Rafa R. Valdés: «La traducción nun ye ferramienta d’aisllamientu sinón de diálogu con otros pueblos»

Rafael Rodríguez Valdes (Uviéu, 1978) ye historiador y director de la colección de torna «Calume», d’Ediciones Trabe. Tien publicao «Discursos llingüísticos y movimientu obreru na Asturies decimonónica» (Trabe, 2009) y «Llingua asturiana y movimientu obreru (1899-1937)» (Atenéu Obreru de Xixón).

Güei en Formientu falamos con él de la so trayectoria dirixiendo un llabor importante pa la lliteratura n’asturianu, la colección Calume.

¿Por qué se dio’l títulu de Calume a la colección de tornes?

El calume ye’l caláu de la mar y esi significáu y conteníu de fondura quier treslladase a esta colección dedicada a la traducción que publica Ediciones Trabe. Fondura estética y lliteraria, fondura pa lo que fai a la diversidá y a la pluralidá de los títulos, de los xéneros, de les temátiques y de los y les traductores que faigan parte de la colección, fondura pa lo que fai al trabayu de traducción, corrección y edición de les obres, fondura porque’l camín que tenemos per delantre ye lentu y llargu.

Read Full Post »

Formientu celebra 15 años de lliteratura mui moza en La Revoltosa

15 años pasaron yá dende que Formientu, la revista lliteraria n’asturianu pa xente mozo, entamara la so andadura. A lo llargo d’estos años pasaron dellos y delles autores qu’agora formen parte de la hestoria de la lliteratura y qu’entamaron les sos publicaciones en dalgún de los 18 númberos que Formientu tien espublizaos.

Pa celebrar esti decimoquintu aniversariu, Formientu va facer un alcuentru en La Revoltosa (Cai Juan Alonso, 12, Xixón), un abellugu lliterariu y d’ociu que tamién ta d’aniversariu, pues yá fai 9 años dende qu’abrieren les sos puertes.

Read Full Post »

Diego Solís: «Volvemos en 6 minutos ye una reivindicación de lo pop, de lo efímero»

Diego Solís (Xixón 1991) ye ún de los poetes más destacaos de la última xeneración d’escritores asturianos. Ganador del Asturias Joven de Poesía en 2018, tien escrito tanto n’asturianu como en castellán y asoleyaos bien de poemarios como Hágase abril (Ruleta rusa), Cállanos con esa música (Impronta) o Y el mundu marcha (Saltadera). Amás,dirixe’l programa La cla invisible de Play Presta. Xunto a ello, co-dirixe Formientu y fundó Fame Poétika, grupu col qu’organizó bien de timbes poétiques en dellos puntos d’Asturies.

Güei, el poeta xixonés siéntase con nós pa charrar del so proyectu nuevu, Volvemos en 6 minutos, onde axunta poesía, imaxe y soníu nun solu llibru.

Codirixes Formientu y tuvisti presente en les timbes poétiques de Fame mientres bien d’años. Ello ye, tas pronto de la poesía siempres. ¿Cómo foi cambiando nestos últimos años esti xéneru?

Va unos años hebo un “boom” de poesía en directu que, magar de que sigue teniendo ciertu tirón, yá nun ye lo que yera. Esto pudo afectar na poesía que se fixo, anque yo reconozo que poca de la poesía pensada pal directu espublicé en papel posteriormente; igual el poema “Manques” precisamente asoleyáu nesta revista y poco más. Agora creo qu’hai una vuelta al llibru físicu como talu. Puede que tamién eso influya y cada vez haya menos poesía prosificada y pensada pal recitáu públicu. Creo que sigue asentáu l’usu del versu llibre y que’l llector busca ediciones guapes y cuidaes. En “Volvemos en 6 minutos” al menos aposté por esa llínia d’una manera mui radical, anque en directu les veces que recité dalgún funcionó mui bien pol tonu autoparódicu que tien el llibru. Seya como fuere, too sirve y de toos se puede deprender, yo siempre respeté a toles propuestes que son a llegar a la xente.

