Feeds:
Antradas
Comentairos

Posts Tagged ‘José Ángel Gayol’

El llunes 27 d’avientu de 2020 a les 18:00 hores, axuntó de forma telemática’l xuráu del Premiu de la Crítica de l’Asociación d’Escritores d’Asturies (AEA) na categoría de narrativa n’asturianu, conformáu polos escritores María Luz Pontón, José Ángel Gayol, Víctor Suárez Piñero ya Inaciu Galán, ayalgueru de l’AEA, como secretariu con voz pero ensin votu.

Tres destacar el contentu pola bona participación y sobre manera pola calidá de les trés obres presentaes como candidates al premiu, lo que pal xuráu fala del bon momentu del  panorama de la narrativa n’asturianu, aldericóse sobre les mesmes, tomándose por unanimidá’l determín de declara ganador del premiu al llibru Skull City y otres histories, d’Adolfo Camilo Díaz, asoleyáu por Ediciones Trabe.

(more…)

Read Full Post »

Ediciones Trabe espubliza esti mes de payares la nueva obra del escritor mierense José Ángel Gayol. Nesti casu, la obra titúlase Los cuerpos celestes, un llibru nel que se recueye diez cuentos de distintes factures nos que predomina’l reflexu d’un modelu d’escritura realista. Vides anónimes nes que la rutina apodera con too hasta que daqué inesperao pasa franciendo la cotidianidá d’unos personaxes siempres en movimientu. Esi rompimientu val-y al narrador p’abrir la posibilidá de la introspección y l’autoanálisis y amuesa lo que de ficción hai nes rellaciones humanes. Con un ritmu narrativu bien lleváu y un llinguaxe claru, tresparente y certeru, l’autor fai un retratu individual y colectivu d’una sociedá desnortiada y a la busca d’una felicidá qu’igual nin tan siquiera existe.

(more…)

Read Full Post »

José Ángel Gayol (Mieres del Camín, 1977) ye escritor y críticu lliterariu d’amplia formación y inquietúes varies. Poeta de voz propia (Los poemes del oriental, 2013; El llibru de les coses misterioses, 2013; Los suaños y los díes, 2014; y Una selmana y otros díes, 2015), mostróse como ensayista amenu y arteru en Vértigu. L’atracción del abismu na sociedá contemporánea (2016), col qu’algamó’l Premiu «Máximo Fuertes Acevedo» d’Ensayu 2015; Exercicios d’asturianu (2016), recopilación de testos a mediu camín ente l’artículu lliterariu y d’opinión, y l’espléndidu y novedosu El silenciu invisible (2020), Premiu «Máximo Fuertes Acevedo» d’Ensayu 2019. Avezáu escritor con alma d’ensayista, tien escritu’l diariu En primera persona (2019), nel que s’amuesa como agudu observador y rexistrador de la realidá al empar qu’indagador de la verdá. Como narrador diose a conocer cola guapa novela Argonautes (2007), a la que siguió La xeometría secreta del azar (2020). Nel 2021 ganó’l Premiu de Novela «Xosefa Xovellanos» cola obra La cafiante muerte de Nicolai Bostov.

1. Proponga un menú lliterariu: entrada, platu principal y postre.

Empezaría con tres entrantes diversos, líxeros y fondos al empar, pero excelentes a tolos niveles: La conxura de los necios, de John Kennedy Toole, La sombra sobre Insmouth, de H. P. Lovecraft, y un cuentu de Chejov. Pa platu principal escueyo una novela maraviyosa: El Monte Máxicu, de Thomas Mann. Pal postre prefiero dalgo dixestivo y revitalizante: cualquier novela de P. G. Wodehouse.

2. ¿Cuál foi l’últimu llibru que sacó n’empréstamu d’una biblioteca?

La trama oculta, una antoloxía de cuentos de José María Merino.

3. ¿Qué escena lliteraria-y vien nesti momentu a la mente?

