El Conseyu Asesor de Política Llingüística complétase colos cuatro representantes de les instituciones

Un total de 32 persones van componer el Conseyu Asesor de Política Llingüística que se va constituyir esti xueves telemáticamente. Amás de los 3 miembros de la Conseyería de Cultura, Política Llingüística y Turismu y los 25 designaos pola presidenta del organismu, Berta Piñán, hai que sumar los 4 representantes de l’ALLA, Universidá d’Uviéu, RIDEA y RTPA.

Pola Academia de la Llingua Asturiana (ALLA) va participar nel aconceyamientu de mañana’l so secretariu Xosé Ramón Iglesias Cueva, anque la intención de la institución académica ye que vaya alternando col presidente Xosé Antón González Riaño, según disponibilidá. Mentes, el rector Santiago García Granda va facelo pola Universidá d’Uviéu.

Read Full Post »

Cultura inclúi nel Conseyu Asesor de Política Llingüística a 25 persones de diversos ámbitos de la sociedá asturiana

La Conseyería de Cultura, Política Llingüística y Turismu del Gobiernu asturianu abrió’l Conseyu Asesor de Política Llingüística a 25 persones procedentes de diversos ámbitos de la sociedá asturiana.

Nel organismu, presidíu pola conseyera Berta Piñán, van tar presentes tamién los responsables, o les persones na que deleguen, de la Universidá d’Uviéu, l’Academia de la Llingua Asturiana (ALLA) – , el Real Institutu d’Estudios Asturianos (Ridea) y Radio Televisión del Principáu d’Asturies (RTPA).

Read Full Post »

“La Llei d’Usu foi un milagru y un ésitu”, asegura Sánchez Vicente

PABLO R. GUARDADO

Esti vienres, 23 de marzu, cúmplense 20 años de l’aprobación na Xunta Xeneral de la Llei de Promoción y Usu del Bable/Asturianu, una historia que recordamos nesti reportaxe. “Foi un milagru y un ésitu”, afirma Xuan Xosé Sánchez Vicente, que dende’l PAS negoció col PP de Sergio Marqués el sacar alantre una norma mui criticada nel so tiempu.

“L’otru día nel alderique qu’hebo n’Uviéu dixeron que la Llei d’Usu aprobóse por unanimidá. Tengo la dulda de lo que votó al final Antón Saavedra, pero tol mundu taba contra d’ella. Ye engañosa esa unanimidá”, recuerda l’únicu diputáu asturianista naquella llexislatura, na que’l Partido Popular (PP) gobernaba con 21 escaños en minoría énte una FSA con 17 y una Izquierda Unida (IU) con 6, que más tarde seríen 5 tres la salida de Saavedra. Y ye que’l testu negociáu col presidente Marqués por Sánchez Vicente y Xesús Cañedo, indignaos pol primer documentu presentáu pola Conseyería de Cultura dirixida por María Victoria Rodríguez Escudero, tuvo enmiendes tanto del PSOE como d’IU que dexaron una norma final que “salió bastante bien pese a todo, con coses, eso sí, que nun me prestaron”.

Read Full Post »

Los xuristes destaquen que les carencies de la Llei d’Usu muestren que la oficialidá ye la solución “lóxica”

Los xuristes destaquen que la falta de desarrollu de la Llei d’Usu y Promoción del Asturianu o los problemes pa la so aplicación nel ámbitu de los Conceyos ta faciendo que la única solución “posible y lóxica” sía la declaración d’oficialidá de la llingua asturiana.

Asina lo destacó’l lletráu del Tribunal Constitucional, José Manuel Pérez Fernández, que participó esti llunes n’Uviéu nuna mesa redonda pa celebrar los 20 años de l’aprobación d’esta norma. Na mesa tamién participaron el Catedráticu de Derechu Alministrativu de la Universidá d’Uviéu, Leopoldo Tolivar Alas; y l’abogáu espertu en temes llingüístico-llegales, Nicolás Bartolomé Pérez.

Read Full Post »

Xuristes van aldericar sobre la Llei d’Usu cuando se cumplen venti años de la so aprobación

En marzu del 1998 aprobábase na Xunta Xeneral y espublizábase nel BOPA la Llei d’Usu y Promoción del Bable/Asturianu. Pa conmemorar esta fecha, la Conseyería d’Educación y Cultura entama un alderique con xuristes sobre’l desarrollu d’esta norma.