Read Full Post »

“Vamos trabayar pa que’l máximu de partíos lleven la oficialidá nel programa eleutoral y de manera clara”, avanza Llera

PABLO R. GUARDADO 

El sábadu celebróse nel salón d’actos del Conseyu de la Mocedá de Xixón el IV Congresu y Xunta Xeneral d’Iniciativa pol Asturianu. Iván Llera, presidente del coleutivu dende’l 2019, presentóse a la reeleición, algamando’l sofitu de les socies y socios, p’afrontar con una xunta direutiva anovada y paritaria 3 años más nos que la reforma del Estatutu y la oficialidá van tornar a ocupar l’axenda política.

“El principal oxetivu que nos marcamos pa esti tiempu son les eleiciones muncipales y autonómiques. Vamos trabayar pa que’l máximu de partíu lleven la oficialidá nos sos programes electorales, y de manera clara, pa consiguir esa mayoría necesaria pa poder reformar l’Estatutu d’Autonomía”, asegura’l periodista xixonés, que relevara nel cargu a Inaciu Galán, primer presidente d’Iniciativa pol Asturianu, que va siguir na xunta direutiva como vocal.

Read Full Post »

Anibal González: “estos años tan duros paez qu’emburriaron a muncha xente a producir”

Aníbal González (Morea, Ayer, 1991 ta acabante d’asoleyar con Ediciones Trabe “Anatomía d’un Farfagón”, poemariu col qu’algamó’l premiu Asturies Xoven de Poesía 2021. El poemariu, ye, amás, el primer llibru asoleyáu por esti “Millennial” que reconoz que foi l’Andanciu’l que lu fixo volver a escribir. En Refuelgu! quiximos aprovechar la ocasión p’afondar con él nel procesu d’escritura, en cómo ta viendo les lletres asturianes actuales y, cómo non, en que mos desplicare un poco más qué ye lo que va atopar el llector n’ “anatomía d’un Farfagón”

¿Qué va atopar el llector n’“Anatomía d’un Farfagón”?

Pa min ye un esperimentu. Son 30 pieces bastante variaes, pero que tán articulaes col envís d’emburriar a reflexonar a quien les llea. Ye lliteratura cenciello, o pretende selo, anque haya dalguna referencia más específica.

Lo del farfagón o forfagón o forfogón o forfogón o… a ver, paisanos míos del alma, entendémonos anque camudemos les vocales. Y l’anatomía, pues porque rondábame’l títulu “Autopsia d’un farfagón”, d’un poema qu’escribí hai tiempu… El poema yera horrible, pero’l conceptu paicíame interesante y quixi emplegalu de títulu pal poemariu, pero cuando lu mandé a concursu veníamos del branu y foi un branu guapu pa min, asina que nun podía ser una autopsia yá. Había vida…

Anatomía, mui llibremente, porque ye investigar la fondigonada como forma de vida, y esi enunciáu pue lleese de munches formes: tien un aspectu tanto xeográficu, hestóricu, políticu… como tamién sicolóxicu (quiciás sobre too sicolóxicu).

Read Full Post »

Diego Solís abre un crowfounding p’asoleyar “Volvemos en 6 minutos”

‘Volvemos en 6 minutos’ ye un llibru de poemes que s’inspira na publicidá, les redes sociales y el cine o la música pop. Nel llibru cada poema va llevar asociáu un códigu QR onde les composiciones poétiques van poder sentise recitaes pol autor. Amás cunta coles ilustraciones de la diseñadora gráfica Ines H. qu’acompañen estos poemes y distintos productos que van de camisetes o tote bags a taces o llámines que formen parte del propiu proyectu tanto como la propia poesía.

Pa sofitar esti proyectu y algamar que salga alantre fai falta acutar cualquiera de los productos al traviés de la plataforma Verkami. Toes elles inclúin apaecer nos agradecimientos del llibru una vez s’asoleye. Y nel casu de los pidíos del llibru en formatu físicu, toos ellos dirán firmaos y dedicaos pol autor y creador d’esti proyectu anovador pa la lliteratura asturiana.

ENLLAZ: Verkami “Volvemos en 6 minutos”.

