Fernando de Luxán lleva’l concursu de guiones de Formientu

PABLO R. GUARDADO

El I Concursu de Guión de Curtiumetraxe n’Asturianu y Gallego-asturiano Formientu, convocáu nel marcu del #FormientuEnCasaFest, foi pa la obra ‘De cuando l’agua’ de Fernando de Luxán. L’actu d’entrega del premiu va celebrase esti sábadu na sede de Cuatro Gotes Producciones.

La charra-taller virtual de Pablo A. Quiroga, responsable d’Algamar Producciones, ‘El guión nel curtiumetraxe asturianu’ dientro de la iniciativa entamada por Formientu pa poner en valir la cultura asturiana pel confinamientu pol estáu d’alarma pandemia de COVID-19, sirvió de xerme a esta iniciativa, que consistía nel unvíu de guiones inéditos pa curtiumetraxes de temática llibre. La participación foi “abondante”, apunta la organización, con dos trabayos gallardonaos pol xuráu, quedando ermu’l tercer premiu.

Read Full Post »

TPA va emitir per primer vez un llargumetraxe n’asturianu el día 27

PABLO R. GUARDADO

El 27 d’avientu, n’horariu d’audiencia máxima, TPA va emitir per primer vez un llargumetraxe n’asturianu. Trátase de ‘El rostru impenetrable (One-eyed Jacks)’, película doblada por Gonzali Producciones que dirixó y protagonizó Marlon Brando.

L’ente públicu de comunicación, que güei cumple ocho años d’emisión, llevará a les pantalles de los asturianos un productu de ficción n’asturianu per primer ocasión. Esti fechu históricu ye consecuencia de la collaboración ente la productora y la RTPA, siendo la película ‘El rostru impenetrable’, única dirixida por Brando, la escoyida pa tener esi honor. Iyán Gonzali encargóse de dirixir y producir un doblaxe nel que participaron más de venti actores y actrices, ente ellos Carlos Novoa (Marlon Brando), José Antonio Lobato (Karl Malden), Ana Blanco Rozada, Ana Díaz Morán, Andrés Presumido, Carlos Alba, Alberto Rodríguez, Silvino Torre, Lluis Antón González, Olga Cuervo, Eladio Sánchez, Verónica Gutiérrez, Marisa López Diz, Ángel Héctor Sánchez, Norberto Sánchez, Carlos González, Begoña Faro, Mario Artidiello, Samuel Gradín, Hugo García, Carlos Rodríguez, Jéssica de la Paz, Xulián García y Fernando de Luxán.

Read Full Post »

El 3 de Mayu fadráse la primera emisión televisiva d’un llargumetraxe dobláu al asturianu

El xueves 3 de mayu va emitise en televisión, per primera vez na historia, un llargumetraxe dobláu al asturianu. Trátase del versionáu na nuesa llingua del westerm McLintock, protagonizáu por John Wayne, Maureen O’Hara, Patrick Wayne y Stefanie Powers, fechu por Gonzali Producciones y que se podrá ver en Teleasturias esi día a les 10 de la nueche, tres d’una presentación previa de la película y el so doblaxe nel programa Primera Plana. Habrá otru pase de McLintock na mesma emisora’l domingu 6 de mayu, a les 3,30 de la tarde.

Les persones que nun tengan sintonizada la canal, puen atapola nel dial 66 de la TDT, mentes que la xente que nun resida n’Asturies va poder ver el llargumetraxe al traviés d’Internet .

Read Full Post »