Iniciativa pol Asturianu participa na xunta xeneral de la Rede Europea d’Igualdá Llingüística en Barcelona

Les instalaciones del Camp Nou, l’estadiu del Barça, van acoyer la celebración de la xunta xeneral d’European Language Equality Network (ELEN), federación europea d’entidaes en defensa de llingües minorizaes de la que forma parte Iniciativa pol Asturianu.

Inaciu Galán, presidente d’Iniciativa pol Asturianu, va representar a la entidá y falará de la situación y novedaes al rodiu de la situación del asturianu nel añu últimu. Sedrá esti sábadu a les 17:35 hores. Pero enantes, el vienres 4 a les cinco la tarde, sedrá recibíu nun actu protocolariu pol presidente de la Generalitat de Catalunya, Carles Puigdemont, xunto a los demás delegaos de les entidaes miembru d’ELEN, nel Palau de la Generalitat.

Read Full Post »

Esti sábadu 21 presentase en Xixón el Protocolu pa la Garantía de los Drechos Llingüísticos

Dientro del marcu de la Capitalidá Europea de la Cultura, Donostia 2016, va redactase y proclamase un Protocolu pa la Garantía de los Drechos Llingüísticos, coincidiendo col 20 aniversariu de la Declaración Universal de los Drechos Llingüísticos, que va presentase esti sábadu en Xixón.

Pa ello, ta faciéndose una rolda de contactos, que tien n’Asturies y pa tol dominiu llingüísticu a Iniciativa pol Asturianu como entidá representante y organizadora, pola nuesa pertenencia a la organización europea ELEN (Rede Europea d’Igualdá Llingüística)

Read Full Post »

La situación del asturianu tratóse en Bucarest na xunta xeneral d’ELEN

PABLO R. GUARDADO

Iniciativa pol Asturianu treslladó a los sos socios los pilancos qu’atopó l’idioma nos meses últimos. Esti conceyu añal de la ONG tien como oxetivu aldericar sobre la situación de caúna de les llingües miembru y establecer la estratexa pal añu próximu.

“Nel nuesu casu, falamos de les caberes complicaciones del asturianu no tocante a los recortes nes ayudes a los medios, la reducción de Llingua Asturiana en Bachiller o la tercer negativa del Gobiernu estatal a incluyir a l’ALLA nos sos presupuestos, amás de resaltar l’ésitu de les nueses campañes de Twitter y de la iniciativa pa que los conceyales y alcaldes tomaren posesión n’asturianu, o l’entamu de rellaciones ente l’ALLA y l’Academia Mirandesa”, esplica Xose B. Álvarez, responsable de Rellaciones Internacionales d’Iniciativa pol asturianu, que se treslladó a la capital rumana dende Cymru, onde reside. La xunta celebróse’l sábadu y nella participaron 12 de les 44 organizaciones que formen la European Language Equality Network (ELEN).

Read Full Post »

La reivindicación del asturianu vuelve al Parllamentu Européu

Ferran Suay​, vicepresidente d’European Language Equality Network (ELEN)​, organización al que pertenez Iniciativa pol Asturianu​, tuvo falando de la situación de les llingües penínsulares nel Intergroup for Traditional Minorities, National Communities and Languages (Intergrupu poles minories tradicionales, comunidaes nacionales y llingües), del Parllamentu Européu.

Suay esplicó la situación de discriminación de la llingua asturiana dientro d’un conceyu organizáu por esti Intergrupu esti xueves 8, recordando les situaciones de discriminación llingüística que se viven los falantes d’asturianu nel so día a día.

Read Full Post »

Iniciativa pol Asturianu participa na xunta de la Rede Europea d’Igualdá en Llingües

La Rede Europea d’Igualdá de Llingües (ELEN) celebrará la so Xunta Xeneral en Bucarest, Rumanía, esti sábadu 10 d’ochobre, organizada pol Conseyu d’Aromunes. Xosé B. Álvarez, responsable de Rellaciones Internacionales d’Iniciativa pol Asturianu tará representando a la organización y presentará los caberos problemes que vien careciendo la llingua asturiana y la so comunidá falante, asina como la repercusión de la nuesa presencia nes Naciones Xuníes.

Los delegaos que representen a los falantes de llingües minoritaries d’Europa aconceyarán esta fin de selmana na capital rumana p’aldericar munchos de los temes vitales qu’afecte a les sos llingües y cómo ELEN trabayará xunto coles sos organizaciones miembru nos ámbitos llocal, nacional y internacional.

Read Full Post »

Iniciativa pol Asturianu destaca la preocupación na ONU pola situación de la llingua asturiana

La delegación d’Iniciativa pol Asturianu presentó esti miércoles los resultaos del so viaxe de la selmana pasada a Xinebra pa esponer los problemes del asturianu ante’l 29 Conseyu de Derechos Humanos celebráu pol Altu Comisionáu de la Organización de les Naciones Uníes (ONU).

Na sede de l’Academia de la Llingua Asturiana y cola presencia del Secretariu de la institución académica, Roberto González-Quevedo, los miembros de la misión Inaciu Galán y Marissa Bordallo apuntaron a los grupos políticos de la Xunta Xeneral del Principáu que “la solución” a los problemes de la llingua asturiana ta “en trabayar pa reformar l’Estatutu ya incluyir la oficialidá”.

