‘La xente amuesa abondo interés poles llingües que nun conocen’, coméntanos Carlos Díaz dende Ljouwert

Carlos Díaz, miembru del grupu folk Xera y un de los organizadores de la Selmana d’Asturies en Frisia, cuéntanos como foi esta esperiencia dientro de programación de la capitalidá europea de la cultura.

¿Cómo se ta recibiendo en Ljouwert esta selmana dedicada a la llingua asturiana?
Asturies resultara una grata sorpresa tantu pal público asistente como pa numerosos llingüistas cuya conocencia de la rialidá hestórica de la llingüa astur-llionesa xuntose cola presencia aún viva d’una parte d’esta na península: la llingua asturiana.

La xente amuesa abondo interés poles llingües que nun conocen. Amás, concretamente los frisios amuesen tamién dicho interés, ya que vense reflexáos como falantes d’una llingua minorizada, del mesmu modu.

Read Full Post »

Belenos publica un númberu nuevu de «Asturies, memoria encesa d’un país»

La Fundación Belenos acaba de publicar el numberu 32 de la revista Asturies, memoria encesa d’un país. Esti exemplar ábrese col estudiu de Jorge Camino Mayor «El Mayéu Busiá (L.lena): orixe d’una braña na Edá del Bronce». Otra manera, Alberto Álvarez Peña y Alfoso Fanjul falen de «Los torgues d’Argul (Pezós)», mentes que Manuel Mallo failo de «Les cases soportalaes d’Avilés y les sos “mirilles”», y Javier Cubero publica «Delles consideraciones alredor de Xosé Faes “Capitán de los carlistes, resurreción de Pelayo”».

Na estaya «Memoria gráfica d’Asturies», Francisco Jesús Menéndez Busta y Macario Victorero Cubiella publiquen un reportaxe sobre Llastres, la so identidá y la mar. Inaciu Hevia y Alberto Álvarez Peña analicen les peslleres, maniyes y picaportes en «Artesanía del fierro nes puertes de les cases asturianes» y Gausón Fernande fala de la hermana de Don Pelayo.

Read Full Post »

La Fiesta de la Oficialidá de Bimenes adelanta la fecha y pasa a llamase Romería de la Oficialidá

PABLO R. GUARDADO

La fusión de la Romería Asturiana que tenía llugar en mayu en Bimenes cola Fiesta de la Oficialidá da como resultáu la Romería de la Oficialidá. Nesta primer edición va adelantase al 16 de xunu pa nun coincidir col Festival de la Sidra de Nava.

Pese a esti cambiu nel formatu tradicional de la Fiesta de la Oficialidá de la Llingua Asturiana, qu’esti añu cumpliría dieciséis ediciones, nun se pierde la esencia d’esta folixa que conmemora la declaración d’oficialidá nel conceyu yerbatu –torgada llueu pol Tribunal Constitucional– nel Plenu del 5 de xunetu del 1997, nin tampoco les actividaes más significatives, como la llectura del pregón, qu’esti añu va correr a cargu de la escritora Ana Vanessa Gutiérrez, o’l concursu de gaiteros y gaiteres mozos. D’esta forma, amás del Conceyu de Bimenes, van participar na organización d’esta fiesta los dos coleutivos qu’entamaben la Romería Asturiana, les asociaciones culturales Los Yerbatos y El Corriellu la Pandorga, y el Palaciu del Marqués de Casa Estrada. Con esti cambiu s’espera que les celebraciones garren más puxu.

Read Full Post »

Belenos asoleyó un nuevu númberu de la revista “Asturies”

La Fundación Belenos ta acabante d’asoleyar el númberu 31 de la so revista, “Asturies, memoria encesa d’un país”.

Amás de les estayes habituales, como “L’Estoxu”, “Cartafueyos de Belenos” o “Memoria Gráfica d’Asturies” (nesta ocasión dedicada al conceyu d’El Franco), la espublización recueye los trabayos que vienen darréu: “Una escultura magdaleniense inédita procedente del aviru La Viña, La Mazanea (Uviéu)” (Antonio Juaneda), “Fueu y agua nel orixe de los santuarios castreños: saunes y pedras formosas” (Ángel Villa), “Una posible tésera d’hospitalidá afayada n’Asturies. Les rellaciones d’hospitalidá ente los astures y otros pueblos céltitos” (Jesús F. Torres), “Cordoveiru, una aldea celta con historia” (Fernando Inclán), “Osos, llobos y santos proteutores” (Berto Peña), “Quemes rituales de monigotes: la quema’l xigante y la quema la xana” (Xe M. Sánchez), “Llavaderos na Comarca de la Sidra, Piloña y Siero” (Daniel Cueli) y “Os corrales pra os llobos n’Allande” (César Alonso). La revista yá se pue mercar nes principales llibreríes del país a un preciu de 15 €.

(d’Infoasturies, 27-02-2012)

Read Full Post »

El númberu 7 de ‘N’Ast. Cartafueyos d’ensayu’ yá ta na cai

L’Asociación Cultural N’Ast asoleyó’l númberu 7 de la revista ‘N’Ast. Cartafueyos d’ensayu’. Ésti inclúi un ‘Manifiestu pola documentación hestórica asturiana espoliada’ impulsáu pol coleutivu.

