La UABRA repite’l formatu virtual na edición del 2022

PABLO R. GUARDADO

Tampoco nun va haber clases presenciales na Universidá Asturiana de Branu (UABRA) d’esti añu. La duodécima edición d’esta iniciativa entamada pola Academia de la Llingua Asturiana (ALLA) y la Universidá d’Uviéu va desendolcase en llinia, al igual que l’añu pasáu, nes dos selmanes últimes de xunetu cola ufierta habitual.

El ‘Cursu Elemental de Llingua Asturiana’ y el ‘Cursu Avanzáu de Llingua Asturiana’ van ponese del 18 al 29 del séptimu mes del añu pa sumar un total de 50 hores llectives. Con 25 y 35 places disponibles, de manera respeutiva, y un costu de 160 euros, son los dos clásicos de los cursos de l’ALLA y cuenten cola direición académica de Gonzalo Llameda, col sofitu de Roberto Avello, y Margarita Fernández Mier.

Read Full Post »

“Nun tenemos que mirar el coste de la oficialidá, sinón el coste de nun tener la oficialidá”, apunta Alba

PABLO R. GUARDADO

La Sala Constitución de la Xunta Xeneral acoyó la tercer sesión de les comparencies informatives de la Comisión Especial d’Estudiu sobre’l Réxime de Proteición y Promoción del Asturianu. Nesta ocasión participaron los profesores universitarios Isabel Hevia, José Alba, David Melendi, Pedro Suárez Rodríguez y Enrique del Teso.

La xornada desendolcóse cola ausencia de representantes de Ciudadanos y Foro, y cola baxa d’Eva García Vázquez, caderalga de Xenética de la Universidá d’Uviéu, que nun pudo acudir al recibir tarde la notificación de la comisión, polo que solicitó comparecer n’otra fecha. El papel del asturianu na Educación y la so presencia na universidá y nos campos nos que yeren especialistes los convidaos centraron les intervenciones y alderiques, anque les dos hores llargues de sesión dio p’afondar n’otres árees, siempre cola oficialidá de fondu.

Read Full Post »

La Comisión sobre l’asturianu concreta’l llistáu de comparecientes na sesión prevista na Xunta Xeneral

PABLO R. GUARDADO

Políticos, espertos y profesionales venceyaos cola llingua asturiana y otros idiomes, como’l gallegu y el catalán, van participar na Xunta Xeneral na Comisión sobre l’asturianu pa dar la so visión. Asturies.com ufre la llista completa.

La Comisión Especial d’Estudio sobre’l Réxime de Proteición y Promoción del Asturianu, qu’oficialimente tien el nome en castellanu y que nun emplega l’idioma pol vetu fechu pol Partido Popular (PP), busca con estes intervenciones conocer la opiniones y esperiencia d’espertos y profesionales venceyaos cola llingua asturiana y otros idiomes asemeyaos cola fin d’ellaborar una conclusión que sirva pa la redaición definitiva del Plan de Dignificiación del Asturianu. Estes intervenciones van celebrase na Xunta Xeneral nuna fecha entovía por concretar.

Read Full Post »

La UABRA abre les sos puertes

PABLO R. GUARDADO

Dende esti llunes y hasta’l 14 d’agostu más d’un centenar de persones participen nos cursos qu’entama l’Academia de la Llingua Asturiana (ALLA) en Cangas del Narcea en collaboración col Conceyu y la Universidá d’Uviéu.

Esta mañana inauguróse de manera oficial la sesta edición de la Universidá Asturiana de Branu (UABRA), actu nel que tuvo presente la direutora nueva de los cursos, la decana de la Facultá de Filosofía y Lletres María Cristina Valdés; la presidenta de l’ALLA, Ana María Cano; la direutora xeneral de Política Llingüística, Ana María Fueyo; l’alcalde del Conceyu de Cangas del Narcea, José Víctor Rodríguez; y el vicerrector d’Estensión Universitaria de la Univesidá d’Uviéu, Vicente Domínguez. El llugar escoyíu foi la Casa Cultura de Cangas del Narcea.

Read Full Post »

Del Teso vería un error que l’asturianu normativu basárase nel amestáu y non n’elementos autóctonos

El filólogu de la Universidá d’Uviéu, Enrique del Teso, xustificó esti llunes que la construcción de la normativa de la ‘llingua’ asturiana se base n’elementos autóctonos propios, anque tean quedando en desusu, y non na fala popular del ‘amestáu’. Vería un error que fuera al contrario porque, al so xuiciu, entainaría’l procesu de desapaición del asturianu.

Del Teso protagonizó una de les ponenecias de la primer xornada de les ‘Xornaes Internacionales d’Estudiu’, qu’entama l’Academia de la Llingua na Universidá d’Uviéu.

Read Full Post »

Entamen los Cursos de la Universidá Asturiana de Branu (UABRA)

Esti próximu llunes 28 de xunetu, a les 13 hores, nel Salón d’Actos de la Casa de la Cultura «Palaciu d’Omaña» de Cangas del Narcea, entamen los Cursos y les Actividaes Abiertes de la Universidá Asturiana de Branu (UABRA): proyeutu lleváu a cabu gracies a la collaboración ente l’Academia de la Llingua Asturiana, la Universidá d’Uviéu y el Conceyu de Cangas del Narcea.

