“Vamos trabayar pa que’l máximu de partíos lleven la oficialidá nel programa eleutoral y de manera clara”, avanza Llera

PABLO R. GUARDADO 

El sábadu celebróse nel salón d’actos del Conseyu de la Mocedá de Xixón el IV Congresu y Xunta Xeneral d’Iniciativa pol Asturianu. Iván Llera, presidente del coleutivu dende’l 2019, presentóse a la reeleición, algamando’l sofitu de les socies y socios, p’afrontar con una xunta direutiva anovada y paritaria 3 años más nos que la reforma del Estatutu y la oficialidá van tornar a ocupar l’axenda política.

“El principal oxetivu que nos marcamos pa esti tiempu son les eleiciones muncipales y autonómiques. Vamos trabayar pa que’l máximu de partíu lleven la oficialidá nos sos programes electorales, y de manera clara, pa consiguir esa mayoría necesaria pa poder reformar l’Estatutu d’Autonomía”, asegura’l periodista xixonés, que relevara nel cargu a Inaciu Galán, primer presidente d’Iniciativa pol Asturianu, que va siguir na xunta direutiva como vocal.

Read Full Post »

RTVE opta pol topónimu castellanizáu cuando esisten formes billingües

El Defensor de l’Audiencia del ente públicu púnxose en contautu con Iván Llera pa disculpase pol error y ampliar la so respuesta.

RTVE toma como referencia’l Rexistru d’Entidaes Llocales del Ministeriu de Facienda y Alministraciones Públiques pa emplegar los topónimos de cada llugar, informó Ángel Nodal esta mañana al periodista xixonés. Una llista que se completa col Nomenclátor del Instituto Nacional de Estadística (INE).

Read Full Post »

Iniciativa califica de “llamentable” que’l PSOE de Siero aceptara refugar una moción por tar n’asturianu

Iniciativa pol Asturianu calificó como “llamentable” que l’alcalde socialista de Siero aceptara refugar una moción de Somos nel plenu de Siero por tar n’asturianu énte la protesta de Vox.

El presidente d’Iniciativa pol Asturianu, Iván Llera, comentó al traviés de nota de prensa que “ye incomprensible qu’un alcalde de la FSA-PSOE nun almita una moción pola cenciella razón de que tea escrita n’asturianu”.

Read Full Post »

El Conseyu Asesor de Política Llingüística complétase colos cuatro representantes de les instituciones

Un total de 32 persones van componer el Conseyu Asesor de Política Llingüística que se va constituyir esti xueves telemáticamente. Amás de los 3 miembros de la Conseyería de Cultura, Política Llingüística y Turismu y los 25 designaos pola presidenta del organismu, Berta Piñán, hai que sumar los 4 representantes de l’ALLA, Universidá d’Uviéu, RIDEA y RTPA.

Pola Academia de la Llingua Asturiana (ALLA) va participar nel aconceyamientu de mañana’l so secretariu Xosé Ramón Iglesias Cueva, anque la intención de la institución académica ye que vaya alternando col presidente Xosé Antón González Riaño, según disponibilidá. Mentes, el rector Santiago García Granda va facelo pola Universidá d’Uviéu.

Read Full Post »

Cultura inclúi nel Conseyu Asesor de Política Llingüística a 25 persones de diversos ámbitos de la sociedá asturiana

La Conseyería de Cultura, Política Llingüística y Turismu del Gobiernu asturianu abrió’l Conseyu Asesor de Política Llingüística a 25 persones procedentes de diversos ámbitos de la sociedá asturiana.

Nel organismu, presidíu pola conseyera Berta Piñán, van tar presentes tamién los responsables, o les persones na que deleguen, de la Universidá d’Uviéu, l’Academia de la Llingua Asturiana (ALLA) – , el Real Institutu d’Estudios Asturianos (Ridea) y Radio Televisión del Principáu d’Asturies (RTPA).

Read Full Post »

Iniciativa reclama a los partíos “cumplir col compromisu” de que l’ALLA cuente con un partida nos PXE

Iniciativa pol Asturianu reclamó’l compromisu del Gobiernu d’España y de los partíos pa dotar d’una partida pa l’Academia de la Llingua Asturiana (ALLA) nel borrador de los Presupuestos Xenerales del Estáu (PXE).

Al traviés de nota de prensa, el presidente d’Iniciativa, Iván Llera, recordó qu’esta propuesta recibió l’apoyu de en PP, PSOE, IX, Podemos o Foru. “Cuando aconceyamos colos representantes asturianos nes Cortes siempres atienden esta reclamación” apuntó Llera.

