A dos alumnos del IES Santa Cristina de L.lena negáron-yos la posibilidá de dir a clase de llingua asturiana y deriváronlos a otra asignatura, según denuncia Iniciativa pol Asturianu. Una situación que según l’asociación vien pola falta d’hores del profesoráu otorgaes al centru dende la Conseyería d’Educación “y el desconocimientu pol IES de la posibilidá de pidir una ampliación de xornada”.
Al traviés d’una nota de prensa, Iniciativa afirma qu’esta situación nun ye única y que munchos centros “tienen una insuficiente cantidá d’hores del profesoráu d’asturianu”. Asina, denuncien que los contratos pal profesoráu son n’ocasiones d’hora y media a la selmana y que nos grupos axunten “hasta 30 alumnos de distintos niveles y grupos”.
La organización encamentó a los alumnos afectaos a reclamar al centru y al conseyeru d’Educación iguar la situación pa poder impartir l’asignatura, “tal y como garantiza la Llei d’Usu del asturianu de 1998 y una sentencia del Tribunal Superior de Xusticia d’Asturies, qu’establez que nun hai un ratio mínimu d’alumnos matriculaos”.
Iniciativa pol Asturianu pidió a la Conseyería d’Educación que se buscara solución a esti casu concretu, “y paRez que la situación ta en camín de solucionase”. Sicasí, afirmen que ye necesario “buscar soluciones que xeneralicen la presencia de l’asignatura ensin esti tipu de torgues cada comienzu de cursu”.
“Nun pue ser qu’un alumnu que quiera estudiar asturianu tenga que pasar per procesos de reclamación que convierten la matrícula nun actu de resistencia cívica, sinón que tienen que se poner toles facilidaes”, sentencia l’asociación.
(d’Europa Press, 13-09-2017)
Tierra alantre, la mesma fala 