David Guardado, del Xixón Sound a l’Academia de la Llingua Asturiana

XAIME MARTÍNEZ

Cuando’l periodista ya historiador Pablo Batalla Cueto retuitió la noticia de que David Guardado Díez (Xixón, 1970) taba acabante de ser nomáu académicu de númberu de l’Academia de la Llingua Asturiana, Carolina del Olmo —filósofa y autora de Dónde está mi tribu (Clave intelectual, 2013)— entrugó nes respuestes: «¿es el de Penélope Trip?».

Esta entruga reflexa perbién la trayectoria intelectual y artística de David Guardado, que pa dalguna xente puede presentar una aparente contradicción, pero que’l nuevu académicu nun vive d’esa manera. La participación nos movimientos de reivindicación llingüística del asturianu, la militancia política y la conexón coles maneres más nueves de facer cultura pop nun son categoríes mutuamente escluyentes, como amuesa’l perfil del filólogu xixonés.

Read Full Post »

El documental ‘El valir económicu d’una llingua’, disponible na rede

Asturies.com participó como convidáu nesti proyeutu audiovisual d’Iniciativa pol Asturianu estrenáu nel II Seminariu ‘Oficialidá’.

‘El valir económicu d’una llingua’ ye un documental que presenta l’asturianu “como un elementu de dinamización nel mundu empresarial”, amás de “una manera de xenerar empreses, emplegu y riqueza”. Empresarios y espertos n’economía o marketing dan nél la so opinión sobre esta cuestión y cuenten esperiencies propies.

Read Full Post »

“La UABRA ye un eventu yá consolidáu”, afirma Cristina Valdés

PABLO R. GUARDADO

El llunes comienza en Cangas del Narcea la novena edición de la Universidá Asturiana de Branu (UABRA) qu’entama l’Academia de la Llingua Asturiana (ALLA). “Ye un eventu yá consolidáu”, espresa la direutora María Cristina Valdés, como amuesa l’alta matriculación.

Más d’un centenar d’alumnes y alumnos van participar na UABRA ente’l llunes y el 10 d’agostu, a lo qu’hai que sumar otru mediu centenar de docentes que van poner clase na amplia ufierta de los cursos, que tamién son d’estensión universitaria gracies a la collaboración de la Universidá d’Uviéu. L’ALLA, pal so desendolcu, tamién cuenta col fundamental sofitu del Conceyu de Cangas del Narcea.

Read Full Post »

El portal Asturies.com cumple 20 años

El portal d’información en llingua asturiana Asturies.com cumplió 20 años el pasáu 3 de febreru, una efeméride que va celebrar mientres estos 20 años con delles actividaes y conteníos, según informen na mesma páxina web.

Foi’l 3 de febreru de 1997 cuando Fernando de La Fuente y David Guardado punxeron en marcha lo que nun primer momentu yera una guía de recursos asturianos na rede y un portal informativu selmanal.

Pronto tornó colos años “nuna referencia na rede asturiana pela que pasaron abondos collaboradores y que punxo en marcha una montonera d’esperiencies pioneres contribuyendo a iguar asina un espaciu comunicativu asturianu y n’asturianu que nestos díes tien un futuru tan inciertu como la propia llingua”, señalen dende Asturies.com.

Asina nació Asturia, continúen, “yá col dominiu http://www.asturies.com qu’años depués-y daría nome al mediu, poniendo la llingua asturiana nel mapa d’un naciente mundu virtual qu’aína se tresformo nuna ferramienta imprescindible y omnipresente”.

Recuerden tamién que “yera un tiempu d’ilusión na que l’apaición de les nueves tecnoloxíes y la creación de medios on-line ufiertaben posibilidaes pa les visiones alternatives, un momentu nel que nacieron otros medios como Les Noticies coles qu’Asturies.com collaboró de forma intensa, un tiempu nel que los medios mayoritarios n’Asturies tovía nun teníen siquiera ediciones dixitales, y un momentu nel que la oficialidá del asturianu paecía menos lloñe, y casi se tascaba coles manes énte la discusión sobre la reforma del estatutu”.

Mientres esti añu Asturies.com celebrará esti aniversariu faciendo alcondanza d’esos venti años con testimonios, reportaxes y delles actividaes.

(d’Europa Press, 07-02-2017)

Read Full Post »

Arcu Lliterariu va dedicar la xornada a la normalización llingüística

L’actividá n’Arcu Lliterariu nun apara y esti vienres tien programaes delles actividaes que nesta xornada van tar dedicaes a la normalización llinguística. La presentación de la espublización ‘Xixón una ciudá abierta al mar’, destinada como complementu pa los escolinos y escolines que faen un percorríu mientres el cursu per Cimavilla, va abrir a les 17.30 hores la cita. Editada pola Oficina de Normalización Llingüística de Xixón, los sos autores son Mercedes Calzada, Xurde Fernández Fernández y María Ángeles García Rodríguez, que van ta presentes nel actu xunto cola conceyala Ana Montserrat López Moro y la responsable del organismu municipal, María Xosé Rodríguez.

A les 18 hores, mentes, va principiar la parte dedicada a la normalización cola intervención de Ramón d’Andrés, que va poner una conferencia sobre delles cuestiones básiques sobre’l debate llingüísticu n’Asturies. Darréu, Fernando de la Fuente, direutor d’Asturies.com, va intervenir como representante de l’Asociación Cultural Ástura nuna presentación d’actividaes xunto con Carlos Pulgar, voceru nacional de la Xunta pola Defensa de la Llingua Asturiana, y Inaciu Galán, presidente d’Iniciativa pol Asturianu.

Read Full Post »

Vicente García Oliva gana’l V Premiu Timón 2011

LMS

El premiu que concede l’alcuentru lliterariu L’Arribada a escritores n’asturianu o gallego-asturianu, foi a parar esti añu a Vicente García Oliva. Nesta edición, a la que podíen presentar candidatures persones o colectivos, concursaben autores nacíos primero de 1961.

La distinción, que se va entregar el prósimu 17 de setiembre nel marcu de L’Arribada 2011, consiste nuna pintura cerámica del escultor y ceramista xixonés Jesus Castañón. El xuráu, qu’aconceyól miércoles 3 d’agostu, taba formáu por Alberto Álvarez Peña, Fernando de la Fuente, Aurora García Rivas, David M. Rivas y tuvo presidíu por Humberto Gonzali.

Read Full Post »