Una partida que, según Llera, permitiría “igualar l’asturianu coles demás llingües d’España y en definitiva llogra poner nel llugar que-y cuerrespuende a la institución más importante pal idioma”.

(d’Europa Press, 09-10-2020)

Read Full Post »

Iniciativa pol Asturianu pide que l’asturianu tenga pesu na puntuación de les convocatories del Gobiernu d’Asturies

Iniciativa pol Asturianu pide que l’asturianu tenga pesu na puntuación y na baremación de les convocatories y concursos del Gobiernu d’Asturies. La organización espresó al traviés del so presidente, Iván Llera, la reclamación de que l’idioma tien que tener un pesu específicu nes diferentes campañes qu’entame’l Gobiernu del Principáu al traviés de los concursos públicos.

Llera aclaró que “a lo llargo de la selmana pasada hubo una ufierta pública sobre señalización d’espacios turísticos que nun facía nenguna referencia al asturianu o al usu de la toponimia tradicional de los llugares. Resulta mui llamativo qu’esta ufierta na que nun ta presente esa importancia del asturianu na baremación de la puntuación venga precisamente de la Conseyería de Cultura, Política Llingüística y Turismu. Nun puede ser que pal área de Gobiernu que tien les competencies de política llingüística l’idioma nun tenga un papel importante”.

Read Full Post »

Iniciativa pol Asturianu considera mui negativo que se dean pasos atrás nel procesu de normalización de la toponimia

Iniciativa pol Asturianu refuga posibles cambeos na toponimia oficial de Valdés. El presidente de la organización, Iván Llera, afirmó que ye «mui negativo» que se dean pasos atrás nel procesu de normalización de la toponimia. «Esta decisión ye un precedente mui negativu pa tol trabayu fechu hasta agora en materia de política llingüística, de recuperación y de normalización de los topónimos tradicionales”.

Llera apuntó que “el Gobiernu d’Asturies, que tien la máxima responsabilidá y competencies como recueye la Llei d’Usu nesti asuntu, tien qu’evitar esti tipu de midíes que suponen un precedente mui negativu que va contra l’espíritu de la propia Llei. La voluntá que recueye la Llei d’Usu ye la de recuperar la toponimia tradicional, nun escaecela y facer normal los nomes tradicionales de los pueblos”.

Read Full Post »

¿Yes youtuber?

ARA IGLESIAS

Potenciar l’usu de la llingua asturiana d’una forma risondera y da-y visibilidá. Con esti oxetivu nació’l concursu ¡Yes Youtuber!, qu’acaba de fallar los ganadores d’esta primer edición. El proyectu, entamáu pola plataforma PlayPresta y Cuatro Gotes Producciones, inclúi siete premios, dirixíos sobremanera a estudiantes y a mozos creadores.

El xuráu aconceyó’l 18 de xunu y tuvo formáu por Daniel Rodríguez Blanco, realizador audiovisual, Nuria López García, directora comercial de PlayPresta, Lluis Fanjul Quelle, realizador audiovisual, Rebeca Montoto Losada, estudiante d’audiovisuales, Alba García Fernández, estudiante de márketing, Iván Llera Huerta, periodista y como secretariu, Inaciu Galán, periodista y director de PlayPresta.

Read Full Post »

Iván Llera: «Nesta llexislatura qu’entama hai una clara mayoría qu’apuesta pola oficialidá»

ARA IGLESIAS

El periodista Iván Llera toma’l relevu d’Inaciu Galán, tamién periodista, al frente d’Iniciativa pol Asturianu.

¿Cuálos son los sos primeros oxetivos?
Lo primero, caltener el ritmu de trabayu y siguir medrando como organización. Queremos tar más presentes nos conceyos. Lo más inmediato, rematar colos preparativos del estand na Feria de Muestres de Xixón, onde por tercer añu consecutivu va haber un espaciu acutáu pal asturianu.

¿Cuála cree que foi la mayor aportación d’Iniciativa al impulsu de la llingua asturiana?
Bono, creo que’l trabayu d’estos años contribuyó a una meyor imaxe del movimientu de vindicación llingüística. Ye dalgo mui importante. Fuimos quien a conectar con xente mui distinto. Incluso xente que nun ta d’alcuerdu con nós valora’l nuesu trabayu. Esi ye’l camín.

Read Full Post »