita l’emplegu del asturianu depués de que’l primer proyeutu del PSOE retirara l’únicu esistente que facía referencia al usu del idioma.

El testu definitivu, que contó col sofitu del partíu nel gobiernu, PP, Somos Avilés, Izquierda Xunida (IX), Ciudadanos, Ganemos y conceyales non adscritos, inclúi un artículu, el 22, que lleva’l nome de ‘Llingua nos procedimientos’. Ésti tien dos puntos, afitando’l primeru que “les convocatories de les sesiones, los órdenes del día, les Propuestes d’Alcuerdu, Proposiciones, Votos Particulares, Enmiendes, Ruegos, Interpelaciones, Mociones, Comparecencies, Reprobaciones y les actes redautaránse en too casu en llingua castellana. D’igual forma tamién se velará pola presencia de la llingua asturiana”.

Read Full Post »

“Los ayuntamientos tienen plena capacidá llegal pa regular ordenances d’asturianu”, afirma Bartolomé

PABLO R. GUARDADO

L’artículu 8.1 de la Llei d’Usu y Promoción del Bable/Asturianu ratifica la capacidá llegal de los conceyos pa poner en práutica midíes de defensa de los derechos llingüísticos, recuerda’l xurista Nicolás Bartolomé, qu’apunta que dende’l 2002 hai vixentes ordenances nel país. Señala que la interpretación que fai l’informe xurídicu d’Avilés nun tien en cuenta’l marcu llegal asturianu.

“Los conceyos asturianos podrán adoptar les midíes necesaries p’asegurar la efectividá del exerciciu de los derechos llingüísticos qu’esta Llei otorga a los ciudadanos residentes n’Asturies” afita dichu artículu obviáu pol informe xurídicu al que, apunten dende Somos Avilés, pretende agarrase’l PSOE llocal pa zarrar l’espediente de la ordenanza sofitada pol Plenu n’abril del 2016 y dilatada nel tiempu hasta agora. Ensin poder facer una llectura detallada de la mesma, Bartolomé, a consulta d’Asturies.com, resúmela como “una esbilla de xuridisprudencia que nun tien en cuenta’l marcu llegal asturianu” y que ve’l tema llingüísticu “como un blancu y prietu”, esto ye, “que si nun hai oficialidá nun hai posibilidá de facer nada pa la so promoción, cuando ‘l réxime xurídicu del asturianu faculta a facer munches coses, por exemplu ordenances municipales”.

Read Full Post »

La XDLA diz que l’informe contra les ordenances d’Avilés muestra la “necesidá” d’oficializar l’asturianu

La Xunta pola Defensa de la Llingua Asturiana (XDLA) afirma que la noticia de que’l Conceyu d’Avilés nun va siguir alantre cola tramitación d’una ordenanza d’usu del asturianu muestra la “necesidá” de facer oficial esti idioma.

Al traviés d’una nota de prensa, la organización posicionóse sobre l’informe desfavorable de los servicios xurídicos del Conceyu a aprobar unes ordenances, dalgo que pa la XDLA “nun fai más que recordar la necesidá d’un marcu llegal que garantice polítiques actives y clares en favor de la normalización del idioma”.

Read Full Post »

Los servicios xurídicos del Conceyu d’Avilés afirmen que nun se puen aprobar unes ordenances d’asturianu

Los servicios xurídicos del Conceyu d’Avilés afirmaron que, al nun recoyer l’Estatutu d’Autonomía la oficialidá del asturianu, el Plenu municipal nun pue aprobar unes ordenances pa regular l’usu y la promoción d’esta llingua nel conceyu.

Asina se recueye nun informe técnicu de los servicios xurídicos municipales al que tuvo accesu Europa Press y que señala que nestos momentos l’Estatutu d’Autonomía nun dispón que’l “bable” tenga’l calter de llingua oficial n’Asturies xunto col castellanu.

