L’usu de la toponimia oficial por Correos, escoyida ‘Meyor noticia pal asturianu 2022’

Iniciativa pol Asturianu vien entamando dende’l 2013 una votación en llinia coles meyores nueves rexistraes nel añu pal idioma.

‘Correos anuncia que va entamar a respetar la toponimia oficial’ entitulaba’l 10 de payares Asturies.com. Esti pasu dau pola empresa pública, depués d’años de reivindicación por parte d’usuarios, foi la más votada de les 33 propuestes del coleutivu pa ser declarada ‘Meyor noticia pal asturianu 2022’, ente les que taba’l 25 aniversariu d’esti mediu de comunicación dixital.

Read Full Post »

Correos anuncia que va entamar a respetar la toponimia oficial

PABLO R. GUARDADO 

17 años depués de l’aprobación de los primeros decretos qu’oficializaben la toponimia tradicional de conceyos asturianos, Correos va entamar a respetar el so usu. La empresa pública anunció que yá entamó col procesu d’actualización de les sos bases de datos, qu’espera tener completáu nel primer trimestre del 2023.

“Correos comenzará a utilizar nos sos sistemes la toponimia asturiana: les cartas, paquetes y notificaciones que s’unvíen dende les oficines postales van incluyir nes direiciones la nomenclatura tradicional”, comunicó esta mañana Leire Díez Castro, direutora de Rellaciones Institucionales, depués d’aconceyar con Berta Piñán, conseyera de Cultura, Política Llingüística y Turismu, y Antón García, direutor xeneral de Política Llingüística, que se desplazaron hasta Madrid pa tratar esti asuntu. Pa ello, según esplicó, ye necesario que l’Instituto Nacional de Estadística (INE) faiga les modificaciones necesarias nel so Nomenclátor pa que los sistemes de Correos puedan actualizase colos nomes de llugar correutos en sustitución de los yá derogaos, n’usu entovía por parte d’alministraciones estatales.

Read Full Post »

Compromís entruga nel Senáu por qué Correos sigue incumpliendo la toponimia tradicional asturiana

Carles Mulet, senador de Compromís, rexistró’l llunes una entruga escrita al Gobiernu al traviés de la presidencia de la Cámara Alta sobre l’incumplimientu por parte de Correos de la toponimia tradicional asturiana, única oficial en 74 de los 78 conceyos del país. L’Executivu estatal tien 30 díes pa dar respuesta a esta cuestión.

El castellonenc dio esti pasu al conocer la vieya demanda del usuariu de Twitter de nome Xovellanos –al traviés d’un segundu, Ricard J.–, que lleva más de cuatro años y diez meses diariamente llanzando a la empresa postal la pregunta “¿piensen n’actualizar la toponimia d’Asturies de les aplicaciones?”, ensin respuesta. “Hai topónimos que va más de 20 años que tán aprobaos y @CorreosAtiende sigue usando los non oficiales nes sos aplicaciones. Si quies mandar un paquete a Les Bories nes sos etiquetes namái hai opción de poner ‘Borias’”, esplicaba-y el perfil de chancia del ilustráu xixonés el domingu a Mulet, que menos de 24 hores depués yá tenía rexistrada la entruga.

Read Full Post »