Gotor anima a la sociedá a lleer n’asturianu como meyor forma de garantizar el futuru de la llingua

El rector de la Universidá d’Uviéu, Vicente Gotor, clausuró esti miércoles 2 de mayu nel Paraninfu l’actu de presentación de la obra Poesíes, de Benito de l’Auxa y Antón Balvidares, editada pola Conseyería de Cultura y Deporte por cuenta de la 33 Selmana de les Lletres Asturianes. Y fíxolo naguando por que la Selmana fora un éxitu y «animando a la sociedá a lleer n’asturianu» porque esa «ye la meyor forma de garantizar el futuru de la llingua». Gotor, que faló n’asturianu, consideróse honráu de promover cualquier acción que tenga como oxetivu l’espardimientu de la cultura asturiana y, en concreto, de la so lliteratura. Pal rector, «la llingua y cultura d’Asturies son ún de los bienes más preciaos del so patrimoniu, son la so seña d’identidá y tendríen que ser un sitiu común d’alcuentru de tola sociedá, y non de disputa». Faló depués Gotor del apueste que ta faciendo la Universidá pol asturianu, que naz del convencimientu de qu’una Universidá enraigonada nel territoriu tien que se comprometer tamién nel ámbitu cultural. Vicente Gotor reconoció que son munchos los campos nos que la institución que dirixe pue incidir nel espardimientu, conocimientu y normalización del usu del asturianu, y destacó dos: nel terrén de la docencia, na formación del profesoráu; y nel terrén de la investigación, al traviés del Seminariu de Filoloxía Asturiana, que cuenta con «especialistes escelentes».

Read Full Post »

La Xunta de Toponimia vuelve al llabor

DAMIÁN BARREIRO

El director xeneral de Política Lingüística, Alfredo Álvarez, va presidir esti 22 d’avientu, na sé de la Conseyería de Cultura, el conceyu de la Xunta Asesora de Toponimia, lo que supón la primer reunión d’esta entidá dende’l cambiu de Gobiernu y col director nuevu nel cargu. A ella van asistir tamién el director xeneral d’Ordenación del Territoriu y Urbanismu, José Miguel García, y la directora d’Alministración Local, Cristina Bellón.

La Xunta Asesora de Toponimia del Principáu d’Asturies ye un órganu dependiente de la Conseyería de Cultura y Deportes que s’ocupa de tolo relativo a la recuperación y normalización de los nomes tradicionales de los llugares d’Asturies. Na so etapa actual, la Xunta Asesora de Toponimia constituyóse nel 2004 y celebró la primer sesión de trabayu en mayu d’esi añu. D’entós p’acá, protagoniza, xunto a los conceyos, un llabor históricu al cumplir l’oxetivu de convertir n’oficiales los topónimos d’Asturies.

Read Full Post »

L’ATNLL, esmolecida pol retrasu nel resolvimientu de les subvenciones a asociaciones, empreses y particulares

PABLO R. GUARDADO

L’Asociación de Trabayadores de la Normalización Llingüística (ATNLL) amuesa la so preocupación pola “tranquilidá” del Gobiernu pa resolver les subvenciones a asociaciones, empreses y particulares. Teme que se puedan perder.

“Vemos con muncho esmolecimientu’l fechu de que teamos a piques de qu’acabe’l períodu llegal pa resolver los espedientes presentaos y sigamos a la espera de la resolución de la Conseyería de Cultura no tocante a les subvenciones pa la normalización social del asturianu y del gallego-asturianu pa empreses, asociaciones y particulares que se convocaron por resolución d’esa mesma conseyería’l 14 d’abril del 2011 y se publicaron nel BOPA del 29 d’abril del 2011. Ye chocante que tovía nun se sepia nada al respeutu, teniendo como tienen les persones o entidaes beneficiaries d’atropar tola documentación requerida, asina como les muestres escrites o/y fotográfiques que xustifiquen el destín de les perres subvencionaes, si ye que les hubiere, primero del 30 de payares, por nun mencionar a les persones y organismos que yá invirtieren eses perres nos proyeutos pa los que solicitaren apoyu económicu”, señalen los trabayadores de la normalización llingüística, qu’aseguren temer perder les subvenciones de nun resolvese éstes nel plazu llegal “como yá ta pasando n’otres comunidaes con llingua propia”.