Read Full Post »

Principien les visites guiaes n’asturianu de la Selmana de les Lletres

Esti llunes 30 empiecen les visites guiaes en llingua asturiana per delles localidaes pola Selmana de les Lletres. Esi mesmu día n’Avilés; el martes 1 de mayu n’Uviéu; el 2 en Xixón, y la fin de selmana siguiente, en Ribeseya.

La 39ª edición de la Selmana de les Lletres Asturianes va dar protagonismu a la lliteratura infantil y xuvenil p’afalar el vezu de la llectura n’asturianu y gallego-asturianu ente los más mozos.

Hasta’l 8 de mayu van desenvolvese en nueve conceyos más d’una ventena d’actividaes ente talleres, esposiciones, homenaxes, presentaciones de llibros, llectures públiques, certames lliterarios, alcuentros escolares, entregues de premios, visites guiaes, conciertos y representaciones teatrales, ente otres.

Read Full Post »

La XXXIX Selmana de les Lletres Asturianes va tar dedicada a la lliteratura infantil y xuvenil

El vienres va echar a andar en Llorgozana, con un actu poéticu al alborecer, la XXXIX Selmana de les Lletres Asturianes, dedicada esti añu a la lliteratura infantil y xuvenil. Hasta’l 8 de mayu van desendolcase actividaes al rodiu l’idioma en nueve conceyos, siendo la xornada central el vienres 4, Día de les Lletres Asturianes.

Talleres, esposiciones, homenaxes, presentaciones de llibros, llectures públiques, certámenes lliterarios, alcuentros escolares, entregues de premios, visites guiaes, conciertos y representaciones teatrales componen les más de venti actividaes programaes pa estos díes, nos que van tener un protagonismu especial la lliteratura infantil y xuvenil. L’actu inaugural va celebrase’l vienres a primer hora, l’Alba de les Lletres Asturianes, que va tener como sede la escuela de Llorgozana a les 7 hores, iniciativa novedosa que ta tamién encuadrada nel Programa Cultural Antón de Marirreguera que vien entamando dende xineru’l Conceyu de Carreño.

Read Full Post »

Avilés aprueba una moción a favor de la manifestación pola oficialidá

El plenu del Conceyu d’Avilés aprobó esti xueves una moción d’apoyu a la manifestación pola oficialidá de la llingua asturiana y del gallego-asturianu d’esti sábadu 21 d’abril. La convocatoria entámala la Xunta pola Defensa de la Llingua Asturiana y va salir a les 12.00 hores de la Estación del Norte d’Uviéu.

La moción tuvo l’apoyu de Somos, IX y Ganemos y l’astención del PSOE. Votaron en contra PP y los non adscritos. Avilés súmase asina a los plenos de los Conceyos de Noreña, L.lena y Carreño, que tamién aprobaron mociones d’apoyu a la manifestación.

Read Full Post »

El Conceyu d’Avilés súmase a Xixón y Uviéu nel sofitu a la oficialidá del idioma

PABLO R. GUARDADO

Los trés conceyos con más habitantes del país, que representen casi’l 70 por cientu de la población asturiana, sofiten la oficialidá. L’Ayuntamientu d’Avilés aprobó esti xueves una moción al respeuto, colos votos favorables del PSOE, y súmase asina a Xixón y Uviéu.

Somos Avilés, Izquierda Xunida (IX) y Ganemos Avilés foron los responsables de llevar a Plenu esta proposición qu’apuntaba que “ye’l momentu d’avanzar na oficialidá del asturianu como elementu fundamental pa la so dignificación normativa y la so normalización social” y, “nesti sen, insta al Gobiernu d’Asturies y a les distintes fuercies polítiques con representación parllamentaria a entamar un diálogu y llograr un consensu col fin d’algamar esti oxetivu, qu’acabaría cola reforma del Estatutu d’Autonomía d’Asturies nun procesu qu’incluya nel mesmu la oficialidá de la llingua asturiana”. Tres aldericase, llevóse alantre la votación, que foi apoyada tal cual, ensin modificación nenguna, polos 8 conceyales socialistes, sumando un total de 17 votos a favor y 8 en contra.

Read Full Post »