Jaime Febrer na engarradiella final pol amor de Margalida “Flor d’almendral”, na novela de títulu penosu llamada Los muertos mandan, de Vicente Blasco Ibañez.

4. ¿Namoróse de dalgún personaxe lliterariu?

Home, namorase lo que se diz namorase… Habría que fumar o esnifar dalguna sustancia estupefaciente p’aportar a esi nivel. Metafóricamente, de Margalida “Flor d’almendral”.

5. Suxera una tríada de poetes.

Antonio Machado, Walt Whitman, Erik Lindegren

6. ¿Cuála foi la (o les) Biblioteca de la so vida?

La biblioteca de Mieres, enantes de que la remocicaran. Los suelos yeren de madera, y al caminar chascaben les tables. El silenciu respetuosu de la llectura tenía, pamidea, un acompañamientu perfectu nesa música de pasos tímidos. Foi una pena que quitaran esi suelu. Aínda sueño a vegaes cola biblioteca, entrando de frente, les escaleres, les puertes de cristal, la mesa de les bibliotecaries namás terminar les escaleres, la sección infantil a la manzorga y la d’adultos, onde entraba a escondidielles, tamién a la manzorga, al llau de la sala infantil y xuvenil. A la mandrecha abríase la sección de consulta y estudiu. Guapísima.

7. ¿Con qué llibru espertaría l’amor a la llectura nun adolescente?

Nel mio casu, Venti mil llegües de viaxe submarín, de Julio Verne (asina, col nome castellanizáu).

8. Cite trés novelistes pa siguir por cualquier llector.

Amelie Nothomb, Richard Ford, Jean Echenoz.

9. Proponga una midida a favor de la difusión de la llectura.

Sustituir por llei los programes del corazón por tertulies lliteraries ensin babayos.

10. ¿Quién son los sos compositores o músicos favoritos?

Pachevel, Dvorak, Sivelius, Chaikovski, Borodín, Rimski-Korsakov… Y nesti sieglu pasáu o entrando yá nel qu’andamos: Elvis Presley, Bruce Springsteen, Franco Battiato, The Corrs, James Blunt, Dido, Tracy Chapman, Adele, Twenty One Pilots… Salvo casos contaos, soi más de canciones que de músicos.

11. ¿Dalguna llectura marcó especialmente la so vida?

Dende llueu, Julio Verne espertó l’amor seriu pola llectura. Pero Pío Baroja foi quien m’abrió les puertes a la lliteratura pa siempre. Quizás Cien años de soledad fizo que pensara n’escribir como oficiu. Curiosamente, nunca nun me gustó demasiao’l realismu máxicu.

12. ¿A qué autor rescataría del escaecimientu?

A Colette y a Emmanuel Bove.

13. De xuru que podría aconseyanos la visión de polo menos trés películes.

¡Qué bello es vivir!La jungla de cristalReservoir Dogs. Pero podría dicir munches más: el cine y la lliteratura son les dos grandes pasiones míes. Ensin dulda, faltaríame CasablancaEl sueño eternoETTerminator y Terminator 2Regreso al futuroRockyGladiatorAcorraladoBlade Runner

14. ¿Qué poema interpreta los sos sentimientos?

Cualquiera de León Felipe, según el momentu.

15. ¿Cómo ve’l panorama editorial asturianu?

Véolu bien, con variedá d’editoriales d’altor. Seique faltaríen periódicos o revistes, más qu’editoriales. El panorama editorial ta faltu de dellos proyectos sintomáticos d’una lliteratura normalizada, pero non de bonos y bones editores.

16. ¿A qué sitiu salíu de la imaxinación d’un autor-y prestaría treslladase?

Al universu y a la carne de Robinette Broadhead, el protagonista de los llibros de la saga Pórtico, de Frederik Pohl.

17. Los sos artistes más almiraos son…(referío a pintores, escultores, fotógrafos, arquitectos… etc.)

Los pintores románticos del XIX, en particular Caspar David Friedrich.

