Antonio Martínez presenta en Noreña “La Evacuación d’Asturies na Guerra Civil”

L’Asociación Cultural InfoNoreña organiza esti xueves 19 de payares la presentación de “1937. La Evacuación d’Asturies na Guerra Civil. Hestoria y Memoria”, el tercer llibru publicáu pol historiador noreñés Antonio Martínez.

L’actu de presentación d’esta nueva obra d’Antonio Martínez va ser na Casa Cultura “Severo Ochoa” de Noreña a partir de les 19,30 hores y va cuntar cola presencia del autor y representantes de la editorial Espublizastur.

La evacuación d’Asturies na Guerra Civil. Hestoria y Memoria ye una investigación sobre’l procesu desarrolláu en 1937 pol cual miles de persones son evacuaes d’Asturies de resultes de la guerra civil. En total, colos datos que s’espliquen nel trabayu, puede considerase’l volume mínimu de la evacuación nunes 57.000 persones y podría llegar hasta les 76.000.

Read Full Post »

Yá ta nel BOPA la resolución de sovenciones a la edición n’asturianu

Como cada añu, anque cola partida cada vegada más amenorgada polos recortes presupuestarios, el BOPA asoleya la resolución de les sovenciones a la edición de llibros en llingua asturiana y gallego-asturianu.

De los 84.480 euros de la partida pa la edición de llibros, Ediciones Trabe lleva 33.100 euros, pa la edición de trece llibros d’autores como Xulio Arbesú, Antón García, Ana Veiga o Iris Díaz Trancho.

Read Full Post »

Espublizastur presenta dos obres nueves na Selmana Negra

Con motivu de la Selmana Negra 2012 Espublizastur va celebrar dos presentaciones na caseta de “La Marabunta”. El llunes 9 a les 19.00 hores Moisés Cima (FAN Asturies) va presentar xunto a Javier Cubero la primer edición en llingua asturiana de “La custión nacional nel Estau Español” d’Andreu Nin.

El miércoles 11 a les 20.00 hores Rafael R. Valdés va presentar la traducción al castellán de la obra cola que Javier Cubero ganó’l Premiu Fierro-Botas 2009: “Del romanticismo al regionalismo: escritores carlistas en la literatura asturiana”.

(d’Asturnews, 06-07-2012)

Read Full Post »

Yá ta nes llibreríes el llibru d’actes de la Xunta d’Escritores 2010

El llibru “Lliteratura asturiana, identidá y nación”, que contién les ponencies de la Xunta d’Escritores Asturianos 2010, celebrada los díes 11, 12 y 13 de xineru del 2010 nel Palaciu Villa Madalena d’Uviéu, tá yá nes llibreríes. Nes 230 páxines del volume análicense les rellaciones ente nación y lliteratura nel casu asturianu y cómo los aspectos identitarios afecten al fechu d’escribir nuna llingua minorizada como l’asturiana y los medios pa superar cola lliteratura esta situación de desventaya asina como l’usu que puede facer l’escritor de los temes identitarios a la hora d’escribir y buscar inspiración pal so trabayu como creador.

Read Full Post »

Daniel Cueli: “La reivindicación de los drechos llingüísticos vive un momentu de baxa actividá”

INACIU GALÁN

Daniel Cueli ye’l director de la revista “N’ast, cartafueyos d’ensayu”, qu’espubliza l’asociación N’ast. El chigre L’Ayalga de Xixón recibió esti xueves la presentación del so númberu seis. Falamos con él de los conteníos de la revista, del so percorríu y de les actividaes de l’asociación que la edita, amás del momentu que vive’l movimientu de reivindicación llingüística n’Asturies.

