Riaño (ALLA) llama a mantener la “unidá” a favor de la oficialidá y reclama afondar nel diálogu col centro-derecha

El presidente de l’Academia de la Llingua Asturiana (ALLA), Xosé Antón González Riaño, reclamó esti vienres mantener la “unidá” a favor de la oficialidá del asturiano y del gallego-asturianu. Amás, insistió na necesidá de buscar la “tresversalidá” y consideró “estratéxicu” el diálogu col centro-derecha.

Así lo indicó Riaño na Xunta Estraordinaria de la institución pol Día de les Lletres Asturianes nel Teatru Filarmónica, onde dixo qu’Asturies precisa d’un “activismu intelixente” a favor de la oficialidá, como’l qu’al so xuiciu representa l’académicu nuevu Inaciu Galán, porque “n’Asturies nun existe lo que tienen otres comunidaes”, en referencia a esti marcu llegal pa les llingües propies.

Read Full Post »

Representantes de seis grupos parllamentarios van participar nun alderique sobre l’asturianu y la reforma del Estatutu

PABLO R. GUARDADO

Álvaro Queipo, Adrián Pumares, Noelia Macías, Daniel Ripa, Ángela Vallina y Luis Armando Fernández Bartolomé aceptaron la invitación d’Iniciativa pol Asturianu pa participar nun alderique de títulu ‘L’asturianu énte la reforma del Estatutu: construyendo’l futuru del idioma’. Ésti va celebrase’l sábadu en Xixón y va poder siguise pela rede.

Tolos grupos parllamentarios van tar representaos nesta cita, cola esceición de VOX, única formación posicionada manifiestamente en contra de les llingües propies d’Asturies. El PP, Foro y Podemos, polos sos secretarios xenerales y parllamentarios, Queipo, Pumares y Ripa, de manera respeutiva, mentes que por parte socialista acude una diputada y miembru de la Executiva, Macías; por Asturies pela Izquierda (IX-IAS) la so vocera na Xunta Xeneral, Vallina; y por Ciudadanos, el diputáu Fernández Bartolomé.

Read Full Post »

“Estos 30 años demuestren que la reivindicación llingüística nun ye una moda; nun vamos parar hasta que se solucione la cuestión”, diz la XDLA

Esti sábadu celébrase en Xixón la trentena edición del Conciertu pola Oficialidá qu’entama la Xunta Pola Defensa de la Llingua Asturiana (XDLA). “Estos 30 años demuestren que la reivindicación llingüística nun ye una moda; nun vamos parar hasta que se solucione la cuestión”, afirmaron Carlos Pulgar y Xune Elipe.

El voceru nacional del coleutivu cívicu y el cantante de Dixebra, de manera respeutiva, entamaron güei una rueda de prensa pa dar a conocer los detalles d’esti festival de música en llingua asturiana retrasáu a la seronda “poles obligaciones del calendariu reivindicativu”,esto ye la organización de les manifestaciones del 21-A y del Día de les Lletres Asturianes, nun momentu nel que la oficialidá ta marcada en collorao na axenda política de toles formaciones parllamentaries. “Hai dos escenarios, ‘Yá’ y ‘Agora’, que lleven esi nome porque la oficialidá tien que llegar yá y agora. Nun se pue depender de les cuestiones internes de los partíos cuando falamos d’un falta d’un derechu demandáu por gran parte de la ciudadanía”, apuntó Pulgar.

Read Full Post »

La XDLA afirma que cualquier reforma del Estatutu tien que llevar “en primer términu” a la oficialidá

El portavoz de la Xunta pola Defensa de la Llingua Asturiana (XDLA), Carlos Pulgar, afirmó que cualquier reforma del Estatutu d’Autonomía “tien que llevar a los derechos que reconoz la oficialidá en primer términu”.

En declaraciones a Europa Press, Pulgar afirmólo asina depués de que’l secretariu xeneral de Podemos Asturies, Daniel Ripa, anunciara esti martes que yera partidariu de treslladar la reivindicación de la eliminación de los aforamientos a Asturies.

Trátase d’una cuestión qu’esixiría la reforma del Estatutu d’Autonomía, polo que’l debate de la eliminación de los aforamientos vuelve a poner na primer llinia del debate políticu la oficialidá.

Read Full Post »

La manifestación pola Oficialidá superó otru añu la lluvia

L’añal manifestación convocada pola Xunta pola Defensa de la Llingua (XPDL) percorrió esti vienres el centru d’Uviéu embaxo una lluvia que nun torgó que la sociedá civil asturiana reclamará la oficialidá de la Llingua.

