El Proyectu Fernán-Coronas va ordenar nos próximos 3 años la obra del autor repartida en dellos fondos privaos

PABLO R. GUARDADO

El Padre Galo nun espublizó en vida llibru nengún, cola so obra repartida en dellos fondos, la mayor parte d’ellos privaos. Cola fin de recuperar y ordenar esi importante legáu naz el Proyectu Fernán-Coronas, collaboración público-privada pa, nos 3 años próximos, inventariar, clasificar, trescribir y editar l’archivu del escritor de Cadavéu.

La Direición Xeneral de Política Llingüística y la Fundación Valdés-Salas van pilotar esta iniciativa que va contar cola collaboración de la Universidá d’Uviéu. Antón García, el presidente Joaquín Lorences y el profesor universitariu y responsable académicu del proyectu Xulio Viejo, detallaron esta mañana n’Uviéu los puntos principales del mesmu.

Read Full Post »

Un informativu radiofónicu n’asturianu, trabayu prácticu del cursu de llingua pa periodistes

La Dirección Xeneral de Política Llingüística publicó’l proyectu d’informativu en llingua asturiana que realizaron los periodistes de RTPA participantes nel nivel avanzáu del cursu d’asturianu, que l’ente públicu entamó agora poco.

El documentu ta yá disponible na rede. Nun s’emitió en RPA porque se trata d’un supuestu prácticu. Ye un informativu de 15 minutos nel que se fala, ente otres temes, del Plan Xeneral d’Ordenación Urbana de Xixón, de la deuda de Soxepsa, de la situación de Sedes o de los partíos que-y queden al Real Uviéu p’acabar l’actual temporada.

Nel cursu participaron 50 profesional, que s’impartieron llecciones de gramática, sociollingüística, llexislación y alministración. Tamién hubo un bloque destináu a la ellaboración, con supuestos reales, de programes informativos nos que va utilizase l’asturianu como llingua vehicular.

L’oxetivu del cursu yera capacitar al alumnáu pa preparar, acordies col so perfil, un informativu n’asturianu pa radiu o televisión.

ANEXU: Programa realizáu polos periodistes del cursu.

(d’Europa Press, 04-06-2016)

Read Full Post »

Convócase’l Premiu Alfonso Iglesias de Cómic

Nel Boletín Oficial del Principáu d’Asturies del 10 de setiembre del 2015 publícase la convocatoria del Premiu «Alfonso Iglesias» de Cómic. Con ésti yá tán convocaos tolos premios lliterarios n’asturianu qu’entama la Conseyería d’Educación y Cultura.

El plazu de presentación d’orixinales acaba’l 10 d’ochobre del 2015.

ANEXU 1: Resolución de 18 d’agostu del 2015, de la Conseyería d’Educación y Cultura, pola que se convoca’l premiu «Alfonso Iglesias» de Cómic en llingua asturiana.
ANEXU 2: Resolución de 23 de xunetu del 2015, de la Conseyería d’Educación, Cultura y Deporte, pola que s’aprueba la primer modificación de les bases de los premios «Xosefa Xovellanos» de Novela, «Xuan M.ª Acebal» de Poesía, «Máximo Fuertes Acevedo» d’Ensayu, «María Josefa Canellada» de Lliteratura Infantil/Xuvenil y «Alfonso Iglesias» de Cómic en llingua asturiana.

(de la Dirección Xeneral de Política Llingüística, 10-09-2015)

Read Full Post »

La XDLA pide a TPA y a Política Llingüística que se festexe la Selmana de les Lletres emitiendo una película d’animación n’asturianu

Hai díes, el Gobiernu d’Asturies anunciaba que la XXXV Selmana de les Lletres Asturianes diba tar dedicada al cómic n’asturianu. A la Xunta pola Defensa de la Llingua Asturiana (XDLA) paez-y una bona decisión: el cómic ye un xéneru que val p’averar la llingua propia a les xeneraciones más moces. Por eso, como añadíu a la programación de la Selmana, la XDLA propón a la Dirección Xeneral de Política Llingüística y a TPA que collaboren nel doblaxe al asturianu de dalguna película d’animación protagonizada por un personaxe de cómic. Por exemplu, les televisiones agrupaes na organización FORTA, ente les que ta TPA, tienen los derechos d’emisión de les siete películes d’animación que protagonizó Ásterix y que se reponen cada poco con bien bona acoyida ente los neños y los non tan neños. Hai que recordar l’éxitu ensin precedentes que tuvo la publicación n’asturianu d’Astérix na tierra de los pictos, que vendió en pocos meses más de 2.000 exemplares.

Read Full Post »

Yá ta disponible l’Axenda Didáctica Escolar d’actividaes n’asturianu

La Conseyería d’Educación, Cultura y Deporte, al traviés de la Dirección Xeneral de Política Llingüística, organiza, en collaboración cola Asesoría d’Enseñances de Llingua Asturiana y siguiendo coles iniciatives d’usu, promoción llingüística y apoyu al llabor educativu, l’Axenda Didáctica Escolar.

L’oxetivu ye averar la lliteratura, el teatru y la música asturiana al públicu más mozu de la mano d’escritores, actores y músicos de l’actualidá asturiana. Toes estes actividaes, unes n’asturianu y otres en gallego-asturianu, van dirixíes a los alumnos y alumnes de los centros educativos d’Educación Primaria, Secundaria y Bachiller nos que simparte Llingua Asturiana o Gallego-Asturianu.

