Feeds:
Antradas
Comentairos

Posts Tagged ‘Conseyería d’Educación y Universidaes del Principáu d’Asturies’

HENRIQUE G. FACURIELLA

Alfredo Álvarez Menéndez celebra la primer Selmana de les Lletres como director xeneral de Política Llingüística, anque failo dientro d’un Gobiernu en funciones que, cola convocatoria d’elecciones anticipaes, vio frustraos munchos de los planes pa completar midíes de normalización llingüística reivindicaes dende había munchu tiempu polos sectores favorables al asturianu, como la especialidá de l’asignatura n’educación, l’usu de la toponimia oficial en toles Alministraciones Públiques o la presencia del asturianu en tou tipu de programes dientro de RTPA, sobre manera nos informativos y nes retresmisiones deportives. Güei ofrecemos la primer parte de la entrevista y mañana vamos publicar la segunda.

¿De qué acciones y resultaos ta más satisfechu desque se fixo cargu de la Dirección Xeneral de Política Llingüística?
Nun puedo tar mui satisfechu porque’l tiempu que tuviemos hasta agora pa facer coses foi pequeñu y hai munchos proyectos que tán xestionándose tovía. Polo tanto, prestaríame dicir ónde punximos l’acentu nesti tiempu. Lo primero que nos punximos delantre foi’l tema del personal, porque hai que saber que la plantiya cola que cuenta esta Dirección Xeneral ye mui curtia y, amás, taba mal configurada. Por exemplu, Política Llingüística cuenta con una plaza de traductor pero configurada de manera tala que’l traductor nun tien obligación de saber asturianu o gallego-asturianu, colo que contamos con una unidá de traducción con una dotación de personal que nun garantiza que pueda cumplir cola función pa la que se concibió. Polo tanto, entamóse un procesu de modificación d’esta plaza, procesu qu’empezó en setiembre cola propuesta d’una plantiya nueva nel marcu de la Rellación de Puestos de Trabayu (RPT), pero tovía nun s’aprobó porque ye un procesu llargu, nel qu’intervienen munches partes: intervención, sindicatos, etc. Sicasí, esta modificación ta a puntu d’acabar y espero que lo faiga nel sentíu que se pidió, que tengamos una plaza de traductor neses condiciones porque’l Gobiernu anterior configurárala de manera qu’un traductor d’asturianu nun tenía por qué saber esti idioma. Otru problema ye que la Dirección Xeneral cuenta namás con dos técnicos que, na configuración de la plaza, nun garantizaba que supieren asturianu y gallego-asturianu. Una d’eses places, amás, lleva vacante tol añu. Si s’aprueba la RPT que propunximos, consiguiremos qu’esos puestos queden configuraos pa que los técnicos que cubran eses vacantes tengan que conocer asturianu y gallego-asturianu amás de cumplir el requisitu de ser filólogos. (more…)

Read Full Post »

La Xunta pola Defensa de la Llingua Asturiana (XDLA) acaba de convocar un cursu d’afondamientu llingüísticu pa persones adultes de 40 hores de duración. Nél, los alumnos y alumnes van poder afondar nel bon usu del idioma tanto a nivel escritu como oral, amás de nes rellaciones ente llingua y sociedá. (more…)

Read Full Post »

INACIU GALÁN

Xosé Lluis Remis (Nava, 1979) yera maestru y periodista, hasta que va unos meses se convirtió nel responsable de la coordinación de l’asignatura d’asturianu na Conseyería d’Educación. Dempués d’estos meses de trabayu, y a poques selmanes d’una xornada electoral que puede finar col so llabor en casu d’un cambiu de gobiernu n’Asturies, falamos con él na “Entrevista de la selmana”, pa conocer más de cerca lo conseguío nestos meses y los oxetivos que tien en cartera pal tiempu que tea nel cargu.

Nel campu los maestros munchos conocen les funciones del to cargu, ¿pero podría esplicanos pal restu la xente que llabor lleva alantre?
Dende equí desendólquense xeres que tán rellacionaes con tolo que tenga que ver cola asignatura de Llingua Asturiana nes diferentes estayes educatives. El mio llabor ye informar y asesorar a los muérganos d’esta Conseyería que lo necesiten. Tamién damos asesoramientu al profesoráu d’asturianu y organizamos cursos de formación. Ye importante señalar que ye un múerganu consultivu non executivu. (more…)

Read Full Post »

La Conseyería d’Educación y Universidaes y la escuela pública Horacio Fernández Iguanzo de La Foz (Morcín) acaben d’entamar el primer concursu artístico-literariu Marcos Requejo. Esti concursu va facese n’asturianu ente los escolares d’Educación Primaria y ta entamáu cola collaboración del Conceyu de Morcín y l’Academia de la Llingua Asturiana.