(d’InfoAsturies, 22-02-2022)

Read Full Post »

Testos infantiles y xuveniles protagonicen el númberu 36 de «Lliteratura»

L’Academia de la Llingua Asturiana vien d’asoleyar el númberu 36 de la revista Lliteratura. Revista lliteraria asturiana correspondiente al añu 2020. Nesti númberu, de 173 páxines, baxo la direición de la escritora y académica Marta Mori, atópense dos estayes de la revista claramente definíes y que bien podríen iguar dos númberos perfectamente dixebraos: una primer estaya especial dedicada a la Lliteratura Infantil y Xuvenil (LLIX) y una segunda estaya que coincide colos conteníos habituales de la revista.

A lo llargo de les sos páxines combínase la creación lliteraria, l’ensayu y la crítica, y les voces nueves apaecen xunto a voces yá consagraes. «Esti exemplar pue valir al empar d’amuesa del llabor lliterariu de güei y como material pal aula no que cinca a la Lliteratura Infantil y Xuvenil», espliquen na academia. 

Read Full Post »

Gonzalo Llamedo: «Nun aparco la escritura, pero nesti momentu soi incapaz de proyectar nada»

Gonzalo Llamedo Pandiella ye anguaño Profesor de Filoloxía Románica na Universidá d’Uviéu, llabor que compaxina col programa de Doctoráu n’Investigaciones Humanístiques. La escritura creativa ye una afición constante na so vida. Nos años 2003 y 2006 ye finalista de los V y VIII Concursos de Rellatu Comarca de la Sidra y, en 2004, tercer finalista d’Asturies nel 44 Concurso Nacional de Redacción de la Fundación Coca-Cola España. Más adultu, en 2016 y en 2017 asoleya dos microrrellatos pal Colectivu “Diversidad Literaria”. No cabero del 2018, estrénase cola escritura en llingua asturiana, resultando en 2019 ganador del II Concursu de Microrrellatos Luisa Rebollar de Sariegu y finalista nel VI Concursu de Microrrellatos La Voz del Barrio de Xixón. En 2020, collabora nel númberu 36 de la Revista Lliteratura y gana’l I Concursu #andanciulliterariu en Twitter d’Iniciativa pol Asturianu y el V Concursu de microrrellatos improvisaos n’asturianu pa la xente mozo Entaína a escribir.

Pocos díes dempués de tener ganao’l concursu Entaína a escribir, Diego Solís fala con él nesta entrevista que vos ufrimos.

¿Cuándo entamesti a escribir? 

Creo qu’escribo dende que tengo usu de razón. La primer vez que participé nun concursu de rellatos curtios tenía once años. Préstame dende siempre, la escritura lleva acompañándome en toles fases de la vida, como una llinia de fuga que m’abre un ventanu cuando alcuentro namái paré.

Read Full Post »

I Concursu de guión de curtiumetraxe “Formientu”

La plataforma lliteraria Formientu.com, en collaboración con Algamar Producciones y Cuatro Gotes Producciones convoca’l I Concursu de guión de curtiumetraxe “Formientu” coles bases que van darréu:

Bases

1.- El guión va ser orixinal ya inéditu, esto ye, nun pudo ser lleváu a la pantalla nel momentu de presentase al concursu.

2.- El tema escoyíu va ser llibre y tendrá de tar escritu n’asturianu o gallego-asturianu.

Read Full Post »

Arranca’l #FormientuEnCasaFest, con actividaes diaries alredor de la cultura asturiana dende casa

La plataforma lliteraria Formientu.com pon en marcha estos díes y coincidiendo cola aisllamientu de la población pola mor del andanciu de coronavirus, un ciclu cultural embaxo’l títulu #FormientuEnCasaFest. La idea d’esti festival virtual ye ufrir a la xente actividaes lliteraries y culturales que valgan pa face-yos pasar el tiempu d’esti enzarru nes cases y poner en valir la importancia de la cultura asturiana y la llingua asturiana nun momentu como esti.

El festival tien previstes actividaes dende esti miércoles 18 y hasta’l llunes 30 de marzu, anque la idea ye siguir ampliando programación mientres dure la cuarentena nes cases y en función del ésitu de la convocatoria. Les actividaes van facese al traviés de cámara web y en directo dende les cases de los protagonistes de cada actividá,

Read Full Post »