Cinco grupos finalistes compiten na gala del VII Premiu al Meyor Cantar, que celebrarase nel teatru de la Llaboral

El próximu vienres día 1 de marzu tendrá llugar la Gala d’entrega del VII Premiu al Meyor Cantar. L’escenariu sedrá’l Teatru de la Llaboral, en Xixón. L’actu entamará a les 20:30 hores y la entrada será llibre. Amás, será posible siguilu pela TPA.

El 19 de xineru cerró’l plazu pa que los interpretes o grupos interesaos solicitaren la so participación nesta sétima edición del premiu. Un xuráu formáu por espertos en música y llingua asturiana escoyó d’ente los presentaos a los cinco finalistes, qu’actuarán en directo na Gala d’Entrega del Premiu’l 1 de marzu.

Read Full Post »

L´asturianada ensin repolitar presta más

AURELIO ARGEL

El año recién termináu remató entregando trabayos variaos cola asturianada como protagonista. Delles voces d’esta asturianada apurrieron discos curiosos con tratamientu, acompañamientu, producción y presentación estremáes que son exemplu de pluralidá y riqueza pero tamién de cómo entender, sentir y tratar -o saber tratar – el xéneru más representativu de la música d’esti país. Títulos y pieces perclásiques, arranxos sobre la tradición, igües curiosines y hasta temes novalinos apaecen con pesu en «Poema sinfónico» de la Banda Gaites «Noega», grabación conxunta con otros artistes y tamién, d’otros modos, a manera de cantares populares reibilicoquiaos con otros sones, alcuéntrense nel discu de Fernando Valle Roso «Camín d’ayures» (EveryGoodSong) que llevó’l premiu a «Meyor discu del añu» pa la Crítica de la RPA. D’igual manera les grabaciones cencielles pero necesaries qu’entrega añu ente añu la Fonográfica Asturiana contaron con «Recordando mi niñez», de la veterana María Teresa González Soto, acompañada a la gaita por unu de los grandes del xéneru, Óscar Fernández, y que ya recibi’l premiu de la Crítica de RPA a «Meyor discu del añu» na estaya de canción asturiana. Pero sobremanera, hai tres títulos de rescample pa señalar: «Aire», «Cancios y asturianáes» y «Cola lluz de l’alborada.

Read Full Post »

Soncai System asoleya’l so discu nuevu, “Revolusón”

Goxe Producciones, marca baxo la que s’integra, ente otros, Discos L’Aguañaz, espubliza’l discu nuevu del afamáu grupu asturianu Soncai System, entituláu “Revolusón”. Despliquen dende Goxe que “Soncai System ye’l proyectu onde trabayen a comuña dos nomes perbién conocíos de la escena sonora asturiana, Xune Elipe y Sergio Rodríguez, al que se xunten otros tamién importantes como Vito Álvarez, Aique García, Delfín Valdés, Miguel Herrero, Fran Carrio, Eladio Díaz, Fabián Zapico o Jacobo de Miguel, ente otros”.

Read Full Post »

Ámbitu edita «Aire», ún de los trabayos más innovadores de la nuestra música

Publicaciones Ámbitu presenta, el xueves 13 d’avientu, na sé uviedina de la SGAE, el discu Aire, ún de los trabayos más innovadores de la música tradicional asturiana y que firmen Xuan Nel Expósito, Jacobo de Miguel, Mapi Quitana, Marta Arbas y Anabel Santiago. El discu axunta, nun mesmu proyectu, a tres de les voces más poderoses de la música asturiana, les d’Anabel Santiago, Marta Arbas y Mapi Quitana, a les qu’arropen l’acordión de Xuan Nel Expósito y el pianu de Jacobo de Miguel. Amás, esti elencu de lluxu cuenta cola collaboración, en dellos temes, de los grupos folk Felpeyu y La Pingarata.

Aire ye un discu de música tradicional pero nun ye un discu de música tradicional al usu. Aire ye un discu sorpendente y innovador que se concibió para resaltar el papel de l’acordión diatónica na música asturiana de raigón y que, al final, acaba llevándolu, con éxitu, hacia fronteres nueves. Aire ye un discu elegante, creativu y enllenu de recursos, onde música y voz nun se pisen, arrópense, y onde lleguen a xenerarse pieces musicales d’una guapura y atractivu indudables.

Read Full Post »

Wolfe: “El Liet representa una oportunidá pa la mio banda, la música y la llingua asturiana”

PABLO R. GUARDADO

Asturiana Mining Company convirtióse na sesta formación en ganar el Premio al Meyor Cantar gracies a la vaqueirada ‘Si nun conoces Vaḷḷouta’’. Michael Lee Wolfe (Pittsburgh, 1962) ye’l fundador d’esti grupu folk asturianu.

‘Si nun conoces Vaḷḷouta’…
“Si nun conoces Vaḷḷouta nun digas conocer´l mundu”, una frase netamente asturiana por actitú y conteníu. Ye una lletra que nos quedó perguapa. Como diz la cancion, Vaḷḷouta ta “… a la vera’l Carrielḷḷu onde los clavos de Cristu / saliéronse del maderu…”.

Read Full Post »

De Miguel, Wolfe y Quintana: “‘Xota pa tres’ representa un averamientu inéditu a la música asturiana”

PABLO R. GUARDADO

Jacobo de Miguel (Uviéu, 1973), Michael Lee Wolfe (Pittsburgh, 1962) y Mapi Quintana (Mieres, 1976) conformen un tríu que ta dando muncho que falar. El so primer trabayu, ‘Xota pa tres’, nun para de recibir allabancies.

‘Xota pa tres’ ta teniendo mui bones crítiques. ¿Esperábenlo?
Quintana: Yo suponía que les crítiques podíen ser bones, porque’l trabayu ta mui bien fechu. L’interés de los medios de comunicación ta siendo grande y eso sí que me sorprendió un poco más. Nun sabía que la música que facemos –non mui comercial que se diga– podía espertar tantu interés.

Wolfe: Agradacemos los comentarios. Paez que gusta’l discu. Y oxalá nestos tempos complicaos podamos presentalo en munchos llugares d´Asturies. Pero, de toes formes, ye una grabación que tien qu’abrir güecu internacionalmente y queda por ver si tamos capaces d’ello.

De Miguel: Creo qu’esti trabayu representa un averamientu inéditu a la música asturiana. Nesi sen, entiendo que ye normal que nun pase desapercibíu, porque abre una puerta nueva nel desarrollu de la nuesa música, poniéndola en contautu con músiques y sensibilidaes qu’hasta agora paecíen permanecer alloñaes d’ella.

Read Full Post »