El Conseyu Asesor de Política Llingüística complétase colos cuatro representantes de les instituciones

Un total de 32 persones van componer el Conseyu Asesor de Política Llingüística que se va constituyir esti xueves telemáticamente. Amás de los 3 miembros de la Conseyería de Cultura, Política Llingüística y Turismu y los 25 designaos pola presidenta del organismu, Berta Piñán, hai que sumar los 4 representantes de l’ALLA, Universidá d’Uviéu, RIDEA y RTPA.

Pola Academia de la Llingua Asturiana (ALLA) va participar nel aconceyamientu de mañana’l so secretariu Xosé Ramón Iglesias Cueva, anque la intención de la institución académica ye que vaya alternando col presidente Xosé Antón González Riaño, según disponibilidá. Mentes, el rector Santiago García Granda va facelo pola Universidá d’Uviéu.

Read Full Post »

Cultura inclúi nel Conseyu Asesor de Política Llingüística a 25 persones de diversos ámbitos de la sociedá asturiana

La Conseyería de Cultura, Política Llingüística y Turismu del Gobiernu asturianu abrió’l Conseyu Asesor de Política Llingüística a 25 persones procedentes de diversos ámbitos de la sociedá asturiana.

Nel organismu, presidíu pola conseyera Berta Piñán, van tar presentes tamién los responsables, o les persones na que deleguen, de la Universidá d’Uviéu, l’Academia de la Llingua Asturiana (ALLA) – , el Real Institutu d’Estudios Asturianos (Ridea) y Radio Televisión del Principáu d’Asturies (RTPA).

Read Full Post »

El Conseyu Asesor de Política Llingüística va aconceyar pela primer vez el 22 d’ochobre

El Conseyu Asesor de Política Llingüística, órganu nuevu d’asesoramientu del Gobiernu asturianu na materia, va aconceyar pela primer vez el xueves 22 d’ochobre. Esta entidá va tar formada por 36 miembros que nun van tener derechu a indemnización nin remuneración pola asistencia a les reuniones.

El Conseyu, presidíu pola conseyera de Cultura, Berta Piñán, y col director xeneral de Política Llingüística, Antón García, como vicepresidente, va tar formáu pol presidente de l’Academia de la Llingua Asturiana, Xosé Antón Gonzále Riaño; el rector de la Universidá d’Uviéu, Santiago García Granda; el director del RIDEA, Ramón Rodríguez Álvarez; el de RTPA, Francisco Orejas; y hasta un máximu de trenta conseyeros de llibre designación que va normar directamente la conseyera.

Read Full Post »

El Conseyu Asesor de Política Llingüística va tar formáu por 36 miembros que nun van cobrar pol so llabor

El Conseyu Asesor de Política Llingüística va tar formáu por 36 miembros que nun van tener derechu a indemnización nin remuneración pola asistencia a les reuniones d’esti órganu nuevu.

El Conseyu, presidíu pola conseyera de Cultura, Berta Piñán, y col director xeneral de Política Llingüística, Antón García, como vicepresidente, va tar formáu pol presidente de l’Academia de la Llingua Asturiana, Xosé Antón Gonzále Riaño; el rector de la Universidá d’Uviéu, Santiago García Granda; el director del RIDEA, Ramón Rodríguez Álvarez; el de RTPA, Francisco Orejas; y hasta un máximu de trenta conseyeros de llibre designación que va normar directamente la conseyera.

Asina se recueye nel Boletín Oficial del Principáu d’Asturies (BOPA) d’esti 10 de xunetu, onde se publica la resolución de composición y funcionamientu del Conseyu Asesor de Política Llingüística.

Read Full Post »

Piñán anuncia l’ameyoramientu del traductor Eslema

PABLO R. GUARDADO

La conseyera de Cultura, Política Llingüística y Turismu, Berta Piñán, compareció esti martes na Comisión de Facienda pa informar a los grupos parllamentarios sobre les cuentes del so departamentu. Anunció partíes pal ameyoramientu del Eslema pal desarrollu d’un traductor en llinia castellanu-asturianu públicu y de baldre.

La escritora va xestionar un presupuestu de 47.250.986 euros, de los que 1.904.630 destínense a la promoción del asturianu. Esta cantidá supón un aumentu de 201.000 euros con respueto a les cuentes actuales, una medra del 11,8 por cientu, que gran parte, como apuntó la conseyera, débese al aumentu del gastu de personal (18,91 por cientu más) “sobre manera pola creación del serviciu nuevu que figura na estructura de la Conseyería de Cultura, Política Llingüística y Turismu, qu’hasta agora namái tenía un serviciu. Esta apuesta permitirá contemplar los trabayos de la Xunta Asesora de Toponimia y xeneralizar l’usu de la toponimia tradicional; poner en marcha’l Conseyu Asesor de Política Llingüística; algamar un avance significativu na programación del asturianu na RTPA; avanzar na implantación de ferramientes dixitales que permita la torna en llinia del asturianu al castellanu y del castellanu al asturianu; y una mayor coordinación colos servicios de normalización llingüística, que tienen que reforciar la so posición central na difusión d’actividaes de política llingüística”.

Read Full Post »

El Principáu va dar “un impulsu fuerte” a la Política Llingüística y va crear un Conseyu Asesor

La Conseyería de Cultura, Política Llingüística y Turismu va dar “un impulsu fuerte a la política llingüística” al asumir esi patrimoniu como “un valor esencial y identitariu d’Asturies”. Amás, el Principáu va tener un Conseyu Asesor na materia.

Asina se recueye na estructura nueva del Gobiernu aprobada esti viernes pol Executivu autonómicu, onde’l principal cambiu sobre’l mandatu anterior consiste na creación de les conseyeríes de Cultura, Política Llingüística y Turismu y de Ciencia, Innovación y Universidá.

Read Full Post »