18. L’últimu llibru que mercó foi…

Los extraños, de Jon Bilbao.

19. ¿Pue l’e-book reemplazar el formatu clásicu?

Dúldolo muncho. Convivir, sí. De fechu, la gran mayoría de llibros que lleo ye con un ereader. Pero son llibros técnicos o profesionales, pa trabayar con ellos. Pa lleer lliteratura, quiero papel.

20. ¿Podría dicinos cómo ordena la so biblioteca personal?

Como pueo… Según merco llibros métolos en caxes de cartón y voi asitiándolos nos estantes a midida que los lleo. Un sección d’ensayu colo llibros acuriosaos n’orde alfabéticu por autor. Otra sección de narrativa según el mesmu criteriu. Y la última sección pa poesía y teatru. Últimamente, tomé’l propósitu de lleer más llibros de los que merco, reducir la biblioteca y tener más sitiu pa llibros futuros. Voi cumpliendo.

21. ¿Ónde quedría vivir?

En munchos llugares, pero tocóme Asturies.

22. ¿A qué persona viva almira?

A los mios fíos, Claudia y Martín. Tienen seis años y yá son bones persones. Pero lo que más almiro ye que caldía intenten ser meyores persones aínda. Cuido que los adultos tendríemos qu’abrazar el mesmu enfotu.

23. Al so paecer, ¿cuála ye la meyor obra lliteraria adaptada pol cine?

El Quixote, quiciás. En realidá tas preguntándome pola meyor obra de la lliteratura universal, y esa pregunta implica una respuesta difícil. Pero si me preguntaras pola meyor película qu’adapte una obra lliteraria, respondería El Padrino.

24. ¿Qué ta lleendo actualmente?

Normalmente, lleo varios llibros al empar y voi encadenando’l final d’unos col empiezu d’otros. Terminé hai poco una novela de T. C. Boyle (Una libertad luminosa) sobre’l descubrimientu y esperimentación posterior del LSD, Los extraños, del mio amigu Jon Bilbao, una novela de zombis (El alzamiento, de Brian Keene), y una antoloxía de rellatos de José María Merino (La trama oculta). Agora toi lleendo los Cuentos del oeste, de Bret Harte, un ensayu sobre inversión en dividendos (The Ultimate Dividend Playbook, de Josh Peters), un ensayu sobre la hiperinflación na Alemaña de los años 1922 y 1923 (Cuando muere el dinero: El derrumbamiento de la República de Weimar, d’Adam Fergusson), El arte de prudencia de Gracián (que lleo de contino), ¿Qué es esa cosa llamada ciencia?, d’Alan F. Chalmers, un ensayu adictivu y claru sobre filosofía de la ciencia, y acabo entamar un ensayu históricu qu’esplica nel títulu de qué va: 1688. La primera revolución moderna, de Steve Pincus.

25. ¿Pa qué val la llectura?

Pa comprender el mundu, pa comprendese, pa escapar del mundu, pa escapar de la vida, propia y ayena… Si llees con criteriu, pa ser meyor persona.

(de Biblioasturias, 30-11-2021)

Read Full Post »

Les editoriales asturianes van publicar nel 2022 un total de 34 novedaes, ente les que destaquen les traducciones de grandes noveles de la lliteratura universal, como ‘Roméu y Xulieta’ de Willian Shakespeare o ‘Les dos torres’ de Tolkien. Amás, tamién hai obres que tovía nun tán publicaes en castellanu, como ‘Guillem’, de la catalana Núria Cadenes.

Son un total de 34 novedaes de siete editoriales que van recibir ayudes del Gobiernu d’Asturies pa la promoción del llibru n’asturianu y en gallego-asturianu, yá sía pa obres orixinales o traducíos d’otres llingües.

(more…)

Read Full Post »

L’escritor Pablo Rodríguez Medina (L’Entregu, 1978) foi’l ganador del Concursu de Cuentos pola Oficialidá del Asturianu, que convoca’l Conceyu Bimenes y qu’esti añu llegó a la so edición númberu venticuatro.

