‘Onde’l caos se texe y se destexe’ y ‘Hai una llinia trazada’ ente los llibros n’asturianu más vendíos nel 2022

La novela ‘Onde’l caos se texe y se destexe’, de Xulio Viejo, y los ensayos ‘Hai una llinia trazada’, de Xune Elipe, y ‘¡Volved las manos al bable!’, d’Inaciu Galán, tán ente los llibros escritos orixinalmente n’asturianu más vendíos nel añu 2022.

La primera ye una novela que conecta una historia personal, centrada nel conceyu de Quirós, cola d’Asturies y del mundu occidental. Esta obra yá mereció’l premiu al meyor llibru n’asturianu del 2021 de la Tertulia Malory de L’Entregu.

Per otru llau, ‘Hai una llinia trazada’ ye un ensayu qu’algamó’l XXVI Premiu Máximo Fuertes Acevedo del Principáu y qu’analiza la historia de la música asturiana, faciendo un repasu pelos periodos, movimientos y intérpretes más importantes, resaltando los datos y fechos que foron cruciales nel devenir de la nuestra música.

Read Full Post »

La industria editorial n’asturianu prevé publicar 34 novedaes nel 2022, onde destaquen les traducciones

Les editoriales asturianes van publicar nel 2022 un total de 34 novedaes, ente les que destaquen les traducciones de grandes noveles de la lliteratura universal, como ‘Roméu y Xulieta’ de Willian Shakespeare o ‘Les dos torres’ de Tolkien. Amás, tamién hai obres que tovía nun tán publicaes en castellanu, como ‘Guillem’, de la catalana Núria Cadenes.

Son un total de 34 novedaes de siete editoriales que van recibir ayudes del Gobiernu d’Asturies pa la promoción del llibru n’asturianu y en gallego-asturianu, yá sía pa obres orixinales o traducíos d’otres llingües.

Read Full Post »

Blanca Fernández algama’l “I Premiu Radagast de novela”

La escritora yerbata Blanca Fernández algama’l I #PremiuRadagast de novela fantástica, ciencia ficción y terror cola obra de fantasía urbana “Trovadoresca”, una novela de fantasía urbana. Blanca Fernández conviértese asina na novelista más moza de les lletres asturianes.

La obra, que compitió escontra otres dos más; ganó por unanimidá del votu del xuráu, que taba formáu pola traductora Aymara González Montoto, el collaborador de Refuelgu Adrián Carbayales y l’escritor Héctor Pérez Iglesias, qu’exerció de presidente.

Read Full Post »

José Ángel Gayol faise col primer premiu del Concursu de Cuentos pola Oficialidá

L’escritor José Ángel Gayol (Mieres, 1977) foi’l ganador del Concursu de Cuentos pola Oficialidá del Asturianu, que convoca’l Conceyu Bimenes y qu’esti añu llegó a la so edición númberu ventitrés. El primer premiu, dotáu con 600 euros, foi pa la so obra “Dalgunes posibilidaes de la domótica”. El segundu premiu, dotáu con 450 euros, foi pal cuentu “Instintu”, de Laura Marcos Domínguez (Mieres, 1982), y Xuan Trenor Allen (Uviéu, 1981) algamó’l tercer premiu –por segundu añu consecutivu– al que se-y apurren 300 euros, con “Xigomencia”. Nesta edición, a la que se presentaren once cuentos, el xuráu tuvo compuestu polos escritores Xulio Vixil Castañón, Héctor Pérez Iglesias y Paco Álvarez González.

Read Full Post »

Francisco Álvarez faise col primer premiu nel Concursu de Cuentos pola Oficialidá de Bimenes

Francisco Álvarez González (Xixón, 1970) foi’l ganador del Concursu de Cuentos pola Oficialidá del Asturianu, que convoca’l Conceyu Bimenes y qu’esti añu llegó a la so edición númberu ventidós. El primer premiu, dotáu con 600 euros, foi pa la so obra Rosa d’iviernu.

El segundu premiu, dotáu con 450 euros, foi pal cuentu La nieve nun ye blanco y el cuervu nun ye prietu (dalgunes coses, por embargu, sí lo son), de Xaime Martínez Menéndez (Uviéu, 1993), y Xuan Trenor Allen (Uviéu, 1981) algamó’l tercer premiu, al que se-y apurren 300 euros, con Cavilaciones d’un home enroldáu.