Nel actu intervendrán el Vicerrector d’Estensión Universitaria y Comunicación de la Universidá d’Uviéu, Vicente Domínguez García; l’Alcalde del Conceyu de Cangas del Narcea, José Luis Fontaniella Fernández y el Direutor de los Cursos, Xosé Antón González Riaño.

Los Cursos y xeres complementaries desendolcaránse ente los díes 28 de xunetu y 8 d’agostu y nellos van participar más d’un centenar de persones.

Read Full Post »

L’Academia celebra’l sábadu la prueba de conocencia de mayu

PABLO R. GUARDADO

Esti xueves ye’l día caberu pa formalizar la matrícula pa la prueba de conocencia de mayu de l’ALLA, que ve tener llugar esti sábadu na Escuela d’Inxeniería Informática. Otra manera, yá ta abiertu’l plazu d’inscripción pa la UABRA.

“L’Academia de la Llingua Asturiana, sabiendo’l fondu interés de munches persones de llograr que se reconoza la so conocencia de la llingua y manifestar asina’l so fondu amor al idioma asturianu”, ta acabante d’abrir la matrícula del segundu de los dos esámenes que celebra tolos años –el primeru ye en xineru–, que sirve pa que les persones interesaes puedan algamar el documentu qu’afita la so conocencia d’asturianu nel nivel 1 o básicu. Pa ello han d’amosar un dominiu tanto de les normes llingüístiques como de la situación actual del idioma y del procesu de normalización nel que ta inxertu.

Read Full Post »

Abrese la matrícula nos Cursos de Branu d’Uniovi y la UABRA

Como cada añu, el Vicerrectorado d’Estensión Universitaria y Comunicación publica la so ufierta de Cursos de Branu, coles mires de proxectar la conocencia a la sociedá asturiana y dientro d’ellos los cursos de la Universidá Asturiana de Branu de l’Academia de la Llingua (UABRA) que se celebren en Cangas del 28 de xunetu al 8 d’agostu. Esti añu hai convocaos, amás de los cursos elemental y avanzáu, el cursu de capacitación pala traducción, unu d’ecoloxía y otru sobre l’emplegu didáuticu d’Internet.

El curus básicu de llingua asturiana inclúi, con 60 hores llectives, un repás peles Normes ortografiques, la sociollingüística aplicada al casu asturianu, exercicios escritos, situaciones comunicatives escrites y orales, y un averamientu a la Lliteratura Asturiana.

Read Full Post »

Nueva entrega d’una revista clásica

ANTÓN GARCÏA

Con más de trenta años de publicación ininterrumpida, poques duldes caben de que la revista Lletres Asturianes, de l’Academia de la Llingua Asturiana, ye una referencia de primer orde nos estudios asturianos. Nesti númberu 109 atopamos variedá de conteníos. Empezando pel final, fai alcordanza de tres persones relevantes de la cultura asturiana fallecíes recientemente: Miguel Ramos Corrada, Martín Sevilla (del qu’amás s’ofrez una colaboración) y Joaquín Fernández. Recueye tamién les intervenciones de la xunta estraordinaria que celebró la institución nel teatru Campoamor en mayu, onde s’acoyó al académicu correspondiente David Melendi. La sección de “Reseñes bibliográfiques” namás publica una. Los “Trabayos d’investigación” ocupen el cuerpu principal de la revista, destacando un trabayu comparativu d’entonación asturiana de Carmen Muñiz (onde se dexa ver de qué manera “canta” l’acentu de Mieres ente les llingües romániques), estudios sobre apellíos asturianos d’Ana Cano, sobre refranes meteorolóxicos de Xosé Alfonso Álvarez, y sobre toponimia de Canarias de Carmen Díaz Alayón. Pilar Fidalgo recueye dellos poemes n’asturianu d’un álbum publicáu en 1906 na apertura del teatru Celso n’Uviéu; Emilio Frechilla echa una güeyada a la novela negra asturiana de güei, y José Álvarez Alba identifica ónde taba la malatería d’Almurfe nel conceyu de Miranda.

Read Full Post »

Los creadores culturales mozos analizaron los sos ámbitos de trabayu nel congresu celebráu n’Uviéu

PABLO R. GUARDADO

El Congresu Cultura Asturiana Mozo resultó una perbona ferramienta pa conocer el llabor que se ta faciendo n’Asturies en delles estayes y les mires de los creadores culturales. Éstos foron los protagonistes d’una xornada “que foi un ésitu”.

Con estes pallabres finó Xuan Xosé Sánchez Vicente un congresu que podría tener continuidá n’años vinientes, dalgo que se decidirá nunos dos o trés meses. Ésti ye’l tiempu que van tomar los impulsores d’esta iniciativa, la Fundación Nueva Asturies y l’Asociación Cultural L’Arribada, y los coordinadores de toles estayes pa madurar la esperiencia d’esti primer Congresu Cultura Asturiana Mozo y convocar un conceyu nel que valorar la conveniencia o non de celebrar ediciones nueves.

Read Full Post »