Acaben d’espublizar el númberu seis de la so revista “N’Ast. Cartafueyos d’ensayu”, ¿qué conteníos inclúi?.
Los más de los conteníos d’esti númberu xiren al rodiu de la llingua y lliteratura asturianes. Asina, Xuan Porta Allende reflexona sobre la situación llegal de la llingua asturiana anguaño; nuna llinia asemeyada, David Gimeno i Ayuso espón la importancia que tien la oficialidá d’una llingua pa garantizar la so supervivencia; Inaciu Galán y González da a conocer la figura del escritor Antón Forascepi; Xaviel Vilareyo y Villamil ufre’l vocabulariu asturianu emplegáu pol escritor José María de Pereda na so obra lliteraria; y, pa rematar, asoléyase’l pregón de la Fiesta de la Oficialidá de la Llingua Asturiana de 2010, dau por Xulio Elipe Raposo “Xune”. Amás, inclúise un ensayu de calter hestóricu, de Javier Cubero de Vicente, col que viaxamos hasta’l Perú pa conocer el movimientu políticu Alianza Popular Revolucionaria Americana. Creyemos que mos quedó un númberu bien prestosu.

Read Full Post »

Convocada la segunda edición del Premiu “Asturies” d’Ensayu

Col enfotu de da-y puxu al estudiu de la rialidá política, económica, social y cultural d’Asturies, asina comu al so pensamientu, la editorial Espublizastur vien de convocar publicamente la segunda edición del Premiu “Asturies” d’Ensayu pa obres escrites en Llingua Asturiana. El premiu d’esta segunda edición ta dotáu con 1.700 euros y la editorial espublizará de la obra premiada. Hai de plazu pa presentar los ensayos hasta’l 1 de payares y el xuráu d’esta edición ta compuestu pol economista y escritor David M. Rivas, Antón Fuertes, sicólogu y escritor fundador xunta Rivas y otros del Conceyu d’Asturies en Madrid, Bruno Gómez ganador de la primer edición con “Turismu ya identidá Nacional”, l’escritor Xaviel Vilareyo que recibió una mención del xuráu na primer edición del premiu y Javier Cubero, Premiu Fierro Botas d’Ensayu y Investigación 2009.

Read Full Post »

Bruno Gómez ganó’l I Premiu “Asturies” d’Ensayu con “Turismu ya identidá nacional”

Aconceyáu’l xuráu del premiu “Asturies” d’ensayu, conocáu pola Editorial Espublizastur, presidíu por David Rivas Infante y compuestu por Xose A. Armayor, Fonsu Fernández Álvares y Mª Carme Marqués, alcordó otorga-y el primer premiu a la obra “Turismu ya identidá Nacional”, qu’una vuelta abiertes les pliques resultó ser obra de Bruno Gómez Jiménez.

Read Full Post »

Espublizastur convoca la primer edición del Premiu d’Ensayu “Asturies”

La editorial Espublizastur convoca’l “Ier Premiu d’Ensayu Asturies” pa obres escrites n’Asturianu col envís “de da-y puxu al estudiu de la realidá política, económica, social y cultural d’Asturies, asina como al so pensamientu”. El certame ta dotáu con 1.500 euros y la espublización de la obra premiada que pue presentase hasta l’1 de payares.

Read Full Post »

Apaez nel mercáu “Al Debalu”, revista mensual de calter xeneralista n’asturianu

Redacción.

Ta acabante salir al mercáu la revista “Al debalu”, una publicación mensual dafechu n’asturianu, de calter xeneralista, en llingua asturiana y con 36 páxines a cuatricomía con formatu de 28 x 24 centímetros. Nel so equipu de redaición cunta con profesionales del periodismu asturianu y n’ella podemos atopar temes tan variaos como una entrevista al entrenador del Sporting de Xixón, Manolo Preciado y dellos artículos sobre l’Asociación Cultural La Quintana.

Amás nesti númberu, de la revista asoleyada por Espublizastur, hai artículos sobre la situación d’Haití o del Mayu del 68. El preciu d’Al debalu ye de 2€ y tendrá la posibilidá de suscribise. Per otru llau, los socios del clú de llectores “Llibros de Nós”, iniciativa tamién d’espublizastur, van tener de baldre los 4 primeros númberos.

(d’Asturnews, 14-04-2008)

Read Full Post »