Coincidiendo como siempres col Día de Les Lletres y una hora primero de qu’entamara l’actu institucional de l’Academia de la Llingua nel Tearu Campoamor, la XPDL convocó a la sociedá asturiano col sofitu d’Iniciativa pol Asturianu y delles otres asociacions cíviques y de los sindicatos y d’Izquierda Xunida, Podemos y Andecha Astur como cimeres formaciones polítiques favoratibles a la normalización.

Read Full Post »

“El procesu de recuperación llingüística ye irreversible”, asegura Cano

PABLO R. GUARDADO

La presidenta de l’ALLA, Ana María Cano, amosóse crítica nel so discursu pol XXXVII Día de les Lletres Asturianes contra aquellos que reprimen a la llingua asturiana, pero recordó que “el procesu de recuperación llingüística ye irreversible”. Anunció la creación del Premiu Nacional de Lliteratura Asturiana, de calter triañal.

El Teatru Campoamor acoyó un añu más l’actu institucional de l’Academia de la Llingua Asturiana (ALLA), qu’esti añu contó cola actuación del grupu de rock en gallego-asturiano Bacotexo, llingua na que Cano comenzó’l so discursu. Asina, tres saludar a los presentes, destacó que “el Academia entende a Asturias non como úa mera entidá alministrativa, sinón como un país que configura úa realidá histórica integral. Esta consideración é importante porque lleva ben axina a que os graves problemas cos que cargamos todos os asturianos y asturianas (económicos, sociales y culturales) teñan que ser encaraos dende úa perspeutiva política, de política asturiana, y non dende plantiamentos esclusivamente ‘téunicos’ o ‘alministrativos’”.

Read Full Post »

PP, PSOE y C’s torguen otra vuelta l’usu del asturianu na Xunta Xeneral

Si daquién tenía dalguna duda, la xunta de portavoces resolviérala esti llunes 15 cuando’l PSOE y Ciudadanos xuníense al PP pa torgar otra vuelta usar l’asturianu na Xunta Xeneral, nesti casu pa convocar una comisión pa falar del idioma, amosando que namái la oficialidá pue igual el problema y que la llei d’usu ye papel moyao.

Nun fizo falta más que sentir al PP con dir a los tribunales pa que Fernando Lastra, en nome del PSOE, camudara les sos pallabres y la so opinión de la selmana pasada pa torgar el pasu al asturianu: de nun paece-y mal que s’emplegara l’asturianu nes convocartories de la “Comisión non permanente d’estudiu sobre’l réxime de protección y promoción del asturianu” a camentar que como la llingua nun se contempla nel reglamentu de la Xunta nun se puen “buscar subterfugios” pa favorecer lo que nun s’alcuentra regulao. En principiu, la Llei d’Usu obligaría a que se regule, pero paez que ta meyor ensin regular, pa poer emplegar esa disculpa siempre que-y pruya al PSOE o al PP.

Read Full Post »

Cano plantega a les fuercies polítiques un procesu d’oficialización “axustáu a les necesidaes d’Asturies” nel que l’ALLA actuaría de moderador

“¿Daquién con xacíu pue dexar pasar esta oportunidá y refugar esta ufierta?” entrugóse Ana María Cano, presidenta de l’ALLA, nel actu académicu del XXXVI Día de les Lletres Asturianes depués d’ufrir a los partíos moderar un procesu d’oficialización de l’asturianu “axustáu a les necesidaes d’Asturies”. Enantes, alredor de 3.000 persones pidieron la oficialidá peles cais d’Uviéu.

La coincidencia de la xornada col entamu de la campaña eleutoral pa les Nacionales y municipales del 24 de mayu condicionó’l discursu institucional de Cano que, tres emponderar el llabor de la Xunta pola Defensa de la Llingua Asturiana (XDLA) –coleutivu que recibió un reconocimientu por parte de l’Academia de la Llingua Asturiana (ALLA)– y facer un repás al llabor académicu nestos doce meses últimos, refirióse a esta cita coles urnes como “una oportunidá pa la llingua asturiana”. “En 15 díes, el 24 de mayu, celébrense les eleiciones pa escoyer la composición de la Xunta Xeneral del Principáu y, darréu d’ello, el Gobiernu d’Asturies. Y ye equí onde se xuega’l futuru del asturianu porque, a lo cabero y práuticamente, ye’l parllamentu asturianu, y non otres instancies europees o estatales, el que decide qué facer cola llingua hestórica d’Asturies”, señaló.

Read Full Post »