El Garrapiellu, una asociación del movimientu vecinal xixonés, vien dende hai más de venti años desenvolviendo acciones en favor de la cultura asturiana. Dos de los sos miembros, el pintor Ánxel Nava y l’activista Sixto Armán, asistieron esta selmana pasada a un interesante congresu, amparáu pola Unesco, sobre la defensa del patrimoniu material y inmaterial. Falamos con Sixto Armán de la experiencia, que califica de mui bona y fructífera, al tiempu que comenta les posibilidaes de trabayu que s’abren a partir d’agora de cara al Congresu de Tokio que se va celebrar, col mesmu tema, l’añu veniente.
¿Cómo foi l’atopada de la Unesco en Sofía?
La valoración d’El Garrapiellu ye mui positiva. Como experiencia, sobre manera. Fomos a Sofía,a la reunión de la Unesco, con unes idees mui primaries sobre’l funcionamientu d’esa organización internacional. La reunión de Sofía yera sobre’l patromoniu material y inmaterial, nel so desenvolvimientu. Tratábase de da-y forma a los alcuerdos a los que la Unesco llegó nel 2003, onde se planteaben les llinies de trabayu pa la defensa del patrimoniu maerial y inmaterial. Esto permitiónos conocer la dinámica de la Unesco, les expectatives reales que podíemos tener; agora sabemos más: conocemos les llinies de trabayu que tán abiertes y nós ellí defendimos el nuesu compromisu cola llingua asturiana y cola cultura tradicional d’esti país.
Tamién foi mui posivo compartir esi espaciu con diverses organizaciones non gubernamentales, qu’asistíen como nós al congresu; el trabayu d’estos colectuvos puede resultanos mui útil pola carga d’experiencies que tienen. El Garrapiellu centró la so intervención na defensa de la necesaria oficialidá pal asturianu y pal gallegu-asturianu.
¿Atoparon, nesti sentíu, munches simpatíes?
La Unesco, nun lo hai qu’escaecer, ye un espaciu gubernamental; los qu’integren la so asamblea son los diferentes gobiernos del mundu, los estaos. Aprovechamos la oportunidá pa distribuir un informe mui sintéticu, pero que consideramos abondo operativu, y que trabayamos nel so momentu cola Academia de la Llingua. Esi informe difundióse de manera amplia, intervínose sobre él. Nun ámbitu onde había munchos países y munches inquietúes, la llingua asturiana tuvo un güecu. Fiximos un contactu cola subdirectora xeneral de Patromoniu Cultural del Ministeriu de Cultura español y fixímos-y llegar los puntos d’inquietú sobre los qu’El Garrapiellu se mueve nestos momentos: la llingua asturiana, como yá dixi, pero tamién el problema del Texu d’Abamia, l’impactu sobre’l patromoniu de la Regasificadora de Xixón y les torres de Calatrava n’Uviéu, qu’amenacen un patromoniu protexíu pola Unesco. Tmién tuvimos una reunión con Fernando Bruchman, el máximu responsable na Unesco sobre los programes llingüísticos. Exploramos con él posibilidaes de trabayu, etc.
(de Les Noticies, 25-02-2008)
Read Full Post »
Tierra alantre, la mesma fala 