El primer premiu, dotáu con 600 euros, foi pa la so obra ‘En brazos de naide’. El segundu premiu, dotáu con 450 euros, foi pal cuentu ‘Enguedeyos y mentires’, de Solinca Turbón Cuesta (La Felguera, 1981), y Gonzalo González Barreñada (Sotrondio, 1973) algamó’l tercer premiu al que se-y apurren 300 euros, con ‘La muerte d’acebache’.

(more…)

Read Full Post »

El programa Asturies, Cultura en Rede ufierta un percorríu poles lletres asturianes con un ampliu programa d’actividaes de los circuitos de lliteratura y Autores nel Camín pal mes d’ochobre. Asturies, Cultura en Rede ye un proyectu de la Conseyería de Cultura, Política Llingüística y Turismu, realizáu en collaboración colos conceyos asturianos y xestionáu pola Sociedá Pública de Xestión y Promoción Turística y Cultural del Principáu d’Asturies, que tamién incluye circuitos temáticos d’artes escéniques, Xacobéu, artes visuales, música y cultura tradicional por distintos conceyos del Principáu.

17 actividaes en 13 conceyos conformen la programación del circuitu de lliteratura pal mes viniente. Tras la Puerta Títeres va llevar Cuentos de casa a Castrillón, Gozón y Noreña; El Arca de Mozart, Operación Zanahorias, a Mieres, y ¿A qué suenan los libros? a Cuaña; Carlos Alba Cellero, La Caja Mágica, a Ribeseya; Elisabet Martín Teatro, Descubriendo a Gloria Fuertes, a La Ribera; y Producciones Viesqueswood, Asturias: voces femeninas de nuestra historia, a Tinéu. Va haber un alcuentru lliterariu con Xaime Martínez en Llangréu y va esponese en Gozón el poemariu ilustráu Una mitología. Seres y mitos del norte con alcuentru colos sos autores, Aurelio González Ovies y Toño Velasco, incluyíu. Storytellers va actuar en Cangas; El Velcro, en Llangréu; y Puppys, en Cuaña y Llaviana. Tamién van realizase los talleres Palabras como llaves, de Musa Cafeína, en Grau y La Ribera, y El sombrero que voló ¡Ilústralo tú! con Pintar-Pintar Editorial en Villaviciosa.

A esto súmense 14 alcuentros n’ocho conceyos con autores ganadores de los premios convocaos pola Conseyería de Cultura, Política Lligüística y Turismu nel marcu del circuitu d’Autores nel Camín: con Emma Méndez, n’A Veiga y Santalla d’Ozcos; con Factoría Norte, en Llangréu; con Xune Elipe, en Xixón; con  Alejandro Fernández-Osorio, en Xixón y L.lena; con José Ángel Gayol, en Llangréu; con Sidoro Villa, en Xixón y Corvera; con María José Fraga, en Cuaña; con Alberto Vázquez, en Xixón y Llangréu; y con Inaciu Galán, n’Avilés y en Xixón (esta postrera, una cita lliteraria na que tamién va tar Vero Suari).

Nel marcu del circuitu d’artes escéniques va haber 17 funciones en 13 conceyos: Blancanieves XXI, de Guayominí Producciones, en Sotu’l Barcu; Recuerdos, d’Adrián Conde Espectáculos y Porno, d’ACAR Teatro del Mundo, en Cangas; Museum: la Historia del Arte para niños y niñas, d’Espectáculos Arlequina y La Líquida Teatro, y Los Tuñón, d’El Jaleo Producciones Artísticas, en Piloña; ¡Ay Carmela!, de Carmela, en Gozón, Villaviciosa y A Veiga; Violeta historia de una tanatopractora, d’Ambigú Meida Broadcast, en Gozón; Disculpe Caballero, de Zig Zag Danza, n’El Franco; Cuidado con las palabras, de Guayominí Producciones, n’A Veiga; Caperucita en Muniellos, d’Escena Apache, n’Avilés; Azul y la revolución de los colores, de Mar Rojo Teatro, en L.lena; Abre el ojo, d’A66 Producciones, en Mieres; Tinieblas, de Con Alevosía Teatro, en Llaviana; Bojiganga, de Teatro del Cuervo, en Ribedeva; y Cine María Cristina, d’El Callejón del Gato, en Llangréu. Amás, Escenapache va representar Manín y el primer pelegrín n’El Franco, dientro’l circuitu Xacobéu.