El manifiestu, que tien l’apoyu d’ocho organizaciones, centra esti númberu de los cartafueyos y vien acompañáu de dos entrevistes: a Daniel Cueli, direutor de la revista, y a Javier Cubero, responsable d’organización de N’Ast. Yá na estaya d’ensayos, los llectores van atopar nesti exemplar les firmes de Carlos Blanco, que presenta un artículu sobre Asturies vista a la lluz de los plantegamientos d’Oswald Spengler; de Xuan Porta, con un trabayu sobre l’osu na cultura asturiana; d’Inaciu Galán, nun análisis del papel de les llingües indíxenes y del castellán nos procesos d’independencia d’América del Sur; de Xaviel Vilareyo, que torna tamién a les páxines de la revista con un trabayu toponímicu; d’Isaac G. de la Arada, que presenta un artículu nuevu de calter eminentemente científicu sobre los procesos d’almacenamientu d’hidróxenu; y d’Eduardo Abad, con un trabayu etnográficu sobre la fragua de Fonteta (Ayande). Pa zarrar el númberu, inclúise’l testu del pregón XII Fiesta de la Oficialidá de la Llingua Asturiana en Bimenes (2008) escritu y lleíu por Xuanxo Mariño.

Read Full Post »

Daniel Cueli: “La reivindicación de los drechos llingüísticos vive un momentu de baxa actividá”

INACIU GALÁN

Daniel Cueli ye’l director de la revista “N’ast, cartafueyos d’ensayu”, qu’espubliza l’asociación N’ast. El chigre L’Ayalga de Xixón recibió esti xueves la presentación del so númberu seis. Falamos con él de los conteníos de la revista, del so percorríu y de les actividaes de l’asociación que la edita, amás del momentu que vive’l movimientu de reivindicación llingüística n’Asturies.

Acaben d’espublizar el númberu seis de la so revista “N’Ast. Cartafueyos d’ensayu”, ¿qué conteníos inclúi?.
Los más de los conteníos d’esti númberu xiren al rodiu de la llingua y lliteratura asturianes. Asina, Xuan Porta Allende reflexona sobre la situación llegal de la llingua asturiana anguaño; nuna llinia asemeyada, David Gimeno i Ayuso espón la importancia que tien la oficialidá d’una llingua pa garantizar la so supervivencia; Inaciu Galán y González da a conocer la figura del escritor Antón Forascepi; Xaviel Vilareyo y Villamil ufre’l vocabulariu asturianu emplegáu pol escritor José María de Pereda na so obra lliteraria; y, pa rematar, asoléyase’l pregón de la Fiesta de la Oficialidá de la Llingua Asturiana de 2010, dau por Xulio Elipe Raposo “Xune”. Amás, inclúise un ensayu de calter hestóricu, de Javier Cubero de Vicente, col que viaxamos hasta’l Perú pa conocer el movimientu políticu Alianza Popular Revolucionaria Americana. Creyemos que mos quedó un númberu bien prestosu.

Read Full Post »

Asoléyase un númberu nuevu de los cartafueyos d’ensayu de N’ast

La revista d’investigación Cartafueyos d’ensayu de N’ast asoleya un númberu nuevu, que fai’l sestu na so colección. Nesta ocasión cuéntase con artículos d’autores como Xuan Porta Allende, David Gimeno i Ayuso, Inaciu Galán y González, Xaviel Vilareyo Villamil, Xulio Elipe Raposo “Xune” y Javier Cubero de Vicente. El númberu inclúi artículos sobre investigación lliteraria, drechos llingüísticos y hestoria política, ente otros temes.

Read Full Post »

La Xunta d’Escritores Asturianos falará de nacionalismu y lliteratura

D. Barreiro

La Xunta d’Escritores Asturianos 2010 falará del nacionalismu asturianu y de les relaciones ente la lliteratura, la identidá y la nación nel casu asturianu. Asina, les diverses ponencies contemplarán cómo los aspectos identitarios afecten al fechu d’escribir nuna llingua minorizada y non oficial como l’asturiana frente a otres de más prestixu institucional.

Read Full Post »

Cientos de persones glayaron n’Uviéu pol enseñu afayadizu de la llingua asturiana

La manifestación convocada pola Xunta pola Defensa de la Llingua Asturiana salió pocos minutos dempués de les cinco de la Estación del Norte d’Uviéu percorriendo la cai Uría p’acabar na Plaza d’España, cabo la sede de la Conseyería de Educación y Ciencia. Yá ellí, y frente a les alredor de 600 persones participantes, Paula Cristobal, lleó’l discursu de la organización nel que se denunció la situación de la llingua asturiana nel sistema educativu, que pal colectivu convocante “dexa ver a les clares que la política de promoción llingüística que nos quieren vender ye un fraude”.

Na marcha, abanderada pol gaiteru Llorián García, pudo vese a nomes propios de la política asturiana, como’l diputáu d’IX, Francisco Javier García, el director xeneral de l’Axencia Asturiana de Cooperación al Desenrollu, Rafael Palacios, de Bloque por Asturies, Faustino Zapico, voceru d’Unidá Nacionalista Asturiana y Daniel Cueli, secretariu xeneral d’Andecha Astur, ente otros.

Read Full Post »