Anque dientro del asturianismu ye más conocíu nos últimos años pola so faceta política como militante del PP de Xixón, Humberto Gonzali (Mieres, 1961) lleva dientro d’esi movimientu dende los tiempos de Conceyu Bable. Asina, llegó a ser en 1985 secretariu de la recién creada Xunta pola Defensa de la Llingua Asturiana y en 1990 foi ún de los fundadores y presidente de l’asociación d’Escritores y Traductores en Llingua Asturiana. Con un importante llabor lliterariu a recostines, Gonzali ye nestos momentos el coordinador de L’Arribada, un festival lliterariu que, col epicentru nel Antiguu Institutu de Xixón, convierte la villa de Xovellanos nun foru d’intercambiu d’idees sobre la llingua, la lliteratura y la cultura del país.
L’alcuentu lliterariu L’Arribada acaba de celebrar la sesta edición. ¿Cómo ve la evolución d’esti certame col pasu los años?
Ganemos n’importancia. Nel 2006 principiemos d’una forma modesta cola idea de testar si se podía poner en marcha un proyectu d’esti tipu y si diba furrular. Na edición posterior yá vimos que la cosa podía medrar y añu tres añu fomos progresando n’espaciu, participación y actividaes. Esti añu tuvimos un poco retrasu por mor del procesu electoral y la formación d’un equipu de Gobiernu nuevu. El balance ye positivu y el proyectu foi afitándose. Queríemos mostrar, primero en Xixón y depués n’otros conceyos, qu’Asturies tien una lliteratura y un mundu cultural alredor, qu’amás esta tien calidá y que se pue convertir nun factor de desenvolvimientu económicu. L’últimu pasu que vamos dar ye que L’Arribada va participar nel Festival Atlánticu de Xixón que se va facer l’añu que vien. Ellí vamos entamar un alcuentru lliterariu ente los países del Arcu Atlánticu. Esto va permitir dar a conocer les nuestres lletres per otres naciones, amás de facer alitar l’aspectu económicu de la nuestra cultura. (more…)
Read Full Post »
Tierra alantre, la mesma fala 