#YoApúntome: comienza’l plazu pa matriculase na materia de Llingua Asturiana y Lliteratura en Primaria

PABLO R. GUARDADO

Dende esti xueves y hasta’l día 20 ta abiertu’l plazu de matriculación nel cursu viniente en Primaria, nel que les escolines y escolinos han d’escoyer ente Llingua Asturiana y Lliteratura o Cultura Asturiana, en castellanu. La Conseyería d’Educación y Cultura caltién la campaña de promoción de la materia #YoApúntome/#EuApúntome.

“Son munches les razones pa deprender la llingua asturiana: aumenta la nuestra competencia comunicativa, ayúdanos nel aprendizaxe d’otres llingües, sensibilízanos con otres realidaes culturales y llingüístiques y arriquez el nuestru conocimientu y percepción del mundu”, destácase dende’l Gobiernu, mensaxe que se difunde de manera más amplia al traviés de cartelos, ‘flyers’ y tarxetones (dixitales) que se pueden ver nos centros escolares del país dende hai selmanes. L’oxetivu ye esplicar a les families y a los alumnos los beneficios que conlleva la materia d’asturianu y gallego-asturiano, qu’en Primaria ye voluntaria –cola altenativa de Cultura Asturiana, en castellanu– y en Secundaria y Bachilleratu optativa en competencia con otres materies y llingües estranxeres.

Read Full Post »

El Principáu convoca los premios lliterarios y de teatru profesional n’asturianu y gallego-asturianu

El Boletín Oficial del Principáu d’Asturies (Bopa) publicó la convocatoria de los premios lliterarios n’asturianu que promueve la Conseyería d’Educación y Cultura. El plazu de presentación termina’l 3 de xunetu pa obres dramátiques, el 2 de setiembre na modalidá de cómic y el 16 del mesmu mes pal restu d’opciones.

Estos premios son el ‘Xosefa Xovellanos’ de novela, na so cuadraxésima edición; ‘Xuan María Acebal’ de poesía, na so vixesimoquinta edición; ‘Máximo Fuertes Acevedo’ d’ensayu, na so vixesimoquinta edición; ‘María Josefa Canellada’ de lliteratura infantil y xuvenil, na so decimosegunda edición, y ‘Alfonso Iglesias’ de cómic, na so decimoprimer edición.

Según indicó’l Principáu al traviés d’una nota de prensa “estos gallardones, que contribúin a potenciar, consolidar y arriquecer la creatividá de la llingua asturiana nel ámbitu lliterariu, aumentaron anguaño la so dotación hasta los 5.000 euros”. El plazu de presentación d’orixinales termina’l 2 de setiembre na modalidá de cómic y el 16 del mesmu mes pal restu.

Read Full Post »

Educación y Cultura aumenta en 10.000 euros les ayudes a medios pa la normalización

Depués de dos años conxelaes, les ayudes a medios de comunicación pa la normalización del asturianu y gallego-asturiano viven una medra de 10.000 euros pa quedar en 100.000. Les destinaes a la edición de música caltiénense en 20.000 euros.

“La finalidá de les subvenciones a medios de comunicación ye ayudar a la normalización y dignificación del usu social de la llingua con espacios informativos onde s’usen l’asturianu o’l gallego-asturiano”, yá sían de papel o dixitales, en radio o televisión, espliquen dende la conseyería. La dotación total d’esta llinia de subvención ye de 100.000 euros, con un aumentu de 10.000 euros al respeutive del 2018, cuando se destinaron 90.000 euros.

Read Full Post »

El Principáu publica un discu colos 40 meyores cantares de la historia de la música asturiana

La Conseyería d’Educación y Cultura publicó’l doble discu conmemorativu ’40 años al son de la nuestra música/40 anos al son da nosa música’, pa celebrar la Selmana de les Lletres Asturianes, que nesta edición ta dedicada a la música fecha n’asturianu y gallego-asturianu.

El discu, onde se recueyen cuarenta temes que repasen les últimes cuatro décades, presentólu esti xueves nel Muséu de Belles el director xeneral de Planificación Llingüística del Gobiernu asturianu, Fernando Padilla, acompañáu de la filóloga del Serviciu de Normalización de la Conseyería, Lourdes Álvarez, y la escritora Marta Mori y la técnica de normalización María Xosé Rodríguez, que xunto al escritor Inaciu Llope y el periodista Damián Barreiro formaron la comisión qu’escoyó los cuarenta cantares.

Read Full Post »

El Principáu “satisfechu” col grau d’aplicación de la Llei d’Usu, mentes que l’Academia fala d’incumplimientos

El conseyeru d’Educación y Cultura, Genaro Alonso, mostróse esti martes “satisfechu” cola política llingüística desarrollada pol Gobiernu porque “fiximos lo que teníemos que facer”. Sicasí, la vicepresidenta de l’Academia de la Llingua Asturiana (ALLA), Marta Mori, destacó qu’existen “promeses incumplíes” como implantar la llingua n’Educación Infantil, “que ye dalgo que diz la Llei d’Usu y nun se fixo”.

