Iniciativa pol Asturianu pide que l’asturianu tenga pesu na puntuación de les convocatories del Gobiernu d’Asturies

Iniciativa pol Asturianu pide que l’asturianu tenga pesu na puntuación y na baremación de les convocatories y concursos del Gobiernu d’Asturies. La organización espresó al traviés del so presidente, Iván Llera, la reclamación de que l’idioma tien que tener un pesu específicu nes diferentes campañes qu’entame’l Gobiernu del Principáu al traviés de los concursos públicos.

Llera aclaró que “a lo llargo de la selmana pasada hubo una ufierta pública sobre señalización d’espacios turísticos que nun facía nenguna referencia al asturianu o al usu de la toponimia tradicional de los llugares. Resulta mui llamativo qu’esta ufierta na que nun ta presente esa importancia del asturianu na baremación de la puntuación venga precisamente de la Conseyería de Cultura, Política Llingüística y Turismu. Nun puede ser que pal área de Gobiernu que tien les competencies de política llingüística l’idioma nun tenga un papel importante”.

Read Full Post »

La Selmana de les Lletres aplázase hasta la seronda

El Gobiernu asturianu y l’Academia de la Llingua Asturiana anunciaron l’aplazamientu hasta la seronda próxima de la 41 edición de la Selmana de les Lletres, prevista pa primeros del mes de mayu, coincidiendo col Día de les Lletres Asturianes, que tamién queda aplazáu.

El Gobiernu d’Asturies, de común alcuerdu cola Academia de la Llingua Asturiana (ALLA), anunció nuna nota de prensa esti vienres que considera que la situación actual de la crisis del coronavirus, depués de la declaración del estáu d’alarma y el decretu de les midíes de confinamientu, aconseya l’aplazamientu de los actos previstos.

Read Full Post »

Les inscripciones pa les primeres pruebes oficiales d’asturianu van principiar el 6 de febreru

El Principáu convocó yá les primeres pruebes de certificación de llingua asturiana, pa los que van poder concurrir un máximu de 500 aspirantes y que se van celebrar a finales de mayu n’Uviéu. El plazu d’inscripción pa los interesaos ábrese’l 6 de xineru y acaba’l 14 de febreru. Trátase de les primeres pruebes oficiales que van establecer los niveles de competencia nel usu de la llingua asturiana, que se va convocar polo menos una vez al añu pa un mínimu d’ún de los niveles (A1, A2, B1, B2, C1). Nesta primer convocatoria’l nivel de competencia ye l’Intermediu B2.

Les persones interesaes han presentar les sos solicitúes d’almisión ente esti xueves, día 6, y el vienres 14 de febreru nos siguientes centros: IES Aramo, n’Uviéu; IES Calderón de la Barca, en Xixón; IES Carreño Miranda, n’Avilés; o IES Bernaldo de Quirós, en Mieres.

Read Full Post »

Factoría Norte gana el premiu de teatru del Gobiernu asturianu

La compañía Factoría Norte ye la ganadora de la tercer edición del premiu Nel Amaro de Teatru Profesional en llingua asturiana y gallego-asturianu, que concede’l Gobiernu asturianu, cola obra Les rellaciones peligroses. El xuráu encargáu de valorar les obres finalistes axuntó baxo la presidencia del director xeneral de Política Llingüística, Antón García, y tuvo formáu por Eva Vallines Menéndez, actriz y crítica teatral; Esther Castro Manzano, filóloga; Cristina Muñiz Martín, escritora; José Ramón Iglesias Cueva, secretariu de l’Academia de la Llingua Asturiana, y Roberto Corte Martínez, director y críticu teatral.

Ente les cuatro obres finalistes, que se representaron a lo llargo del mes de payares nel Teatru Filarmónica d’Uviéu, el xuráu decidió por mayoría conceder el gallardón al espectáculu Les rellaciones peligroses, valorando «el brillante exerciciu d’interpretación y l’axilidá y fluidez llingüística con que se desenvuelve una obra mui bien conxuntada qu’analiza en clave de comedia llixera la incomunicación que vive una sociedá tan interconectada», según destaca l’acta. El xuráu quixo tamién remarcar la «enorme calidá de toles obres finalistes, lo que dificultó enforma la decisión». Escrita y dirixida por Eladio de Pablo, Les rellaciones peligroses ye una obra que xune drama, humor y pedagoxía pa dar a conocer la manera en que la mocedá encara los peligros del mundu de les tecnoloxíes nueves y les redes sociales, la iniciación a la so vida sexual y los prexuicios sobre la identidá de xéneru de les persones, según informa Europa Press.

Read Full Post »

Estos son los finalistes del Premiu de Teatru Profesional Nel Amaro

El Teatru Filarmónica d’Uviéu va acoyer los vienres 8, 15, 22 y 29 del mes de payares les representaciones de les obres finalistes qu’opten al III Premiu de Teatru Profesional Nel Amaro en llingua asturiana.

