Feeds:
Antradas
Comentairos

Posts Tagged ‘Emilio Marcos Vallaure’

El próximu martes día 1 d’avientu va reunise’l Patronatu de la Fundación nuna reunión na que la directiva va proponer a votación la disolución de Fundación

Según la comunicación unviada pol so presidente, Ramón d’Andrés, a patronos y socios collaboradores “por diverses causes que sería llargo precisar, la directiva entiende que’l llabor intermediador y pedagóxicu de la Fundación, desarrolláu estos cuasi 14 años, cuayó nos diversos sectores de la sociedá asturiana”. D’Andrés considera que “la misión –que tuvo plenu sentíu va unos años– ta cumplida a día de güei”.

Nel mesmu escritu el presidente de la Fundación espresa que “queda en manes de la sociedá asturiana y la so representación política afondar na defensa de la llingua asturiana en tolos niveles”.

Cuasi 14 años de trabayu

La Fundación Caveda y Nava, que defende un consensu social de mínimos a favor del reconocimientu social y llegal de la llingua asturiana, ígüenla dende l’añu 2002 personalidaes de relevancia na sociedá asturiana. Ente los sos patronos d’honor tan Emilio Marcos Vallaure, director del Muséu de Belles Artes d’Asturies, l’antiguu arzobispu d’Uviéu, Gabino Díaz Merchán, los diputaos na Xunta Xeneral Paloma Uría (IX) Faustino Álvarez (PSOE), la Cronista Oficial d’Uviéu, Carmen Ruiz Tilve, el rector de la Universidá d’Uviéu, Vicente Gotor, el futbolista Enrique Castro «Quini», l’ex director de la Fundación Príncipe d’Asturies Graciano García, o la presidenta del PP de Xixón Pilar Fernández Pardo.

(d’Asturies.com, 26-11-2015)

Advertisements

Read Full Post »

Una de les novedaes de la cabera convocatoria de sovenciones pa la normalización del asturianu espublizada esti xueves 24 de mayu pol tovía Conseyeru de Cultura, Marcos Vallaure, ye que los medios de comunicación que quieran recibir estes ayudes por usar l’asturianu, tienen de facer usu nel so mediu de la toponimia oficial aprobada pol Gobiernu d’Asturies y los conceyos, pues col sistema nuevu de puntuación, esti ye un puntu con gran pesu. Esto supondría, por exemplu, que medios como El Comercio, La Nueva España o la Cadena Ser tendríen munches menos posibilidaes de recibir ayudes de nun cambiar l’usu que faen anguaño de la toponimia.

Va tenese en cuenta amás l’horariu d’emisión, la calidá llingüística y si’l mediu usa l’asturianu como llingua vehicular del mesmu. (more…)

Read Full Post »

El rector de la Universidá d’Uviéu, Vicente Gotor, clausuró esti miércoles 2 de mayu nel Paraninfu l’actu de presentación de la obra Poesíes, de Benito de l’Auxa y Antón Balvidares, editada pola Conseyería de Cultura y Deporte por cuenta de la 33 Selmana de les Lletres Asturianes. Y fíxolo naguando por que la Selmana fora un éxitu y «animando a la sociedá a lleer n’asturianu» porque esa «ye la meyor forma de garantizar el futuru de la llingua». Gotor, que faló n’asturianu, consideróse honráu de promover cualquier acción que tenga como oxetivu l’espardimientu de la cultura asturiana y, en concreto, de la so lliteratura. Pal rector, «la llingua y cultura d’Asturies son ún de los bienes más preciaos del so patrimoniu, son la so seña d’identidá y tendríen que ser un sitiu común d’alcuentru de tola sociedá, y non de disputa». Faló depués Gotor del apueste que ta faciendo la Universidá pol asturianu, que naz del convencimientu de qu’una Universidá enraigonada nel territoriu tien que se comprometer tamién nel ámbitu cultural. Vicente Gotor reconoció que son munchos los campos nos que la institución que dirixe pue incidir nel espardimientu, conocimientu y normalización del usu del asturianu, y destacó dos: nel terrén de la docencia, na formación del profesoráu; y nel terrén de la investigación, al traviés del Seminariu de Filoloxía Asturiana, que cuenta con «especialistes escelentes». (more…)

Read Full Post »

PABLO R. GUARDADO

El Muséu Casa Natal de Xovellanos acoyó esti llunes la inauguración de la XXXIII Selmana de les Lletres Asturies, dedicada a Benito de l’Auxa y Antón Balvidares. Nel actu presentose’l volume ‘Al rodiu de la poesía ilustrada’.

La música d’un duu de cuerda precedió a les intervenciones de les autoridaes, con ausencies destacaes. Carlos Rubiera, conceyal d’Educacación, Cultura, Mocedá y Festexos, acudió al actu en sustitución de l’alcaldesa, Carmen Moriyón, mentes qu’Ana Isabel Álvarez González, conseyera en funciones d’Educación y Universidaes, escusó a Emilio Marcos Vallaure pola muerte d’un persona venceyada al Muséu de Belles Artes. El primeru en tomar la pallabra foi Rubiera, que fixo referencia al llugar de la presentación, la casa natal de Gaspar Melchor de Xovellanos, “onde se falaba davezu n’asturianu”, como amosaba la carta en castellanu que l’ilustráu xixonés unvió nel 1791 al so hermanu Francisco de Paula. “Xovellanos falaba davezu na llingua del país”, continuó’l conceyal, “al igual que la clase ilustrada, ensin complexu y vergoña”, pa depués recordar l’enfotu de Gaspar Melchor y la so hermana pequeña Xosefa pa cola llingua asturiana. Tamién fixo referencia a los dos poetes a los que ta dedicada la Selmana, L’Auxa y Balvidares, ilustraos “que falaben y escribíen na llingua del país”, a la que definió como “un estraordinariu patrimoniu de la humanidá”. (more…)