El circuitu de cultura tradicional incluye ocho eventos en diez conceyos pa ochobre. Va celebrase’l taller Xugando a la Tarusa con Sergio Buelga en Xixón; l’espectáculu de música, baille y cantares tradicionales Tradicionando, de Fabriok-Fábrica de ocio y producción, en Piloña, L.lena y Bimenes; Aventurina L´Ablana, de Factoría Norte, n’Avilés; Fundamentos de Asturianada, d’Héctor Braga, en Villaviciosa y Grau; y Esa ye  la de…, de El Arca de Mozart, en Llanera. El públicu tamién va averase al mundu de l’alfarería tradicional asturiana en La memoria del barru, de Gecuna en Candamu y va esfrutar de la tradición oral de la mano de Carlos Alba Cellero con La matazuga en Mieres y con Dos oreyes y una boca en Nava.

El circuitu de música va averar propuestes pa tolos gustos con nueve eventos n’ocho conceyos: Tina Gutiérrez va actuar en Llaviana; Felpeyu, en Grau; Rubén Alba Band y Billy Boy y los Ácratas, col so Tributo a Tino Casal, en Piloña; Bueno, en Samartín del Rei Aurelio; Berto Varillas & Asturiana Mining Company, en Sotu’l Barcu; La chupa’l Sebas ¡¡¡El musical!!!, en Nava; Buen Suceso, en Gozón; y Last Days of Eden, en Siero.

De la mano del circuitu d’artes visuales va esponese dende’l 1 d’ochobre Evoluciones y requexos, de Guillermina Caicoya Art Projects n’El Franco y Del paisaje de los acontecimientos al acontecimiento del paisaje, de Cristina Ferrández, en Navia; y dende’l día 4, FugArte, d’Asociación d’Artistes Independientes Los Purificados, en Cangas. Hasta’l 17 d’ochobre pue visitase Trilogía poética: Al horru, d’Ediciones Pata Negra, en Pravia, muestra que va esponese a partir del día 28 en Siero.

De la mesma, la película documental La Calle del Agua de la realizadora asturiana Celia Viada Caso va abrir la programación trimestral de La Cinemateca Ambulante n’ochobre en Colunga. Venti conceyos, sumando un total de 23 sedes, collaboren esti trimestre nesta edición del ciclu de cine itinerante de Llaboral Cinemateca que, amás del premiáu documental de Viada Caso, va ufiertar la proyección del clásicu Los peces rojos, de José Antonio Nieves Conde —programáu con cuenta del centenariu de la nacencia del director d’arte Gil Parrondo—; la cinta El horizonte, de la realizadora suiza Delphine Lehericey que protagoniza Laetitia Casta, y el documental Spaceship Earth, de Matt Wolf, que se proyecta nel marcu del proyectu Conceyos con Ciencia de la Conseyería de Ciencia, Innovación y Universidá del Principáu.

La programación de los circuitos d’Asturies, Cultura en Rede pue tener cambeos. Puen consultase les feches, horarios y la información actualizada en www.asturiesculturaenrede.es.

(de Formientu, 01-10-2021)

Read Full Post »

La obra ‘La cafiante muerte de Nicolai Bostov’, del escritor José Ángel Gayol foi la ganadora de la 42 edición del premiu Xosefa Xovellanos de novela n’asturianu. El gallardón, convocáu y concedíu pola Conseyería de Cultura, Política Llingüística y Turismu, tien una dotación de 6.000 euros.

