Francisco Álvarez faise col primer premiu nel Concursu de Cuentos pola Oficialidá de Bimenes

Francisco Álvarez González (Xixón, 1970) foi’l ganador del Concursu de Cuentos pola Oficialidá del Asturianu, que convoca’l Conceyu Bimenes y qu’esti añu llegó a la so edición númberu ventidós. El primer premiu, dotáu con 600 euros, foi pa la so obra Rosa d’iviernu.

El segundu premiu, dotáu con 450 euros, foi pal cuentu La nieve nun ye blanco y el cuervu nun ye prietu (dalgunes coses, por embargu, sí lo son), de Xaime Martínez Menéndez (Uviéu, 1993), y Xuan Trenor Allen (Uviéu, 1981) algamó’l tercer premiu, al que se-y apurren 300 euros, con Cavilaciones d’un home enroldáu.

Read Full Post »

Presentación del númberu 38 de la revista Asturies

La revista Asturies ye, de magar 1996, una erbía fundamental pal cumplimientu de los oxetivos que definen la Fundación Belenos: estudiar, esparder y dar a conocer el padrimoñu etnográficu y cultural del país

La Fundación Belenos presenta’l nu 38 de la so revista Asturies, memoria encesa d’un país el vienres 14 d’Avientu, a les 19’00 hores, na Casa de los Hevia (Villaviciosa). L’actu, con entrada llibre hasta completar aforu, va contar cola intervención del etnógrafu Inaciu Hevia Llavona, miembru de la Fundación Belenos y autor d’ún de los trabayos asoleyaos na revista, “L’arte de la tonelería pa sidra n’Asturies”, nel que’l conceyu maliayu tien un protagonismu especial por mor de los constructores de toneles qu’equí trabayaron y trabayen, y d’ehí’l fechu d’escoyer la so capital pa presentar esta nueva entrega d’una publicación que, amás de les estayes fixes como Memoria Gráfica d’Asturies –nesta ocasión dedicada al pueblu de Chanuces, en Quirós–, L’Estoxu y Cartafueyos de Belenos, recueye los trabayos que se conseñen darréu: “Reptiles n’Asturies: llargatos y llargatexes, eslizones y alagüezos” (Fernando Montes); “La Cerrosa (Suarías, Valle Bah.u de Peñamellera), una torca de la Edá del Fierro” (Alis Serna Gancedo y Alfonso Fanjul Peraza); “Fueu nos cuernos: batalles mítiques na memoria oral d’Asturies” (Alberto Álvarez Peña y Cristobo de Milo Carrín); “Ciudadanos asturianos escontra Napoléon” (Evaristo C. Martínez-Radío Garrido); “Un elementu decorativu propiu del conceyu de Nava: la «cenefa de picos» nel corredor de la casa tradicional” (Daniel Cueli Canto) y “Construyendo una historia xenética de la población asturiana” (Antonio F. Pardiñas y Belén López Martínez).

(d’Infoasturies, 11-12-2018)

Read Full Post »

Pérez Iglesias lleva’l so segundu Concursu de Cuentos pola Oficialidá

El Conceyu de Bimenes ta acabante d’anunciar el fallu del XXI Concursu de Cuentos pola Oficialidá del Asturianu. El ganador d’esta edición ye Héctor Pérez Iglesias, yá premiáu nel 2012, gracies a ‘Que trata de lo que me cuntó’l mio mayestru al dexar l’abadía’.

L’autor d’Arlós ye un habitual d’esti gallardón lliterariu, ocupando’l podiu del mesmu en delles vegaes. Nesta ocasión, seis años depués, repite’l primer premiu, dotáu en 600 euros.

Read Full Post »

Pablo Rodríguez Medina gana’l Concursu de Cuentos pola Oficialidá

Pablo Rodríguez Medina (L’Entregu, 1978) ye’l ganador del Concursu de Cuentos pola Oficialidá del Asturianu, que convoca’l Conceyu Bimenes y qu’esti añu llegó a la so edición númberu venti. El primer premiu, dotáu con 600 euros, foi pa la so obra ‘Los restos d’un naufraxu’.

El segundu premiu, dotáu con 450 euros, foi pal cuentu ‘Polly a les puertes del paraísu’, de Lluis Aique Iglesias Fernández (Sotrondio, 1967), y Llucía Fernández Marqués (Xixón, 1974) algamó’l tercer premiu, dotáu con 300 euros, con ‘Ca tolos vientos’.

Read Full Post »

Paredes: “Hai una bona parte de la cultura que desanicia materialmente qu’a la fin nun interesa a casi naide”

PABLO R. GUARDADO

La revista ‘Asturies, memoria encesa d’un país’ cumplió venti años de vida y la Fundación Belenos celebrólo cola presentación del númberu 36. Ástur Paredes (Uviéu, 1956), miembru del Conseyu Editorial de la publicación, recuerda nesta entrevista los anicios de la mesma, los llogros algamaos nestes dos décades y los temes pendientes.

Cúmplense venti años del proyeutu de ‘Asturies, memoria encesa d’un país’. Echando una mirada atrás, ¿tán satisfechos del llabor desendolcáu?
Emprimamos a publicar la revista en 1996 pero facía yá más de 25 años qu’entamáremos col trabayu etnográficu de campu. Desque entamemos, a últimos de los 70, tener un mediu editorial nel qu’amosar los nuesos trabayos yera ún de los enfotos que más pruyíen. Agora tenémoslu.

