Lucía Cortina presenta en Blimea ‘El pallabreru de la minería asturiana y el so orixen’

El pasáu día 21 de febreru celebróse’l Día Internacional de la Llingua Materna. Con motivu d’esta fecha la Conceyalía de Cultura del conceyu de Samartín del Rei Aurelio, a traviés de la so Oficina de Normalización Llingüística va celebrar un actu nel que se dan la mano la minería y la llingua asturiana.

L’actividá va tener llugar el vienres 27 de febreru a les 7 y media la tarde na Casona del Bravial de Blimea. Nella va contase cola presencia de Lucía Cortina García, que va ufiertar una charra titulada “El pallabreru de la minería asturiana y el so orixe”, cola que va averar a la xente al significáu y l’orixe de dalgunos de los términos emplegaos con más frecuencia n’actividá minera asturiana, esplicando en qué midida los términos que son patrimoniales s’esportaron a otres zones mineres de fuera de la nuestra rexón.

Read Full Post »

La Casona del Bravial acueye una esposición en llingua asturiana sobre’l Castiellu de Blimea

PABLO R. GUARDADO

El Día Internacional de la Llingua Materna (21 de febreru) y el cuartu aniversariu como centru cultural de la Casona del Bravial converxen nuna muestra sobre’l Castiellu de Blimea. Ésta inaugúrase’l xueves y cuenta con tola información n’asturianu.

El Castiellu de Blimea trátase d’un edificiu mui lligáu a la propia Casona del Bravial, yá que descendientes de la familia qu’habitara l’actual centru cultural blimeín ente los sieglos XI y XII, los Fernández Miranda, procedentes de Quirós, treslladáronse a esti inmueble nel 1496. Naquél momentu conocíase como la casona de La Cabezá y nun sería hasta sieglos más tarde cuando, depués de que’l vizconde de Campogrande diera forma al edificiu nel 1897 pa revivir glories medievales vieyes, pasara a conocese como’l Castiellu de Blimea.

Read Full Post »

Samartín entama una campaña pa reforzar l’usu de los topónimos tradicionales ente la población

‘Los nomes de llugar nun tienen preciu’ ye’l nome de la campaña qu’entama Samartín del Rei Aurelio pa reforzar l’usu de los topónimos tradicionales, agora oficiales, ente la población. L’alcalde Fernández participa de forma activa.

La Oficina de Normalización Llingüística de Samartín del Rei Aurelio editó un total de 2.000 chapes metáliques colos nomes de los 52 topónimos mayores del conceyu que se van repartir ente la población, a lo qu’hai que sumar pegatines col nome del conceyu y cartelos promocionales de la campaña que van distribuyise n’edificios públicos como biblioteques, polideportivos o telecentros. L’oxetivu ye “reforzar l’usu de la toponimia oficial del conceyu, aprobada por decretu nel añu 2008”, señalen dende’l SNL que dirixe Hugo Fanjul. Completa esta iniciativa un videu de Pablo A. Quiroga nel qu’apaecen l’alcalde Enrique Fernández, l’ilustrador Alfonso Zapico, el cantante Chus Pedro y Aurora Suárez, direutora de Refaxu, comentando la so rellación con dalguna de les poblaciones del conceyu utilizando la forma asturiana.

Read Full Post »

Antón García y Esther Prieto recordaron en Blimea los 21 años de trayeutoria d’Ediciones Trabe

El fundador d’Ediciones Trabe, Antón García, y la codireutora de la editorial anguaño, Esther Prieto, protagonizaron esti miércoles un actu na Casona del Bravial. Nél repasaron la trayeutoria de la empresa uviedina nos sos 21 años de vida.

El que fora direutor de Trabe hasta 2007 recordó na so intervención el primer llibru qu’espublizó, ‘Ventiún poemes’ de Pepín de Pría, y fixo referencia a otros títulos importante na historia de la editorial, como la torna al asturianu de ‘La odisea’, d’Homero, fecha por Xosé Gago, o’l diccionariu d’asturianu de Xuan Xosé Sánchez Vicente. Pela so parte, Prieto, direutora de la empresa xunto con Samuel Castro dende ochobre, centróse más nos llibros editaos nos años últimos, como la traducción al asturianu de ‘Harry Potter y la piedra filosofal’, ente otros. Amás, tanto García como Prieto recordaron anéudotes d’estos años y punxeron de manifiestu les dificultaes que tien el mercáu editorial anguaño.

Read Full Post »

Entamen les Xornaes de Lliteratura Xuvenil en Samartín del Rei Aurelio

La Conceyalía de Cultura, Educación, Deporte organiza les XI Xornaes de Lliteratura Infantil y Xuvenil que se van a celebrar a lo llargo d’esti mes. El programa d’esta edición ye heteroxéneu en cuantes a que contién cine, teatru, esposiciones y lliteratura, pero toos estos xéneros xiren alredor del terror que fai de filu conductor d’estos alcuentros lliterarios. Güei a les 18:30 de la tarde ábrense cola inauguración de la esposición del llibru Mieu, escritu por Milio’l del Nido y con ilustraciones d’Alberto Sastre. Na inauguración van tar presentes Ángela Sánchez, de la Editorial Pintar-Pintar y Gema Suárez Torre, conceyala de Cultura de Samartín del Rei Aurelio.

L’envís d’estes xornaes pasar por impulsar vezos de llectura y creativos ente’l públicu infantil y xuvenil pente medies de el so aproximamientu al mundu de les lletres, les arte escénicas o’l cine dende una perspectiva recreativa y coles mesmes educativa.

Read Full Post »

Samartín presenta un ciclu de cine n’asturianu con cuatro clásicos

La Conceyalía de Cultura de Samartín del Rei Aurelio presentó’l xueves 10 de payares el Ciclu de Cine n’Asturianu, que se va poner en marcha esti mes al traviés de la Oficina de Normalización Llingüística y dientro de que van proyectase cuatro películes doblaes al asturianu. La iniciativa ye frutu d’un alcuerdu con Gonzali Producciones, que s’encargó de los doblaxes.

El ciclu va abrise cola proyección, el martes 15 de payares, a les 19:00 hores, n Casona del Bravial de Blimea, d’El tercer home, película del director británicu Carol Reed protagonizada por Orson Welles nel añu 1949.

Read Full Post »