L’Academia asoleya’l númberu 106 de Lletres Asturianes

Yá ta disponible la versión dixital del númberu 106 de Lletres Asturianes, el boletín de l’Academia de la Llingua Asturiana. L’ALLA espubliza una versión dixital dende va dellos númberos y la institución tien como oxetivu xubir tolos númberos a la rede. Pel momentu yá pueden consultase tolos asoleyaos dende l’añu 2000. Nesti númberu, como vien siendo vezu, hai espaciu p’artículos venceyaos a la filoloxía asturiana, recoyendo dalgunes de les comunicaciones presentaes nes pasaes Xornaes Internacionales d’Estudiu, celebraes n’Uviéu a finales de 2011.

Fernando Sánchez Miret abre’l númberu col artículu “Los problemas de la diptongación del asturleonés a la luz de la Romanística”, la presidenta de l’Academia, Ana María Cano González Fala de “L’antroponimia asturiana y el procesu de castellanización documental”, mientres que’l caderalgu Xosé Lluis García Arias revisa “La toponimia de Cantabria vista dende l’asturiana”, y Martín Sevilla Rodríguez comenta delles cuestiones sobre “Los topónimos asturianos Tamoca/Caloca”.

Read Full Post »

El númberu 104 de Lletres Asturianes entama una nueva etapa de la revista oficial de l’Academia

Vieno acabante d’aportar a les llibreríes el númberu 104 del boletín de l’Academia de la Llingua Asturiana qu’abre una nueva etapa de la publicación, con un nuevu formatu y l’anuncia de qu’entamará dende’l númberu próximu a asoleyase una versión dixital del mesmu.

Les novedaes van empobinaes tamién a allugar a la revista científica de l’Academia nel llugar que-y correspuende nos índices de citación académica y darréu d’ello afítase una periodicidá semestral y la igual del Conseyu Científicu Asesor y del Conseyu de Redaición.

Read Full Post »

El gochu, la medicina, la hestoria y la filoloxía pesllaron ayeri les Xornaes Internacionales d’Estudiu

Les Xornaes Internacionales d’Estudiu remataron esti xueves la so edición XVIII con un tarde enllena de conferencies y ponencies alredor de cuestiones como’l neutru materia o la medicina popular. Michele Loporcaro, de la Universidá de Zürich, foi l’encargáu d’abrir la última tarde de les Xornaes con una conferencia sobre l’orixe del neutru asturianu, que dalgunos filólogos tienen teorizao sobre’l so orixe nel sur de la península itálica “onde tamién se da esti fenómenu”.

Read Full Post »

Les Xornaes Internacionales d’Estudiu de l’Academia de la Llingua Asturiana lleguen al final

El xueves 5 de payares les XXVIII Xornaes Internacionales d’Estudiu, entamaes pola Academia de la Llingua Asturiana, lleguen al final. Los actos fáense na Facultá de Filoloxía de la Universidá d’Uviéu (Campus d’El Milán).

Read Full Post »

El númberu 99 de Lletres Asturianes ta yá nes llibreríes del país

L’Academia de la Llingua Asturiana vieno acabante asoleyar un númberu nuevu del so boletín “Lletres Asturianes”. A piques de facer un cientu de númberos l’Academia ufre un númberu nel que puen atopase trabayos como “El Apeo del ‘Concejo de Oviedo’ en el Libro del Prior (I)” trescripcion de Cristina García-Sampedro Clérigo sobre un testu del sieglu XV, “Vocabulariu de Cangas del Narcea, Amestadura”, de Jesús Feito Calzón, “Safo nel Surdimientu” de Ramiro González Delgado, “Una reseña de l’antoloxía de Caveda” de Xosé Lluis García Arias y “El tren de medianueche y otros cuentos de Sabel de Fausta” d’ Esperanza Marino Davila.

El númberu complétase cola reprodución d’un copia de la Fábula de Dido y Eneas d’Antón de Marirreguera, un trabayu de Xosé Lluis García Arias; el rellatu “Les fuercies de la naturaleza” d’Armando Murias Ibias; dellos de los dicursos pronunciaos pola Presidenta de l’Academia nos últimos meses, el discursu d’ingresu na ALLA de Berta Piñán y otres informaciones, como los ganadores de los premios de l’Academia en 2008, los alcuerdos roblaos con otres instituciones pola Academia, delles reseñes de llibros y un llistáu de les obres espublizaes n’asturianu nos últimos meses.

(d’Asturnews, 04-12-2008)

Read Full Post »