Per otru llau, yá son 36 los númberos asoleyaos de ‘Asturies’, munchos artículos d’interés, munches collaboraciones importantes… Nesi sen tamos contentos. Sicasí, un númberu de la revista al añu, que ye lo único que somos a publicar agora por cuestiones económiques, nun ye pa tar satisfechu.

Read Full Post »

Belenos presenta “Los llavaderos del Conceyu Piloña”

La Fundación Belenos vieno acabante d’asoleyar “Los llavaderos del Conceyu Piloña”, un llibru que fai’l númberu 9 de la so coleición Cartafueyos de Belenos y del que ye autor l’etnógrafu piloñés Daniel Cueli Canto (Coya, 1978).

Cueli ye precisamente miembru de la Fundación Belenos y del Conseyu Editorial de la so revista Asturies, memoria encesa d’un país, y el so llibru ye’l resultáu d’un trabayu de trés años que lu llevó, ente otres coses, a censar tolos llavaderos d’esti conceyu del centru-oriente d’Asturies.

Read Full Post »

Ana Esther Martínez Sierra gana’l concursu de cuentos pola Oficialidá de Bimenes na so decimoctava edición

Ana Esther Martínez Sierra (Nava, 1970) foi la ganadora del Concursu de Cuentos pola Oficialidá del Asturianu, que convoca’l Conceyu Bimenes y qu’esti añu llegó a la so decimoctava edición. El primer premiu, dotáu con 600 euros, foi pa la so obra “Ensin fades, ensin perdices”. El segundu premiu, dotáu con 450 euros, foi pal cuentu “Stylommantophora”, de Laura Marcos Domínguez (Mieres, 1982), y Héctor Pérez Iglesias (Llanera, 1978) algamó’l tercer premiu, al que se-y apurren 300 euros, con “Si verde”.

Nesta edición el xuráu tuvo compuestu polos escritores Xulio Vixil Castañón, Isabel Gutiérrez Novo y Pablo Rodríguez Alonso, amás de pol Alcalde Bimenes, Alejandro Canteli Rozada, y el técnicu responsable de la Estaya de Cultura, Daniel Cueli Canto, que ficieren les funciones de Presidente y Secretariu respeutivamente. Nos prósimos díes daráse anuncia de la fecha y del llugar d’entrega premios.

(d’Asturnews, 10-06-2015)

Read Full Post »

El celtismu llingüísticu y García Arias protagonicen el númeru 34 de la revista Asturies de la Fundación Belenos

La Fundación Belenos vieno acabante d’asoleyar esta selmana pasada’l númberu 34 de la so revista, “Asturies, memoria encesa d’un país”, na qu’amás de les estayes habituales, como Memoria Gráfica d’Asturies, nesta ocasión firmada por Antón Álvarez Sevilla y dedicada a apurrir dellos datos ya imáxenes sobre les nueses races autóctones nun asoleyaos enantes en trabayos de so, y Cartafueyos de Belenos, la espublización recueye trabayos de munchu interés como’l firmáu por García Arias alrodiu del celtismu llingüísticu n’Asturies.

La llista d’artículos d’esti númberu 34 entámala “Averamientu a la ecoloxía de los conceyos asturianos del Altu Navia” por Fernando Montes García y síguela “Una reflexón sol celtismu llingüísticu asturianu” de Xosé Lluís García Arias, tres del que pue lleese l’artículu “Afayu d’una estela con decoración castreña n’Antrialgu (Piloña)” por mor de la investigación d’Ástur Paredes, Daniel Cueli Canto y Alberto Álvarez Peña.

Read Full Post »

Daniel Cueli asoleya’l censu de llavaderos del Conceyu de Nava

Daniel Cueli Canto ta acabante asoleyar un censu de llavaderos nuevu , nesta ocasión ciéntrase nestes construcciones nel Conceyu Nava y xúntase a los anteriores sobre Sariegu (2012), Cabranes y Bimenes (2013). Yá ta disponible na rede pa la so llectura y descarga.

La biblioteca dixital de la Rede de Museos Etnográficos d’Asturies ta acabante asoleyar Llavaderos. Censu del Conceyu Nava, de Daniel Cueli. Esti trabayu amiéstase a los yá espublizaos por Cueli sobre los conceyos de Sariegu, Cabranes y Bimenes, tamién disponibles na biblioteca dixital de la Rede de Museos Etnográficos d’Asturies.

Read Full Post »

Pablo Rodríguez Alonso gana’l Concursu de Cuentos pola Oficialidá

Pablo Rodríguez Alonso (Xixón, 1979) foi’l ganador del Concursu de Cuentos pola Oficialidá del Asturianu, que convoca’l Conceyu Bimenes y qu’esti añu llegó a la so decimoséptima edición. El primer premiu, dotáu con 600 euros, foi pa la so obra “L’invitáu”. El segundu premiu, dotáu con 450 euros, foi pal cuentu “El foriatu”, d’Elisabet Felgueroso López (Llangréu, 1980), y Francisco Álvarez González (Xixón, 1970) algamó’l tercer premiu, al que se-y apurren 300 euros, con “Una nueche en La Belle Alliance”.

Nesta edición el xuráu tuvo compuestu polos escritores Xulio Vixil Castañón, Héctor Pérez Iglesias ya Isabel Gutiérrez Novo, amás de pol Alcalde Bimenes, Alejandro Canteli Rozada, y el técnicu responsable de la Estaya de Cultura, Daniel Cueli Canto, que ficieren les funciones de Presidente y Secretariu respeutivamente. Nos prósimos díes daráse anuncia de la fecha d’entrega premios, que tendrá llugar na Casa Conceyu de Martimporra.

(d’Infoasturies, 11-06-2014)

Read Full Post »