Feeds:
Antradas
Comentairos

Posts Tagged ‘Conceyu de Nava’

El Serviciu de Normalización Llingüística de la ‘Comarca la Sidra’ entama, en collaboración col Conceyu de Nava, esti Taller d’Asturianu destináu a toles persones intereses n’ampliar los sos conocimientos sobre llingua asturiana independientemente del so nivel, al tar enfocáu dende una perspeutiva fundamentalmente práutica y de fomentu del coaprendizaxe. En concreto, busca “crear un espaciu de deprendizaxe y perfeccionamientu de les habilidaes comunicatives en llingua asturiana, tanto nel planu d’espresión y comprensión oral como escrito”.

Les sesiones van tar dividíes en dos partes, tando la primera enfocada na espresión escrita. Asina, partiendo de les producciones del alumnáu, éstes van correxise pa, al empar, repasar les normes ortográfiques y gramaticales. D’esta forma van ampliase los recursos sintácticos y de vocabulariu de los participantes.

(more…)

Read Full Post »

El Serviciu de Normalización Llingüística de la Comarca de la Sidra, en collaboración cola Conceyalía de Cultura del conceyu de Nava, ta acabante d’abrir el plazu pa un nuevu cursu de llingua asturiana de nivel inicial. El cursu impartiráse llunes y miércoles, de 17:30 a 19:00 hores nel Antiguu Telecentru (cai Luis Armiñán) dende’l 12 de xineru al 18 de marzu de 2015.

Trataranse temes d’historia y socioloxía de la llingua asturiana, normes ortográfiques básiques, meyora de lésicu, sintaxis y morfoloxía, amás de cultura actual fecha n’asturianu. Los interesaos pueden apuntase, hasta’l propiu 12 de xineru, poniéndose en contactu col Serviciu de Normalización Llingüística de la Comarca de la Sidra, bien per mail, empobinándose a normastur@lacomarcadelasidra.com, bien pel teléfonu 985718413 (Pablo, SNLL), llamando de llunes a xueves ente les 9:00 y les 15:30 hores.

(d’Infoasturies, 23-12-2014)

Read Full Post »

Dientro de los sos talleres de llectura n’asturianu que se vienen celebrando dende va trés años, el Serviciu de Normalización Llingüística de la Comarca de la Sidra, en collaboración col Conceyu de Nava, entama pa esti próximu sábadu 13 d’avientu a les siete la tarde, na sala Marta Portal de la Casa la Cultura del conceyu, un recital del poeta Rubén Suárez Sánchez (Areñes-Siero, 1983), más conocíu col nomatu de Rubén d’Areñes, ún de los autores más destacaos dientro de les nueves xeneraciones de la lliteratura n’asturianu.

Estrenáu nel mundu lliterariu con Los venticinco pasos (2008), col qu’algamó’l premiu Nené Losada Rico, ye autor tamién de Les páxines blanques (Premiu Fernán Coronas 2008), Pequeñu álbum de familia (2010) y La solombra del flacu (2011). En Nava fadrá un repasu per tola so trayectoria y los asistentes podrán comentar col autor impresiones sobre la so obra y el fechu poéticu en xeneral.

(d’Infoasturies, 19-11-2014)

Read Full Post »

Nava cellebra la Selmana de les Lletres con una esposición de cómic tol mes de mayu y un alcuentru col debuxante Ruma Barnero el día 8.

Acordies cola temática de la 35 Selmana de les Lletres Asturianes, el serviciu de normalización llingüística de la Comarca de la Sidra, en collaboración col conceyu de Nava, tien programada pa estes feches la Esposición “Concursu de Cómic n’Asturianu Comarca de la Sidra”, nel primer pisu de la Casa la Cultura Marta Portal, onde se podrán ver les obres premiaes y seleccionaes mientres los siete años nos que se mantuvo esti concursu, ún de los primeros certámenes de cómic n’asturianu que se convocaron.

Na muestra, que tara espuesta dende’l vienres 2 de mayu hasta final de mes, podrán vese obres d’autores güei reconocíos que nel so día participaron nel concursu, como Alfonso Zapico, premiu nacional de cómic, o Ruma Barbero. Esti últimu autor, Ruma Barbero, tará’l xueves 8, a partir de les 19:00, na mesma Casa la Cultura Marta Portal, onde va falar al públicu de les sos últimes obres publicaes, La Chelita y Aguantando Cachones, con firma d’exemplares y acompañáu d’una presentación audiovisual.

(d’Infoasturies, 30-04-2014)

Read Full Post »