Read Full Post »

Les traducciones de ‘1984’ y dellos clásicos de la lliteratura infantil ente les novedaes n’asturianu p’anguaño

A lo llargo d’anguaño van llegar a les llibreríes les traducciones al asturianu de ‘Mecanoscritu del segundu orixe’, de Manuel de Pedrolo; y ‘1984’, de George Orwell; amás de dalgunos de los cuentos infantiles más conocíos de la lliteratura univeral, como ‘Capiellina Colorada’, ‘El gatu con botes’ o ‘El soldáu de plomu’.

Asina se pue ver na resolución de subvenciones pa la edición de llibros publicada esti miércoles 23 de xineru nel BOPA, onde se recueyen ayudes pa cerca de 40 títulos n’asturianu.

Read Full Post »

Bimenes entrega esti sábadu los premios del so XXI Concursu de Cuentos pola Oficialidá

El sábadu que vien, 1 d’avientu, el Conceyu Bimenes fai entrega de los premios del XXI Concursu de Cuentos pola Oficialidá del Asturianu. L’actu va tener llugar nel Muséu Casa de les Radios, allugáu en Suares, a les 19’00 hores.

Nel trescursu del mesmu’l ganador del certame, Héctor Pérez Iglesias (Arlós, Llanera, 1978) lleerá la so obra, “Que trata de lo que me cuntó’l mio mayestru al dexar l’abadía”, que llevó’l 1er premiu, al que se-y apurren 600 €. El 2u premiu, dotáu con 450 €, foi pal cuentu “Enkidu y la eternidá”, de Rubén Magadán Cosío (La Collá, Siero, 1985), y Armando Gutiérrez Rodríguez (Ciñera, La Pola Gordón, 1965) algamó’l 3er premiu, al que se-y apurren 300 €, con “Nun requexu”.

Read Full Post »

Pérez Iglesias lleva’l so segundu Concursu de Cuentos pola Oficialidá

El Conceyu de Bimenes ta acabante d’anunciar el fallu del XXI Concursu de Cuentos pola Oficialidá del Asturianu. El ganador d’esta edición ye Héctor Pérez Iglesias, yá premiáu nel 2012, gracies a ‘Que trata de lo que me cuntó’l mio mayestru al dexar l’abadía’.

L’autor d’Arlós ye un habitual d’esti gallardón lliterariu, ocupando’l podiu del mesmu en delles vegaes. Nesta ocasión, seis años depués, repite’l primer premiu, dotáu en 600 euros.

Read Full Post »

El poemariu ‘Un vasu d’agua’, d’Ángeles Carbajal, gana’l premiu Xuan María Acebal de Poesía

La escritora sierense María Ángeles Carbajal Roza resultó ganadora de la vixésima segunda edición del Premio Xuan María Acebal de poesía n’asturianu col poemariu ‘Un vasu d’agua’. El galardón, que concede la Conseyería d’Educación y Cultura, ta dotáu con 3.000 euros.

Ente les obres presentaes, el xuráu decidió por unanimidá conceder el premiu al so poemariu, que, según esplica l’acta, “trátase d’una reƚexón empática, na que’l tonu unitariu, intensu y coherente de la voz poética, a lo llargu de la obra, emociona al llector”. La obra presentóse baxo’l seudónimu *La ponte*. Abierta la plica, l’autora ganadora resultó ser María Ángeles Carbajal Roza.

La escritora, en declaraciones a Europa Press, confesóse “encantada de la vida” al conocer la noticia. Carbajal, que yá ganó esti mesmu premiu na so edición del 2014 con ‘L’aire ente la rama’ (el so últimu llibru publicáu), valora consiguilu una vez más más porque “nun ye fácil”. “Hai autores en ‘llingua asturiana’ bien bonos, que trabayen muncho y qu’escriben perbién, lo cual potencia la lliteratura n’asturianu”, añadió.

Read Full Post »

L’ésitu del Día de les Lletres Asturianes en Madrid asegura la so continuidá

El sábadu pasáu celebróse nel Centru Asturianu de Madrid el Día de les Lletres Asturianes, actu que contó con munchu públicu y collaboraciones de xente emigrao. Tres años ensin celebrase, Iniciativa pol Asturianu recuperó l’eventu, que tendrá continuidá.

L’actu entamó coles pallabres de Valentín Martínez-Otero, presidente del centru, que recordó’l sofitu de la entidá asturiana en Madrid a la cultura y la llingua asturiana y qu’agradeció a Iniciativa pol Asturianu la convocatoria de la celebración. Darréu, Marissa Bordallo, miembru d’esta organización, presentó l’actu y emponderó la disposición de Martínez-Otero pa entamar actividaes alredor de la llingua asturiana.

Read Full Post »