Read Full Post »

HENRIQUE G. FACURIELLA

Alfredo Álvarez Menéndez celebra la primer Selmana de les Lletres como director xeneral de Política Llingüística, anque failo dientro d’un Gobiernu en funciones que, cola convocatoria d’elecciones anticipaes, vio frustraos munchos de los planes pa completar midíes de normalización llingüística reivindicaes dende había munchu tiempu polos sectores favorables al asturianu, como la especialidá de l’asignatura n’educación, l’usu de la toponimia oficial en toles Alministraciones Públiques o la presencia del asturianu en tou tipu de programes dientro de RTPA, sobre manera nos informativos y nes retresmisiones deportives. Güei ofrecemos la primer parte de la entrevista y mañana vamos publicar la segunda.

¿De qué acciones y resultaos ta más satisfechu desque se fixo cargu de la Dirección Xeneral de Política Llingüística?
Nun puedo tar mui satisfechu porque’l tiempu que tuviemos hasta agora pa facer coses foi pequeñu y hai munchos proyectos que tán xestionándose tovía. Polo tanto, prestaríame dicir ónde punximos l’acentu nesti tiempu. Lo primero que nos punximos delantre foi’l tema del personal, porque hai que saber que la plantiya cola que cuenta esta Dirección Xeneral ye mui curtia y, amás, taba mal configurada. Por exemplu, Política Llingüística cuenta con una plaza de traductor pero configurada de manera tala que’l traductor nun tien obligación de saber asturianu o gallego-asturianu, colo que contamos con una unidá de traducción con una dotación de personal que nun garantiza que pueda cumplir cola función pa la que se concibió. Polo tanto, entamóse un procesu de modificación d’esta plaza, procesu qu’empezó en setiembre cola propuesta d’una plantiya nueva nel marcu de la Rellación de Puestos de Trabayu (RPT), pero tovía nun s’aprobó porque ye un procesu llargu, nel qu’intervienen munches partes: intervención, sindicatos, etc. Sicasí, esta modificación ta a puntu d’acabar y espero que lo faiga nel sentíu que se pidió, que tengamos una plaza de traductor neses condiciones porque’l Gobiernu anterior configurárala de manera qu’un traductor d’asturianu nun tenía por qué saber esti idioma. Otru problema ye que la Dirección Xeneral cuenta namás con dos técnicos que, na configuración de la plaza, nun garantizaba que supieren asturianu y gallego-asturianu. Una d’eses places, amás, lleva vacante tol añu. Si s’aprueba la RPT que propunximos, consiguiremos qu’esos puestos queden configuraos pa que los técnicos que cubran eses vacantes tengan que conocer asturianu y gallego-asturianu amás de cumplir el requisitu de ser filólogos. (more…)

Read Full Post »

El conseyeru de Cultura en funciones, Emilio Marcos Vallaure, destacó la collaboración de los conceyos y la comunidá escolar na XXXIII Selmana de les Lletres Asturianes. Esti añu ta dedicada a los poetes Benito de l’Auxa y Antón Balvidares.

Esta edición de la Selmana de les Lletres va principiar el llunes y va terminar el vienres 4 de mayu cola celebración del Día de les Lletres Asturianes. A lo llargo d’estos cinco díes van celebrase pol tol país dellos actos institucionales, presentaciones de llibros, conferencies, recitales y actos escolares. Marcos Vallaure presentó güei n’Uviéu la totalidá del programa d’actividaes que principien en Xixón y que van continuar polos conceyos de Grau, Uviéu, Carreño, Sariegu y Santalla d’Ozcos. Na so intervención, destacó la collaboración de los conceyos y de la comunidá escolar pa poner en valor la llingua asturiana. (more…)

Read Full Post »

Asturiana Mining Company llevóse’l Premiu al Meyor Cantar col tema ‘Si nun conoces Vaḷḷouta’. D’esta forma, la banda lliderada por Michael Lee Wolfe va representar a Asturies nel Liet International 2012, que va celebrase en Xixón.

Cientos de persones acudieron al Teatru de La Laboral pa presenciar la gala del Premiu al Meyor Cantar, na que los cinco artistes seleicionaos interpretaron el tema col qu’aspiraben a llevase’l gallardón d’esti añu. Les canciones yeren ‘Si nun conoces Vaḷḷouta’, de l’Asturiana Mining Company; ‘L’altanera’, de Macadamia; ‘Campos de meiz’, de Bacotexo; ‘Yo quixera’, de Xera; y ‘Felina Bipolar’, d’Alfredo González. Tres les actuaciones, y mentes el xuráu presidíu por Alfredo Ignacio Álvarez Menéndez, direutor xeneral de Política Llingüística, y formáu por Lisardo Lombardía Yenes, direutor del Festival Intercélticu de Lorient; Ana Vanesa Gutiérrez González, escritora y presentadora de ‘Pieces’; Aurelio Argel, críticu musical; Alberto Toyos, periodista y direutor de 40 Principales Asturies; Onno Falkena, representante de Liet International; y Rebeca Velasco, cantante y profesora de Música, deliberaba qué formación merecía’l premiu, Skama La Rede, ganador de la edición pasada, ufrió un conciertu de cinco canciones. Nél, el so vocalista y llocutor de la RPA, Miguel Fernandi, aprovechó pa mostrar una camiseta d’apoyu al ente públicu de comunicación. (more…)

Read Full Post »

Older Posts »