Delles especulaciones sobre Marirreguera

ANTÓN GARCÍA

Faigamos recuentu: d’Antón de Marirreguera nun conocemos nin una sola obra autógrafa, nin se conserva papel nenguno escrito pela so mano (nin siquiera nos llibros sagramentales de les parroquies onde ofició de cura, porque se perdieron na última guerra). Los ilustraos que lu estudiaron nel sieglu XVIII apúrrennos datos a veces contradictorios, pero nin un solu encontu documental: naide copia la so partida de bautismu o defunción, nun hai testimoniu contemporaniu que nos fale d’él, y si sabemos qu’en 1639 ganó un premiu col so poema a les cenices de Santa Olaya ye porque esos ilustraos y los sos fíos nos tresmitieron lo que vieron nun manuscritu d’Andrés Mendo, xesuita. El retratu que conocemos de Marirreguera ye modernu y débese al taller creativu de Jesús Evaristo Casariego, el so Archivo Gráfico Universal, al que namás hai qu’echa-y en cara que nun-y sacara más rendimientu, falsificando al por mayor la iconografía asturiana del Renacimientu p’acá.

Xulio Viejo estudia con detención, en 1997, too lo que nos llegó de Marirreguera y da la impresión de que s’afrella contra la muria ilustrada: poques coses hai, cásique nenguna, que nun lleguen a nós ensin pasar pela peñera de Carlos González de Posada. Viejo párase llargamente a desentellizar la posibilidá de que’l poeta usara l’apellíu González y tamién Álvarez o Álvari, que pudo ser el del padre, pol que dacuando lu cita Posada, colo que l’arcipreste de Carreño amiya envolubráu nuna borrina histórica sorprendente si tenemos en cuenta que namás nos separen d’ellí cuatrocientos años. Llegónos a través de Posada la lleenda de que tando pa morrer mandó al sobrín, el tamién cura Xuan Rodríguez Reguera, quemar un paxu enllenu de manuscritos qu’había baxo la cama, esmolecíu pola fama póstuma: “Nun se diga qu’un cura s’entretuvo nesto”, “aludiendo -diz Posada- a que eran obras profanas” y describíen cualquier tema con demasiada naturalidá, hasta la luxuria.

Read Full Post »

César Feito, poeta de la braña

ANTÓN GARCÍA

A finales de 2012 foi noticia Daniel Prisacar, un nenu moldavu aliellu y falador de siete años que vive en Navelgas (Tinéu). Resultó brillante y inesperáu ganador del concursu «César Feito» que lleva quince años convocando pal asturianu l’Ayuntamientu de Tinéu, un certame dirixíu a menores de dieciséis años con premios dividíos por categoríes d’edá y que recibe cada añu decenes y decenes d’orixinales. Daniel Prisacar ganó na estaya de menores d’ocho años con un cuentu que salió publicáu nestes mesmes páxines de «La Nueva Quintana» en La Nueva España: «L’arqueólogu».

Pero nun quiero falar agora d’esi nenu que declaró mui esfotáu querer ser escritor y que nos sos planes entraba escribir un cuentu más llargu y vendelu, sinón del poeta que da nome al certame, esa solombra que se llama César Feito y que nun aparez en nengún manual de lliteratura asturiana. Nun voi ser yo quien-y quite la condición de poeta apócrifu, pero non por eso dexa de ser un escritor con biografía y obra escrita, poco conocida, que dalgún día taba bien recuperar.

Read Full Post »

Pela maraña carlista

ANTÓN GARCÍA

Contaba Balbina Suárez, vecina de Cadavéu, cómo Casimiro Cienfuegos llegara a visitar en plena guerra (cuando yá cayera Asturies) a un doliente Padre Galo, echáu na so chaise longue de bambú, pocu tiempu enantes de qu’esti ingresara nel Hospital Asilu de Villar, onde diba morrer. Cienfuegos apareció vistíu con un traxe que-y fixeren les tíes en casa, compendiu de lo que yera’l llamáu Movimientu Nacional: camisa azul falanxista, corbata negra, chaqueta blanca a lo Serrano Suñer, correaxe militar y boina colorada de los requetés. El Padre Galo, que firmaba lliterariamente como Fernán-Coronas, animóse cola visita y pidió-y la boina, qu’apretó contra’l pechu y dixo: «¡Qué pena, eh Mirín, qué pena!». ¿El Padre Galo simpatizante carlista? Nesi momentu guapamente sí, muncho más que falanxista o nacional sindicalista, novedaes ideolóxiques que nun diríen gran cosa a quien s’identificaba como conservador y monárquicu alfonsín, quiciabes más d’Alfonso III el Magnu que d’Alfonso XIII, al que vio con pena marchar al exiliu.

Read Full Post »

Pepín de Pría en zapatiyes

ANTÓN GARCÍA

Cuando llegué a la semeya de Pepín de Pría quedé maraviyáu. En 1993, mientres preparaba los materiales qu’ilustraríen el mio llibru «Lliteratura asturiana nel tiempu» (editáu al añu siguiente), andaba esmolecíu porque llevara fotografíes de los escritores asturianos. Nun yera xera fácil. Si quitamos l’interesante llabor gráficu de la Gran Enciclopedia Asturiana, l’únicu autor que tuvo dalgún precuru por mostrar el rostru de los escritores foi Españolito, la pieza clave de los estudios biográficos n’Asturies. Ye tanta la importancia que tien nel nuesu tiempu la imaxe, que cuando consigues poner cara a un escritor d’époques pasaes parez que tas más cerca d’él, que lu entiendes meyor. Asina s’esplica’l rebumbiu llográu nel mundu enteru que determináu cuadru, que lleva sieglos nes manes de la familia británica Cobbe, s’anuncie como retratu de Shakespeare fechu en vida del inmortal escritor. Como si poder observar per un momentu’l so verdaderu rostru (un poco belisgu na mirada, hai que dicilo) nos permitiera tamién asomanos al so espíritu creativu.

Read Full Post »