Alonso y Mori afirmáronlo asina en declaraciones a los medios minutos enantes de participar nel actu institucional de la 40 Selmana de les Lletres, celebráu na Xunta Xeneral y onde, xunto a les autoridaes, participaron escolinos nuna llectura pública de testos n’asturianu y gallego-asturianu.

Read Full Post »

La Selmana de les Lletres Asturianes va tar dedicada a la música asturiana de los últimos 40 años

La 40 edición de la Selmana de les Lletres Asturianes va tar dedicada a la música asturiana de los últimos 40 años. El Principáu considera que’l llabor de los profesionales de la música en favor de la normalización llingüística “ye un fechu que merez reconocencia institucional y popular”.

Dende’l 26 d’abril al 9 de mayu van entamase delles actividaes repartíes per tola comunidá, como talleres, esposiciones, homenaxes, presentaciones de llibros, llectures públiques, certames y concursos lliterarios, alcuentros escolares, entregues de premios, conciertos o representaciones teatrales, informaron dende’l Gobiernu esti sábadu al traviés de nota de prensa.

Read Full Post »

Celaá tamién llanza balones fuera con respeuto a la especialidá docente

PABLO R. GUARDADO

La ministra socialista d’Educación y Formación Profesional, Isabel Celaá, nun va dar el pasu de crear la especialidá docente d’asturianu y gallego-asturiano. Ye lo que s’entiende de la respuesta evasiva dada a SUATEA, que demandaba la introducción d’una modificación nos decretos d’especialidaes que permitiera la so regulación.

L’escritu presentáu en xineru pol sindicatu educativu solicitaba a Celaá la inclusión nel artículu 2.2 del Real Decretu de Maestros y nel artículu 2.3 del Real Decretu de Secundaria del testu “naquelles comunidaes autónomes nes qu’haya llingües non oficiales que tengan proteición llegal y formen parte del currículu, podrá dase tamién, a pidimientu de la comunidá autónoma y según necesidaes educatives, la especialidá propia de la llingua respeutiva”, mesmu criteriu que se siguió pa encaxar l’asignatura de Llingua Asturiana y de Gallego-asturiano na LOMCE. La so respuesta al mesmu, depués d’un repás a la normativa vixente, conclúi que “nun procede incorporar a la normativa básica (Decretu Especialidaes Docentes) aspectos referíos a la so regulación, al considerar qu’Asturies ye competente a tolos efectos na regulación de les árees y materies de llibre configuración autonómica (onde tán inxeríes les nuestres llingües) tanto nel desarrollu curricular como na acreitación de la cualificación específica afayadiza pa impartiles”, rellaten dende’l Sindicatu Unitariu Autónomu de Trabayadores de la Enseñanza d’Asturies (SUATEA).

Read Full Post »

El BOPA publica la toponimia d’Uviéu

El Boletín Oficial del Principáu d’Asturies (BOPA) d’esti xueves 21 de marzu publica los decretos polos que se determina la toponimia oficial de los conceyos d’Uviéu, Onís y Cuaña, qu’a partir de güei pasen a ser los oficiales y que nel casu de la capital asturiana recueye que va ser oficial la denominación tradicional ‘Uviéu’ xunto la castellana ‘Oviedo’.

Foi n’abril del 2018 cuando’l Plenu del Conceyu d’Uviéu, colos votos a favor del PSOE, IX y Somos, y en contra del PP y de Ciudadanos, aprobó la toponimia del conceyu. Un decretu que’l miércoles 14 de marzu pasáu aprobó definitivamente’l Conseyu de Gobiernu.

Read Full Post »

La esposición ‘Voces’ comienza en Cabranes el so percorríu per Asturies

‘Voces. La llingua n’Asturies al traviés de los sieglos’, la esposición que tuvo más de 5.000 visitantes nos meses que tuvo abierta al públicu nel Muséu Arqueolóxicu d’Asturies con motivu del programa ‘Cuadonga Centenarios’, comienza a xirar per Asturies. La primer parada ye Cabranes, onde va acompañase de talleres y charres, además de visites guiaes que van anunciase próximamente.

Formada por paneles triangulares tresportables y audiovisuales, la intención de la Conseyería d’Educación y Cultura dende un primer momentu yera que l’amuesa percorriera los conceyos del país. La Casa la Cultura María Xosefa Canellada, asitiada en Santolaya, ye la escoyida pa inaugurar esti viaxe pola historia social y cultural d’Asturies al traviés de la llingua coordináu por Xulio Viejo, profesor universitariu que contó cola collaboración de Ramón d’Andrés y Roberto González-Quevedo na parte académica.

Read Full Post »

El XI Premiu al Meyor Cantar va tener una recompensa de 6.000 euros

PABLO R. GUARDADO

La Conseyería d’Educación y Cultura ta acabante de convocar el XI Premiu al Meyor Cantar, que va escoyer el meyor tema n’asturianu y gallego-asturiano del 2017 y 2018. Como novedá, esta edición va contar con una recompensa económica, que se cifra en 6.000 euros.

Depués de que nel 2018 nun s’entamara esti gallardón, la conseyería torna a recuperar el modelu emplegáu nel 2016, cuando se premió al meyor cantar de los dos años anteriores. Dende’l 2007, cuando se creó, hasta’l 2014, siempre tuvo caráuter añal.

Read Full Post »