L’Anuariu 2017 llama nel so editorial a una implicación de l’Alministración pa frenar la seca creativa

PABLO R. GUARDADO

Felpeyu protagoniza la portada del Anuariu de la Música Asturiana 2017, que dende esti vienres va distribuyise de baldre xunto con una esbilla musical en CD de creaciones editaes l’añu pasáu. Nel so editorial pon atención na seca creativa actual y llama a l’Alministración y a los medios públicos a implicase.

Baxo’l nome de ‘Un tiempo meyor’, esplica que “la creatividá musical asturiana ta nun momentu mui baxu: nun surden proyectos nuevos, la volatilidá de los pocos que se creen ye evidente, nun hai renovación xeneracional, les producciones discográfiques salen a cuentagotes…”. Una situación que, opinen dende l’Anuariu editáu por Goxe Producciones, se da baxo la pasividá de l’Alministración y de los medios de comunicación públicos, pola so capacidá pa da-y visibilización a los artistes y músiques que se faen anguaño nel país.

Read Full Post »

L’Anuariu de la Música analiza’l “les carencies” de la RPA y la “tercer revolución” del folk

Goxe Producciones vien de publicar el nuevu Anuariu de la Música Asturiana, referente al añu 2016, nel qu’ente otros coses, analízase’l papel y “les carencies” de la Radio Principáu d’Asturies nel contestu musical asturianu, asina como la “tercer revolución” del folk, no que cinca a tendencies y estilos nuevos.

Nuna nota de prensa, la editora informa de la publicación d’esti nuevu númeru, que será presentáu el xueves qu’entra nel llocal La Llegra d’Uviéu. Como ye vezu les temátiques céntrense n’estilos como la música tradicional, el folk, el rock o la canción d’autor, con secciones qu’inclúin reportaxes, informes, entrevistes, crítiques, opinión, cróniques, recoyida de material o anuncies.

L’Entamu, nesta ocasión titúlase ‘Una radio musicalmente asturiana’ y nél fálase del papel que tien que xugar la radio pública nel contestu musical asturianu, con bien de carencies y dificultaes, concluyendo que *La música propia del país ha tener un tratamientu fondu, seriu, permanente y tresversal na so programación*.

Read Full Post »

Fernando Valle Roso esplora la so vertiente ‘pop’ y llatina nel so nuevu discu

El cantante asturianu Fernando Valle Roso decidió poner un puntu d’inflexón na so carrera artística y salise de la so tradicional llínea de tonada pa esplorar nueves vertientes, nesti casu de la música ‘pop’ y llatina.

Fay-lo nel so nuevu discu ‘Con estes y otres palabres’, pal qu’ensin arrenunciar a la so llínea, bien marcada pola so esperiencia na tonada, quixo buscar los arreglos d’un profesional lo más alloñao posible del mundu de la música folk y tradicional. Y atopó al mexicanu Luis Fernando Chacón (de Chihuahua), especializáu precisamente en grupos pop y llatinos.

Read Full Post »

La Pola Siero va acoyer la gala del Premiu al Meyor Cantar

El vienres 30 va celebrase la gala del IX Premiu al Meyor Cantar nel Auditoriu de La Pola Siero. Anabel Santiago, Bacotexo, Fernando Valle Roso, La Tarrancha y Vrienden son los finalistes d’esta edición, que tien en cuenta les creaciones n’asturianu y gallego-asturiano del 2014 y 2015 al non convocase’l gallardón l’añu pasáu.

El direutor xeneral de Planificación Llingüística y Normalización, Fernando Padilla, presentó esta mañana, nun actu nel que tuvo acompañáu pol alcalde de Siero, Ángel Antonio García González ‘Cepi’, y pola miembru del xuráu Marta Mori, dicha gala del IX Premiu al Meyor Cantar, gallardón que convoca el Gobiernu pa premiar el meyor tema en llingua asturiana y gallego-asturiano del añu anterior “cola fin de consolidar, prestixar y arriquecer la creación musical asturiana”. Nesta ocasión pudieron participar les creaciones feches nel 2014 y 2015, yá que l’añu pasáu nun se celebrara esti gallardón.

Read Full Post »

La RPA fadrá programación especial na Selmana de les Lletres

La emisora pública asturiana RPA va emitir a lo llargo de la Selmana de les Lletres, ente’l llunes 4 y el vienres 8 de mayu, una programación especial por cuenta d’esta efeméride. Trátase d’una propuesta fecha dende Goxe Producciones que consiste nun paquete de quince pieces d’una duración de diez minutos, nelles van tratase temes como: 40 años de Conceyu Bable, historia de la llingua asturiana, la so situación na enseñanza, la creación lliteraria, la normalización social, la tresmisión xeneracional, la reivindicación llingüística, la música asturiana, el gallego-asturianu o los premios lliterarios del Gobiernu d’Asturies.

En formatu de reportaxe van tratándose toos estos asuntos, cola participación de más de trenta intervinientes de los más variaos campos, casu de Xosé Lluis García Arias, Xuan Xosé Sánchez Vicente, Lluis Xabel Álvarez, Ana Cano, Xulio Viejo, Penélope Miranda, Ramón d’Andrés, David Guardado, Iris Díaz Trancho, Pablo Xuan Manzano, Antón García, Esther Prieto, Ingnaciu Llope, Ismael Arias, Nacho Fonseca o Yolanda Huergo, ente otros munchos. De les quince pieces cinco van dedicase a ufiertar l’axenda diaria d’actos entamaos per toa Asturies que tienen como protagonista a la XXXVI Selmana de les Lletres, a dar una recomendación lliteraria y a una entrevista especial con profesionales d’ámbitos estremaos que falen n’asturianu del so llabor y esperiencies, ente ellos l’actriz María Cotiello, el deportista Fernando González o’l cocineru Lluis Nel Estrada; quierse con ello dar una visión de normalidá na comunicación en llingua asturiana, amosando’l so valir como ferramienta d’espresión válida pa la sociedá actual.

Read Full Post »