El certame lleva’l nome d’un profesor d’asturianu nesa escuela que perdió la vida hai cuasi dos años en Los Picos d’Europa. La escuela recordó la figura d’esti maestru al traviés d’un memorial deportivu na so alcordanza y poniendo’l so nome al aula de Llingua Asturiana. Según indiquen dende la Conseyería, «la so apasionada defensa de la llingua y la so difusión ente los escolares más mozos, la so implicación col proyectu del centru y la viva participación nes actividaes estracurricualres valen d’exemplu pa tola comunidá educativa». (more…)

Read Full Post »

PABLO R. GUARDADO

Esti xueves celebróse la primer mesa-taller de les cuatro coles que la XDLA fai una revisión del Llibru Blancu. Nella, Beatriz Quirós señaló que’l Gobiernu “paez que tien la intención” d’apoyar la creación de la especialidá d’asturianu.

La presidenta de la Xunta de Personal Docente foi una de les convidaes a la mesa-taller dedicada a la Educación que llevaba’l nome de ‘Enseñanza: de la presencia a la normalización’, moderada por Xosé Candel, na que tamién tomaron parte Xosé Antón González Riaño, Paz Fontaciella y Iris Díaz Trancho. Quirós destacó la importancia de la creación de la especialidá d’asturianu, yá que “ensin ella nun vamos a nengún llau”. “Ye’l tema prioritariu dende la Xunta de Personal y tendría que salir esti añu”, afirma la representante de SUATEA, que recuerda “que perdimos un tren, que yera’l Decretu d’Especialidaes que se publicó nel BOE l’añu pasáu” pol silenciu de la Conseyería d’Educación, con Herminio Sastre al frente, tres una consulta fecha pol ministeriu. (more…)

Read Full Post »

PABLO R. GUARDADO

Tres cumplise 100 díes del nomamientu de conseyeros del Gobiernu nuevu, la Xunta pola Defensa de la Llingua Asturiana (XDLA) pide al Executivu que pase a los fechos col asturianu. Teme que les bones impresiones primeres sían fumu.

Nun comunicáu, el so voceru, Carlos Pulgar, recuerda que “yá tuvimos les oportunes entrevistes cola conseyera d’Educación y col direutor xeneral de Política Llingüística, responsables direutos del enseñu y de la normalización social de la llingua asturiana, pa tresmiti-yos les nuestres demandes pa facer frente a la situación actual de marxinación y falta de derechos”. Tres estos aconceyamientos, les impresiones de los responsables del coleutivo “foron relativamente positives”, anque Pulgar asegura que “nestes feches”, tres pasar cien díes del nomamientu de los conseyeros, “ta caducando aquel marxe d’enfotu y queremos empezar a ver midíes y fechos concretos que confirmen qu’aquelles impresiones primeres nun yeren namás fumu”. (more…)

Read Full Post »

DAMIÁN BARREIRO

Ana Isabel Álvarez, conseyera d’Educación y Universidaes, dixo que teníen la intención de consiguir la regulación del colectivu de profesores d’asturianu, pero qu’agora taben recopilando información y estudiando cómo facelo: «Namás podemos facer la declaración d’intenciones de que vamos estudiar la manera de regularizar la situación llaboral de los profesores d’asturianu, que merecen tol reconocimientu y que yá tienen una formación reglada n’igualdá de condiciones».

La conseyera fixo estes declaraciones na Comisión d’Educación de la Xunta Xeneral depués de ser preguntada pola diputada d’IX Emilia Vázquez, que dixo que tanto’l presidente Álvarez-Cascos como’l conseyeru de Cultura, Emilio Marcos Vallaure, mostraron l’interés por desarrollar la Llei d’Usu, polo que preguntó a la conseyera si dende la so cartera diben regular «el problema» de la enseñanza d’asturianu. (more…)

Read Full Post »

« Newer Posts