Depués d’una preselección realizada na primer quincena d’ochobre pol xuráu _integráu por especialistes en teatru y llingua asturiana_, les cuatro compañíes teatrales finalistes y que van participar nesti III Festival Nel Amaro son, por orde d’actuación, Ververemos, col espectáculu ‘Muyeres inesperaes’; El Callejón del Gato, col espectáculu ‘Crecer’; Higiénico Papel Teatro, col espectáculu ‘Una casa’; y Factoría Norte, col espectáculu ‘Les rellaciones peligroses’.

El Premiu de Teatru Profesional Nel Amaro en llingua asturiana o gallego-asturianu convócase pa consolidar, arriquecer y prestixar estes dos llingües nel ámbitu del arte dramático, y nesta tercer edición ta dotáu con 6.000 euros.

Read Full Post »

Asturies aprueba los precios públicos p’acreitar el «first» del asturianu

El Principáu peracaba la prueba de certificación de conocencia del asturianu acordies colos niveles reconocíos pol Marcu Común Européu de Referencia de les Llingües. En creando la normativa llegal y afitando tolos plazos, llegó la vez d’afitar los precios públicos, el dineru que va tener qu’abonar pa inscribise.

L’Alministración asturiana decidió crear una tarifa única pa tolos niveles, tanto’l básicu como’l mediu y l’avanzáu. Esa cantidá ye de 31,63 euros. Esi preciu coincide coles establecíes nes escueles oficiales d’idiomes del Principáu pa la certificación d’otros idiomes estranxeros nel añu 2019

Read Full Post »

Aprobaos los niveles de competencia d’asturianu según el marcu de referencia européu

El Gobiernu d’Asturies aprobó güei’l decretu pol que s’establecen los niveles de competencia nel usu de la llingua asturiana y se regula la prueba de certificación correspondiente a los niveles mentaos adaptaos al Marcu Común Européu de Referencia de les Llingües.

Trátase d’un desarrollu de la Llei d’Usu y Promoción del Asturianu, que nel so artículu 11 dispón que’l Principáu ha establecer les certificaciones qu’acreiten el conocimientu del asturianu. Con esta aprobación, la ciudadanía va poder asina acreitar el so nivel d’asturianu al traviés de pruebes específiques que van tener cinco niveles: básicu 1, básicu 2, intermediu 1, intermediu 2 y avanzáu.

Read Full Post »

“Trátase d’una novela policíaca ambientada ente Madrid y Uviéu nel sieglu XIX”, diz el ganador del Xosefa Xovellanos

L’escritor uviedín Manuel García Menéndez, ganador del Premiu Xosefa Xovellanos, esplica que ‘El visitante impropiu’ ye una novela d’investigación policíaca ambientada en 1890 ente Madrid y Uviéu. Trátase d’una obra de dellos cientos de páxines protagonizada por un investigador del Cuerpu de Vixilancia, l’antecedente de la Policía Nacional y qu’existió hasta poco depués de la Guerra Civil.

El xuráu del Xosefa Xovellanos, el de más prestixu de les lletres asturianes y qu’entrega cada añu’l Gobiernu autonómicu, decidió conceder el gallardón a esta obra al reconocer nella “una novela ambiciosa con gran oficiu narrativu que representa una propuesta poco habitual na lliteratura asturiana pol so trabayu d’ambientación minuciosu y brillante, amás de tener una trama construyida hábilmente”.

Read Full Post »

Riaño (ALLA) afirma que la oficialidá supondría’l 0,5% del presupuestu autonómicu

El presidente de l’Academia de la Llingua Asturiana, Xosé Antón González Riaño, afirmó qu’anque “l’exerciciu de derechos democráticos nun pue depender del so coste económicu”, poner en marcha la oficialidá de la llingua asturiana supondría’l 0,5% del presupuestu autonómicu.

Asina lo indicó’l presidente de la institución na potencia inaugural de les XXXVII Xornaes d’Estudiu, que se celebren dende esti martes hasta’l xueves na Facultá de Filosofía y Lletres de la Universidá d’Uviéu.

Read Full Post »

Anxelu González Fernández lleva’l X Premiu Alfonso Iglesias de Cómic con ‘Cacique blancu’

L’ilustrador Anxelu González Fernández ye’l ganador de la décima edición del Premiu Alfonso Iglesias de Cómic cola obra ‘Cacique blancu’. El gallardón, entamáu pol Gobiernu d’Asturies, tien una dotación de 3.000 euros.

El xuráu encargáu de valorar les obres presentaes axuntó esti martes baxo la presidencia del director xeneral de Planificación Llingüística y Normalización, Fernando Padilla Palicio, y tuvo formáu pol artista gráficu Alberto Vázquez García, ganador de la edición pasada; Carolina González Rodríguez, autora de cómics; y Ernesto García del Castillo, Neto, autor de cómics y humorista gráficu.

Read Full Post »