Los miembros del xuráu destacaron que la obra de José Ángel Gayol “ye una sátira social con un ritmu narrativu bien llográu que retrata la sociedá asturiana de finales del sieglu XX con humor esperpéntico, y too ello espresao con un rexistru llingüísticu de muncha calidá y naturalidá”.

(more…)

Read Full Post »

PABLO ANTÓN MARÍN ESTRADA

Naldo Astur ye un autor n’asturianu qu’algama un prestixosu premiu con una novela a la que van emponderar o criticar cola mesma pasión les voces más autorizaes del panorama lliterariu y qu’acaba siendo acusada de ser un plaxu. Ési ye’l puntu de partida de ‘La xeometría secreta del azar’ (Trabe) de José Ángel Gayol (Mieres del Camín, 1977), una hestoria na que l’escritor protagonista, tres l’escándalu desveláu nes primeres páxines, va poner tierra de metanes pa entamar n’Estocolmo una nueva vida, non menos enrevesada na relación que caltién el personaxe ente ficción y realidá.

-¿Qué quixo contar na so novela?

-Básicamente cómo munches veces la vida toma decisiones por nosotros. L’azar aféctanos más de lo que pensamos: quién sabe si vamos atopar con un coche que nos atropella, un billete de llotería que te toca o col amor de la to vida. La esistencia ye un continu azar, vivimos una realidá de probalidaes y posibilidaes, sobre la que quería reflexonar y a la vez entretener al llector que se mete nella.

(more…)

Read Full Post »

Adolfo Camilo Díaz, Aida Escudero y José Ángel Gayol recibieron la escultura Apolo de los XX Premios de la Crítica y XV de les Lletres d’Asturies nes estayes d’asturianu. “Sentímonos arguyosos de premiar a los nuesos autores, pa que n’Asturies se sepa qu’equí hai escritores escelentes”, apuntó María Esther García López nun actu nel que rector Ignacio Villaverde dixo les sos primeres pallabres en llingua asturiana.

La conseyera de Cultura, Política Llingüística y Turismu, Berta Piñán, presidió xunto a ellos un eventu que taba programáu pa xineru, pero que se tuvo qu’aplazar pola situación sanitaria del momentu. Ente’l públicu, el secretariu de l’Academia de la Llingua Asturiana, Xosé Ramón Iglesias Cueva y les alcaldeses de Candás y Castrillón, Amelia Fernández López y Yasmina Triguero, de manera respeutiva, ente otres autoridaes.

(more…)

Read Full Post »

La xeometría secreta del azar ye la segunda novela que publica José Ángel Gayol, una de les voces más interesantes de la lliteratura n’Asturies. Ediciones Trabe ta acabante ponela nes llibreríes.Na novela Naldo Asur ye escritor asturianu que gana un premiu d’importancia con una obra que col tiempu se descubre que ye un plaxu. Tentando de matar el pasáu y entamar de nuevo, marcha pa Estocolmu a trabayar na embaxada española nesa ciudá. Ellí va ser quien a crear una vida nueva que, si lu alloña del pasáu más real vivíu n’Asturies, acércalu pasín a pasu y ensin ser a saber por qué a la simulación y la invención vital. Novela sobre la mentira y l’azar, l’autor indaga sobre lo real y lo irreal: ónde ta la verdá y qué ye la non verdá, qué ye la realidá y cómo vivir na islla que formen el silenciu y la mentira. Narración densa y metalliteraria lleese con gustu porque una mentira bien contada pue ser una guapa verdá. La mentira y l’azar (los dos pilares de la vida) son un sotambiu y un vacíu que puen matar, pero que tamién afalen a crear: como dicía Fernando Pessoa, el creador ye un finxidor «que llega a finxir que ye dolor / el dolor que siente dafechu».

(more…)

Read Full Post »

Older Posts »