Pa la participación de les entidaes y de los centros educativos establécense unes normes que pueden consultase na web de la Conseyería.

ANEXU: Documentos pa participar y ufierta

(d’Asturnews, 07-02-2013)

Read Full Post »

El Gobiernu diz que quier potenciar la enseñanza d’asturianu, mesmamente n’Infantil

La directora xeneral de Política Llingüística, Ana María Fueyo, destacó esti llunes 24 de setiembre en Xixón qu’existe demanda d’enseñanza de llingua asturiana nos centros escolares, como lo demuestra qu’esti cursu haya cuatro escueles más nel Occidente qu’impartan l’asignatura. Amás, quieren potenciar la enseñanza en tolos ciclos educativos, imesmamente n’infantil al traviés de proyectos nuevos que puedan surdir.

Fueyo, en respuesta a los medios enantes de la inauguración de la XIII esposición filatélica Exfiastur 2012 nel Centru de Cultura Antiguu Institutu, incidió en que’l tema de la disposición de profesores pa impartir esa enseñanza yá ta «prácticamente finiquitáu», anque reconoció que queden «dellos flequinos» por arreglar. Coles mesmes afirmó que, polo xeneral, tán los profesores de llingua asturiana yá nel so puestu.

Read Full Post »

Un dictame asegura que nun hai impedimentos xurídicos pa crear la especialidá d’Asturianu

Un informe xurídicu encargáu poles conseyeríes de Cultura y Deporte y Educación y Universidaes afirma que «nun existiría impedimentu xurídicu insalvable pa que’l Principáu d’Asturies, en tando afitada nel currículu pa la Educación Primaria y Secundaria la especialidá de Llingua asturiana, creara, al traviés de les relaciones de puestos de trabayu de personal docente, puestos destinaos a impartir llingua asturiana». Esta ye la conclusión del informe Prospección de nuevas vías jurídicas para la incorporación a plantillas específicas funcionariales de los profesores de asturiano y dignificación y homologación de su situación docente, que los profesores Leopoldo Tolivar Alas y Miriam Cueto Pérez entregaron al director general de Política Llingüística, Alfredo Álvarez.

El dictame ye concluyente sobre la viabilidá tanto de la creación de la especialidá en Llingua Asturiana nel currículu de la Educación Primaria y Secundaria como del desarrollu de una plantiya docente específica pa impartir l’asignatura. Pa ello, contempla tres víes de solución, ente les que l’informe califica como «la más deseable»’l reconocimientu de la especialidá mediante la reforma del artículu 2 del RD 1594/2011 y del RD 1834/2008 (pa la educación secundaria). Nesti casu, habría qu’incluir, xunto a la referencia a les llingües oficiales, tamién la de les llingües minoritaries que sían oxetu de protección especial polrs Comunidaes Autónomes.

Read Full Post »

Iniciativa pol Asturianu reclama l’usu de la toponimia oficial en La Vuelta a Asturies

Iniciativa pol Asturianu ta acabante ponese en contactu cola dirección de La Vuelta a Asturies 2012 pa reclama-yos qu’usen la toponimia oficial nos materiales, páxina web, etc. de la hestórica prueba ciclista asturiana. Dende Iniciativa pol Asturianu nun podemos tar tan contentos del usu que se ta faciendo na vuelta de la cuestión llingüística. Iniciativa pol Asturianu púnxose tamién en contactu cola Dirección Xeneral de Política Llingüística del Gobiernu d’Asturies, patrocinador del eventu, pa que faiga cumplir la normativa no que cinca al usu toponímicu.

Read Full Post »

El Gobiernu d’Asturies va financiar un serviciu de normalización pa Illas y Castrillón

Los alcaldes de los conceyos d’Illas y Castrillón, Ángela Vallina y Alberto Tirador, llegaron ayeri a un alcuerdu col Gobiernu d’Asturies, al traviés del director xeneral de Política Llingüística, Alfredo Álvarez, pa que l’alministración autonómica financie un serviciu de normalización llingüística conxuntu pa los ciudadanos de dambos conceyos.

Un persona tará al cargu d’esti serviu encargándose de los llabores de traducción, creación de campañes y asesoramientu a les dos alministraciones a les que va tar vecenyáu.

(d’Asturnews, 23-03-2012)

Read Full Post »

Aprobada la firma d’un conveniu de collaboración col Aula de las Metáforas

El Conseyu de Gobiernu del Principáu d’Asturies, na so xunta de 1 de marzu de 2012, autorizó la formalización d’un conveniu ente la Conseyería de Cultura y Deporte y la Fundación Aula de las Metáforas pa la creación y el desenvolvimientu de la Biblioteca de Poesía Asturiana. La puesta en marcha d’una Biblioteca de Poesía Asturiana qu’axunte tolos títulos publicaos en dicha llingua nel senu de la Fundación Aula de las Metáforas, asina como les actividaes d’espardimientu tantu n’Asturies como nes sos árees d’influencia, va contribuyir a la meyor conocencia y apreciu de la poesía asturiana, a la so ordenada contextualización nel ámbitu de la creación poética actual y a la meyor promoción y puesta en valor de la poesía y los poetes en llingua asturiana, oxetivos toos ellos del Gobiernu d’Asturies al traviés de la so Dirección Xeneral de Política Llingüística.

Read Full Post »