Xixón acueye la presentación del llibru «Xuegos tradicionales asturianos»

Elena Victoria Marta Fernández Poch, Rubén Sánchez Vicente y Xuan Xosé Sánchez Vicente van presentar esti vienres 6 de marzu a les 7 la tarde’l so llibru «Xuegos tradicionales asturianos». L’actu sedrá nel Salón d’Actos del Vieyu Institutu Xovellanos. Editáu pola Fundación Nueva Asturies y Trabe, a los asistentes regalaráse-yos el llibru (hasta’l fin d’esistencies disponibles nel actu).

El material reuníu nesti llibru sobre xuegos tradicionales asturianos ta dividíu n’once partes, cada una faciendo referencia a un tipu de xuegu: «Xuegos de movimientu», «Xuegos de coru o movimientu llimitáu», «Xuegos con oxetos», «Xuegos con balón», «Lluches», «Xuegos con neños pequeños», «Dellos cancios del corru y de la comba o que xugaben los pas colos fíos», «Cancios y fórmules d’escoyer», «Cancios de campamentu y escursión» y «Traballingües».

Read Full Post »

Presenten 46 candidatures a los Premios Timón

PABLO R. GUARDADO

El sábadu finó’l plazu pa la presentación de candidatures a los diferentes Premios Timón qu’entrega l’Asociación Cultural L’Arribada mientres la Vagamar. No que correspuende a los gallardones lliterarios, nesta edición aspiren los escritores nacíos nel añu 1965 o enantes.

Pal IX Premiu Timón p’autores en llingua asturiana y eonaviego hai un total de 19 candidatos: Lurdes Álvarez, Cristina Muñiz Martín, Esther Prieto, Xosé Miguel Suárez, Esther García López, Belén Rico, Adolfo Camilo Díaz, Taresa Lorences, Xavier Frías Conde, Ignaciu Llope, Xosé Lluís Campal, Xulio Berros, Xulio Arbesú, Alberto Cobreros Gil, Consuelo Vega, Milio’l del Nido, Carme Martínez Pérez, Xilberto Llano y Ánxel Álvarez Llano. N’ediciones anteriores reconocióse la trayeutoria de Nené Losada Rico (2007), Xuan Xosé Sánchez Vicente (2008), Manuel García ‘El Galano’ (2009), Roberto González-Quevedo (2010), Vicente García Oliva (2011), Antón García (2012), Miguel Rojo (2013) y Xosé Bolado (2014).

Read Full Post »

Los creadores culturales mozos analizaron los sos ámbitos de trabayu nel congresu celebráu n’Uviéu

PABLO R. GUARDADO

El Congresu Cultura Asturiana Mozo resultó una perbona ferramienta pa conocer el llabor que se ta faciendo n’Asturies en delles estayes y les mires de los creadores culturales. Éstos foron los protagonistes d’una xornada “que foi un ésitu”.

Con estes pallabres finó Xuan Xosé Sánchez Vicente un congresu que podría tener continuidá n’años vinientes, dalgo que se decidirá nunos dos o trés meses. Ésti ye’l tiempu que van tomar los impulsores d’esta iniciativa, la Fundación Nueva Asturies y l’Asociación Cultural L’Arribada, y los coordinadores de toles estayes pa madurar la esperiencia d’esti primer Congresu Cultura Asturiana Mozo y convocar un conceyu nel que valorar la conveniencia o non de celebrar ediciones nueves.

Read Full Post »

Un congresu va reunir a xente mozo que se dedica a la creación cultural nel ámbitu asturianu

PABLO R. GUARDADO

L’auditoriu d’Uviéu va acoyer, el 19 d’ochobre, el primer Congresu Cultura Asturiana Mozo. Nél va participar xente de menos de 35 años que se dedica a la creación cultural nel ámbitu asturianu pa visibilizar el so llabor énte la sociedá.

L’Asociación Cultural L’Arribada y la Fundación Nueva Asturies son les dos entidaes qu’impulsen esta iniciativa na que ta collaborando delles personalidaes de la cultura asturiana y qu’entá nun tien zarráu’l programa oficial. “Los oxetivos son, de manera interna, ver cómo ven les nueves xeneraciones la cultura asturiana, la so actividá, el mundu económicu y empresarial d’ellos, asina como les perspeutives de futuru que tienen”, apunta Xuan Xosé Sánchez Vicente, que darréu añade que, de manera esterna, la idea fundamental ye facer visible a los güeyos de la sociedá del país a miles de profesionales de la cultura asturiana de los que desconoz el so llabor. “Queremos treslladar a la sociedá asturiana qu’equí hai un mundu ricu na so variedá, creativu y coneutáu al mundu contemporaneu, quitando asina esa imaxe que caltién una parte de la sociedá de que’l mundu cultural asturianu ta mui arreyáu a lo antiguo, a lo folclórico”, continúa’l representante de la Fundación Nueva Asturies.

Read Full Post »