Renovación y continuidá

ANTÓN GARCÍA

Lo primero que destaca de la salida d’esti nuevu númberu doble, 9-10, de la Revista de Filoloxía Asturiana qu’edita’l Grupu d’Investigación del Seminariu de Llingua Asturiana de la Universidá d’Uviéu (y publica Trabe) ye la reestructuración de los sos responsables, dexando la dirección Juan Carlos Villaverde y Xuan Busto, y faciéndose cargu d’ella Xulio Viejo. De la secretaría pasa a ocupase Taresa Fernández Lorences, mientres que se constituyen, per un llau, un ampliu comité de redacción (compuestu por once persones) y, per otru, un comité científicu internacional (doce miembros). Esta renovación nun afecta nin al procuru estéticu col que salieron los númberos anteriores, nin al rigor científicu o a la variedá de les colaboraciones, que toquen asuntos llingüísticos y lliterarios.

Read Full Post »

Trabe publica un númberu doble de la «Revista de Filoloxía Asturiana»

La Editorial Trabe acaba de sacar un númberu doble de la Revista de Filoloxía Asturiana, correspondiente a los años 2009 y 2010 y que surde del trabayu del Seminariu de Filoloxía Asturiana de la Universidá d’Uviéu. Nesti doble númberu incluíse «El Vocabulario asturiano y castellano, coleccionado de la viva voz del pueblo: breve estudio y edición», de Francisco Gago Jover; «Léxico galego-asturiano núas Lecciones de agricultura de 1818», de Xosé M. Suárez; «Vocabulario de eusquerismos en las gergas gremiales de Asturias y del Noroeste de la Península (1)», de Ramón d’Andrés Díaz; «Ámbito del predicado y posición de los pronomes átonos en asturiano», de Taresa Fernández Lorences; «La dialectometría y su aplicación en el estudio de las variedades del catalán», de María Pilar Perea; «Ily/*Nur y Cerecotes. Dos notas críticas sobre onomástica y reconstrucción de prelenguas», d’Eduardo Blasco Ferrer; «Unde habita la melancolía. Miradas sobre el romance eonaviego», de Raúl González González. Complétase’l volume con delles notes, reseñes, una crónica y una necrolóxica d’Emilio Barriuso.

(de Les Noticies, 23-01-2012)

Read Full Post »

El fondu de l’Academia ufriráse dafechu en Google Books

La Presidenta de l’Academia de la Llingua Asturiana, Ana María Cano González, dió anuncia esti vienres, nel so discursu institucional del día de les Lletres nel Teatru Campoamor d’Uviéu del pautu robláu’l pasáu 7 d’abril con Google “pal inxerimientu de tol fondu editorial de la institución nesi escaparate o llibrería virtual que ye Google Books”. Como quixo afitar Ana Cano, pa decatase del algame del alcuerdu hai que tener presente que la gueta de llibros de Google ye ún de los preseos de marketing online con más puxu a nivel mundial y una de les ferramientes más efeutives en cuantes a lo so aplicación.

Dende agora, cualquier persona, según desplicó Ana Cano, “en nun importa qué país del mundu, podrá consultar o güeyar cualquier publicación de l’Academia, lo mesmo que si tuviere’l llibru nes manes nuna llibrería; y si’l conteníu ye del so interés podrá mercalu llueu, per aciu de los enllaces y direiciones afayadices que se conseñen na mesma páxina de consulta del llibru. Lo que Google Books ufre a los llectores ye’l 20% de la publicación, xunto a la portada, contraportada, índiz y solapes”.

Read Full Post »

Hevia propón a los partíos y colectivos qu’apoyen la oficialidá crear una plataforma política electoral unitaria

El gaiteru José Ángel Hevia propunxo güei a los partíos políticos y colectivos qu’apoyen la oficialidá que s’unan nuna plataforma electoral unitaria p’algamar representación parlamentaria y lluchar por esti oxetivu. El músicu pidió tamién güei a les grandes formaciones, PSOE y PP, qu’acepten la oficialidá de la llingua asturiana como una forma de superar la crisis económica. Tamién solicitó a l’Academia de la Llingua’l cambiu de l’aceición de gaiteru que recueye’l Diccionariu d’esta institución (DALLA).

Hevia pronucióse nesti sen demientres l’actu de l’Academia de la Llingua Asturiana de conmemoración del Día Les Lletres, nel que quedó nomáu académicu d’honor, la primer vez qu’un músicu recibe esti títulu. Nel actu tuvieron representantes de los principales partíos políticos asturianos. Ente ellos taben Javier Fernández y Adriana Lastra del PSOE, Carlos Galcerán y Emilio Pérez Cueva del PP, y Francisco Javier García Valledor y Noemí Martín, ente otros, d’Izquierda Xunida-Bloque por Asturies-Verdes.

Read Full Post »