Read Full Post »

“Ye la llexislatura con más diputaos a favor de la oficialidá, 17 de 45”

PABLO R. GUARDADO

Segunda y cabera parte de la entrevista a Inaciu Galán y González (Xixón, 1986), presidente d’Iniciativa pol Asturianu, que va viaxar esta selmana a Suiza pa intervenir na ONX.

Nestos trés años, dende que nació Iniciativa pol Asturianu, ¿la situación del idioma vivió avances o retrocesos?
La situación ye mala y va peor, no que cinca a la vitalidá de la llingua y a que les autoridaes siguen ensin garantizar la llibertá de los ciudadanos pa qu’al terminar el sistema educativu puedan escoyer qué llingua falen, porque salgan bien formaos n’asturianu y castellán, y porque esista una oficialidá que garantice’l drechu a usala en tolos ámbitos.

Por embargu, el sofitu de cada vegada más partíos de tol espectru políticu y l’enorme consensu social a favor del asturianu, más d’un 60% de partidarios de la oficialidá según les encuestes, faenmos ser positivos al respective del futuru. Tamos a tiempu de cambiar la tendencia que lleva l’asturianu hacia la desapaición en poques décades y tamos enfotaos en que vamos consiguilo.

Nel ámbitu de la reivindicación ta faciéndose cada vegada un meyor trabayu. L’importante llabor reivindicativu de la Xunta pola Defensa de la Llingua Asturiana impulsando la manifestación cada añu; el llabor sectorial de Softastur, nel campu de la informática; de Reciella, families pol asturianu, cola tresmisión del idioma a los neños; y otres organizaciones d’otru tipu como El Ronchel, Ástura, El Teixu, N’Ast, Faceira y Furmientu en Lleón, grupos de trabayu dientro de los partíos, asociaciones, llocales sociales…

Hai un movimientu plural, ampliu y que ye exemplu de convivencia. Tovía mos queda, sí me paez, un pasu más, una mayor coordinación de tol movimientu.

Read Full Post »

Iniciativa pol Asturianu espondrá ante la ONU la situación de la llingua

Una delegación d’Iniciativa pol Asturianu va participar esti xueves 25 de xunu na misión internacional que va tar presente nel 29 Conseyu de Drechos Humanos celebráu pol Altu Comisionáu de la Organización de les Naciones Xuníes (ONX).

Esta visita surde frutu del trabayu entamáu nel ámbitu internacional por esta organización y pola pertenencia de la mesma, como representante d’Asturies, a la entidá internacional European Language Equality Network (ELEN) formada por organizaciones en defensa de llingües en peligru de toa Europa.

Va unos meses Iniciativa pol Asturianu fizo públicu l’informe que s’apurriera a esti Altu Comisionáu de Drechos Humanos, preparáu pola Vocalía de Rellaciones Internacionales de la organización, dirixida por Xosé B. Álvarez. Agora ye’l momentu de la so defensa na sesión que dientro d’esti Conseyu va dedicase al cumplimientu de los Drechos Humanos n’España.

Read Full Post »

N’Ast pide más atención a los informes internacionales sobro l’asturianu

L’organismu Eurolang / European Language Equality Network (ELEN) ta acabante d’asoleyar un nuevu informe nel que fae repasu a les discriminaciones y ataques que sufren los falantes de llingües minoritaries nel Estáu español, ello ye, les cooficiales xunto col castellanu –catalán, vascu y gallegu– más les qu’inda nun tienen esi estatus, como l’aragonés y l’asturianu.

No que cinca a la llingua asturiana, l’informe critica bien d’ello a l’Alministración asturiana –Gobiernu del “Principado”– por poner la “escusa llegal” de la non oficialidá del asturianu pa nun emplegalu de cara al ciudadanu nun cumpliendo siquiera colos mínimos afitaos na probetaya Llei d’Usu de 1998. Como casos concretos, ELEN señala la dificultá de coleutivos por poder llegalizase emplegando l’asturianu, de partíos políticos por presentar les candidatures elleutorales na mesma llingua y les dificultaes de los escolinos que la quieren cursar nes escueles ya institutos.

Read Full Post »

La Rede Europea d’Igualdá Llingüística denuncia nun informe ante la ONU los ataques a la llingua asturiana

La Rede Europea d’Igualdá Llingüística (ELEN), a la que pertenez Iniciativa pol Asturianu, acaba de publicar un informe pa la Revisión Periódica Universal (UPR) de les Naciones Uníes, no que se refier a los casos de discriminación y ataques escontra los falantes de llingües estremaes del castellán nel Estáu español. L’informe detalla casos específicos d’ataques y discriminación escontra falantes d’aragonés, asturianu, catalán, gallegu y vascu nel periodu ente 2007 y 2013.

El responsable de Relaciones Esteriores de la organización Iniciativa Pol Asturianu, integrada n’ELEN, esplicó qu’esti informe trata de retrucar al realizáu pol Estáu Español periódicamente pal confirmar el cumplimientu de la Carta Européu de Llingües Minoritaries, que’l Gobiernu central firmó nel so día.

Read Full Post »