El Gobiernu y el Cervantes roblen un alcuerdu “pa que la riqueza de la cultura y la llingua asturianes viaxe pel mundu”

PABLO R. GUARDADO

Berta Piñán y Luis García Montero roblaron esti llunes na Llaboral un conveniu de collaboración ente la Conseyería de Cultura, Política Llingüística y Turismu, y l’Instituto Cervantes. Un alcuerdu que “ye una ocasión irrepetible pa que la riqueza de la cultura y la llingua asturianes viaxe pel mundu y dean a conocer y a reconocer el talentu y la brillantez de los nuestros y nuestres creadores”, apuntó la de Cañu.

“Esti alcuerdu representa p’Asturies una oportunidá esceicional de que la cultura y la llingua de la nuestra tierra puedan ser conocíes y reconocíes en tol mundu al traviés del embaxador, esi embaxador inmeyorable que ye l’Instituto Cervantes”, principió la so intervención Piñán sobre esti conveniu “relevante y con trescendencia, porque permitirá que la nuesa cultura y la nuesa llingua cuenten con una plataforma de difusión nacional y internacional inigualable como ye la rede de centros del Instituto Cervantes nel mundu”. Creada nel 1991 pol Gobiernu del Estáu y dependiente del Ministeriu d’Asuntos Esteriores, Xunión Europea y Cooperación, en total cuenta con 90 centros en 47 países.

Read Full Post »

Convóquense tolos Premios Lliterarios y los dos artísticos y queda a la espera’l Pachín de Melás

Los autores asturianos yá disponen de fecha tope pa presentar les sos creaciones a los siete Premios Lliterarios y los dos artísticos que convoca la Conseyería de Cultura, Política Llingüística y Turismu. Namái queda por anunciase’l gallardón de creación nueva, el Pachín de Melás de testos teatrales, que ta n’información pública hasta esti vienres.

El 17 d’abril ye’l día últimu pa la receición de trabayos n’asturianu en toles categoríes. Éstes son novela (XLIV Premiu Xosefa Xovellanos), poesía (XXIX Premiu Xuan María Acebal), ensayu (XXIX Premiu Máximo Fuertes Acevedo), lliteratura infantil y xuvenil (XVI Premiu María Josefa Canellada), cómic (XV Premiu Alfonso Iglesias) y traducción (III Premiu Florina Elías), completándose los Premios Lliteraros col destináu a menores de 31 años, el de narrativa moza (III Premiu Enriqueta González Rubin).

Read Full Post »

El Principáu destina 109.400 euros nel 2023 n’ayudes a la industria del llibru n’asturianu

El Boletín Oficial del Principáu d’Asturies de fecha 10 de marzu del 2023 publicó la convocatoria de subvenciones pa la promoción del llibru n’asturianu y en gallego-asturianu, que nesti 2023 ta dotada de 109.400 euros.

Esta llinia dedicada a la publicación de llibros ta dirixida a empreses editoriales y busca ampliar la ufierta bibliográfica de calidá, amás del númberu de llectores y l’ámbitu d’espardimientu de la lliteratura asturiana.

Read Full Post »

Algaire gana’l XIV Premiu Camaretá al Meyor Cantar n’asturianu

El grupu Algaire foi’l ganador del XIV Premiu Camaretá al Meyor Cantar n’asturianu que convoca la Conseyería de Cultura, Política Llingüística y Turismu. La banda femenina compitió col tema ‘Coral y maera’, un cantar con lletra y música de Luis Ángel Fernández Santos.

El director xeneral de Política Llingüística, Antón García, foi l’encargáu d’entregar el gallardón a los ganadores del certame al términu de la gala na qu’actuaron los trés finalistes y qu’emitió la Televisión Pública del Principáu d’Asturies dende’l Teatru de La Llaboral.

Read Full Post »

La traducción al asturianu de «La palabra final. Diariu d’un suicidiu», de Roberta Tatafiore, gana’l Premiu Florina Alías

La traducción al asturianu de La palabra final. Diariu d’un suicidiu, de l’autora italiana Roberta Tatafiore, publicada por Ediciones Trabe y traducida por María Antonia Pedregal, foi la obra ganadora del segundu Premiu «Florina Alías» a la meyor traducción al asturianu. Esti reconocimientu ta impulsáu pola Conseyería de Cultura, Política Llingüística y Turismu, al traviés de la Dirección Xeneral de Política Llingüística, y ta dotáu con 6.000 euros.

Los integrantes del xuráu resaltaron «l’interés del testu orixinal, qu’aborda con naturalidá temes tabú y propón asuntos fundamentales pa la sociedá d’anguaño dende un puntu de vista sociolóxicu y filosóficu, como son el feminismu, el derechu a decidir sobre la propia vida, el papel del estáu na esfera de lo individual o la confrontación cola tradición relixosa». 

Read Full Post »