Read Full Post »

Xuan Santori: “Quedó claro que pueden iguase soluciones, que’l cambiu dase si se da colos botones precisos”

INACIU GALÁN

L’aprobación de dos reglamentos na Universidá d’Uviéu, unu que permite la presentación de documentos n’asturianu nel so rexistru, y otru que reconoz la posibilidá de facer la tesis n’asturianu, permite que per primer vegada na hestoria un doctorando faiga tolos trámites dende l’entamu a la presentación de la tesis énte’l tribunal, n’asturianu. L’investigador ye Xuan Santori, conocíu pol so llabor como traductor y escritor y que fai la so tesis precisamente sobre’l sistema lliterariu asturianu y la so rellación col procesu d’estandarización del idioma. Falamos con él na Entrevista de la selmana pa conocer tolos detalles d’esti pasu nuevu que se da na nornalización del asturianu.

Va poco presentaba la so tesis, la primera n’asturianu dende l’aprobación del nuevu Reglamentu, ¿atopó dalgún problema al facelo?
L’actu nun presentó más inconvenientes que los de cualesquier otru actu puramente alministrativu. Diba con tolos parabienes, los deberes fechos y consciente de que d’esta diba. Porque hubo otra previa. D’aende vien too. Na facultá de Lletres, agora, hai tradición abondo de tesis n’asturianu. La primer foi la hestórica del Profesor Ramón d’Andrés hai dos décades. Esi camín ta triáu y nun yera esperable que se plantegare nengún problema a la hora de defender un trabayu n’asturianu, al pesar de l’antigua redacción de los estatutos de doctoráu formulaos nun pensamientu ayenu al sentíu común no tocante a la realidá llingüística asturiana: yera posible facer una tesis en rumanu o en danés, pero’l conocimientu y la metodoloxía más moderna na investigación llingüística nun teníen sitiu na redacción universitaria, esto ye –supongo, nun interesen si tán n’asturianu.

Read Full Post »

L’Asociación d’Escritores d’Asturies fai entrega de los sos premios añales

L’Asociación d’Escritores d’Asturies entrega los XII Premios de la Crítica y el VI Premiu de les Lletres d’Asturies nun actu públicu nel Gran Hotel Regente d’Uviéu, a les 20 hores, del xueves 6 d’ochobre. Con esti premiu reconócense los meyores llibros publicacos nel 2010 d’autores nacíos o residentes n’Asturies. Los Premios de la Crítica d’Asturies, patrocinaos pola Conseyería de Cultura y Deportes y Caxastur, nacieron nel añu 1999 por iniciativa de Eva Carballo, Javier Lasheras, Juan Carlos García Villa, Jaime Herrero y Helios Pandiella, col oxetivu reconocer y dar puxu a la lliteratura fecha n’Asturies.

Read Full Post »

Vallaure utiliza l’asturianu na so intervención p’anunciar que Política Llingüística dependerá d’él directamente

El conseyeru de Cultura y Deportes del Gobiernu d’Asturies, Emilio Marcos Vallaure (Foro Asturies), quixo dexar claro esti llunes el so compromisu hacia la llingua asturiana y gallego-asturiana al utilizala nel Parlamentu autonómicu, na so primer comparecencia ante la Cámara asturiana. Asina, anunció que la Dirección Xeneral de Política Llingüística va depender d’él directamente.

Na so intervención inicial, y al falar precisamente de la Dirección Xeneral de Política Llingüística, Vallaure recurrió al asturianu íntegramente. Y terminó con dos frases en gallego-asturianu.

Read Full Post »

Vallaure diz que tendrá como oxetivu fundamental protexer el Prerrománicu y la llingua

Emilio Marcos Vallaure, conseyeru nuevu de Cultura y Deporte, afirmó esti llunes 18 de xunetu que va tener como exe fundamental del so mandatu protexer tol patrimoniu cultural asturianu, sobre manera’l Prerrománicu y la llingua asturiana.

Y ye que según Vallaure, el patrimoniu históricu del país ta en mui mal estáu: «Ye dalgo que pueden ver los propios asturianos o cualquier viaxeru que venga de fuera». Por eso, el conseyeru nuevu dixo qu’había qu’empezar a actuar «aplicando midies que yá tán recoyíes na Llei de Patrimoniu, pero qu’hai que cumpliles».

Read Full Post »