Feeds:
Antradas
Comentairos

Posts Tagged ‘CP Clarín’

La gala del X Ruempi la Mollera, actividá entamada pola Oficina de Normalización Llingüística de Xixón, tuvo llugar esti martes nel Centru de Cultura Antiguu Institutu. Nella diose a conocer el ganador d’esti añu, que resultó ser el Colexu Públicu Montevil.

L’actu, animáu por Higiénico Papel, contó cola presencia de la conceyala d’Educación y Cultura, Ana Montserrat López Moro, amás de los escolinos y escolines de quintu y sestu de Primaria de les siete escueles participantes na edición 2015-2016: los colexos públicos Alfonso Camín, Cabueñes, Clarín, Honesto Batalón, Jacinto Benavente, Montevil y Xovellanos. A lo llargo del cursu tuvieron que trabayar trés entrugues y afondar na so respuesta al traviés de dibuxos, semeyes, información, maquetes, figures, trabayos na rede o trabayos en comuña.

(more…)

Read Full Post »

Según Iniciativa pol Asturianu, delles families con fíos matriculaos nel colexu públicu Clarín de Xixón denuncien que los sos fíos nun tienen accesu a l’asignatura de Llingua Asturiana nes condiciones de dignidá y calidá mínimamente esixibles. Nun comunicáu, informen que’l centru nun cuenta col profesoráu suficiente pa poner clases d’asturianu por mor de la gran demanda, y la respuesta de la Inspección educativa de la Conseyería d’Educación nun foi otra que dar por bono que los escolinos d’esti colexu se xunten en grupos de cursos distintos, (terceru y cuartu de primaria y quintu y sestu) xenerando grupos d’hasta 29 alumnos, cuando la ratio máxima ye de 25),onde conviven escolinos que tienen que trabayar con dos llibros distintos y materia diferente acordies col so nivel educativu y en namás dos sesiones de 45 minutos a la selmana.

Iniciativa pol Asturianu presentará una quexa a la Conseyería d’Educación y Cultura polo que considera un nuevu casu de marxinación y maltratu a l’asignatura de Llingua Asturiana. La organización esixe a la Conseyería d’Educación qu’aumente el númberu d’hores del profesoráu de Llingua Asturiana del centru, acordies coles necesidaes de matriculación.

Nel mesmu comunicáu, solicita tamién al centru la so collaboración, pidiéndo-y que reclame a la Conseyería una solución pa esti tratu llamentable del alumnáu que decide escoyer asturianu de forma voluntaria.

(d’Asturies.com, 17-10-2014)

Read Full Post »