En concreto, baxo’l títulu de ’20 años de la Llei d’Usu y Promoción del Asturianu’, van ponese sobre la mesa dellos temes, como’l valir d’esta norma como ferramienta de normalización, el marcu llegal asturianu en comparanza con otres lligües minorizaes, el nivel de desenvolvimientu de la llei y les espeutatives de futuru. Los ponentes que van intervenir son José Manuel Pérez Fernández, lletráu del Tribunal Constitucional y profesor de Derechu Alministrativu de la Universidá d’Uviéu; Leopoldo Tolivar, caderalgu de Derechu Alministrativu de la Universidá d’Uviéu; y l’abogáu Nicolás Bartolomé.

Read Full Post »

PSOE, Podemos, IX y Foru van participar nun debate sobre’l modelu d’oficialidá ‘a l’asturiana’

Los cuatro partíos con representación parllamentaria que lleven nel so programa electoral la oficialidá –PSOE, Podemos Asturies, IX y Foru Asturies– van participar esti sábadu 3 de marzu nuna mesa redonda sobre’l modelu d’oficialidá que se podría afacer al casu asturianu.

Va ser dientro del seminariu ‘Oficialidá, el camín constitucional pal futuru del asturianu’, que se va celebrar esti vienres y esti sábadu nel Edificiu Históricu de la Universidá d’Uviéu. L’actu va inauguralu’l rector Santiago García Granda y ta entamáu pola asociación Iniciativa pol Asturianu.

Read Full Post »

El rector va inaugurar un seminariu sobre les ventayes de la oficialidá del asturianu

L’asociación Iniciativa pol Asturianu entama’l seminariu ‘Oficialidá, el camín constitucional de futuru pal asturianu’, que va facese nel edificiu históricu de la Universidá d’Uviéu los díes 2 y 3 de marzu y que va inaugurar el mesmu rector, Santiago García Granda.

Nél varios espertos van falar sobre les “consecuencies y beneficios” que va traer la inclusión del estatuts d’oficialidá nel Estatutu d’Autonomía, según señala Iniciativa al traviés de nota de prensa.

Ente toles ponencies y intervenciones, puestes por espertos de prestixu internacinal reconocíu, y bien conocederes de la realidá asturiana y española, les del escritor Xuan Bello, la investigadora Isabel Hevia o’l xurista y lletráu del Tribunal Constitucional José Manuel Pérez Fernández.

Read Full Post »

Los primeros datos del III Estudiu Sociollinguísticu d’Asturies anunciaránse nes selmanes próximes

PABLO R. GUARDADO

El mes de xunu ye la fecha que se manexa pa la espublización de los primeros datos del III Estudiu Sociollingüísticu d’Asturies, encargáu pola ALLA a Francisco José Llera Ramos. El caderalgu de Ciencia Política foi ún de los compareciente de la sesta sesión de la Comisión Especial d’Estudiu sobre’l Réxime de Proteición y Promoción del Asturianu na Xunta Xeneral.

Xunto col caderalgu de Ciencia Política, intervinieron nesta ocasión Xabiel González Menéndez, presidente de Xeira; José Manuel Pérez Fernández, lletráu del Tribunal Constitucional y profesor titular de Derechu Alministrativo de la Universidá d’Uviéu; l’espertu gastronómicu Lluis Nel Estrada; el biólogu Bertu Ordiales; el sacerdote José Manuel García de Jesús ‘Pin’, presidente del Coleutivu Manuel Fernández de Castro; Carlos Pulgar, voceru nacional de la Xunta pola Defensa de la Llingua Asturiana (XDLA); Fernando Álvarez-Balbuena, vicepresidente de l’asociación El Teixu-Rede pal Estudiu y Defensa de la Llingua Asturllionesa; y Penélope Miranda, vocera de l’Asociación de Trabayadores de la Normalización Llingüística. Nesta ocasión tuvieron representaos toles formaciones polítiques, anque’l del PP s’ausentó mientres una bona parte de la sesión.

Read Full Post »

“Una llingua será lo que la comunidá de falantes quier que sía, o sía quien a facer que sía”, espresa Basaguren

PABLO R. GUARDADO

“Europa yá fixo muncho pol asturianu” pese a la debilidá operativa de la Carta Europea de les Llingües Minoritaries, n’opinión d’Alberto López Basaguren. L’ex miembru del Comité d’Espertos pon el futuru del idioma en manes de los falantes.

López Basaguren protagonizó la X Xornada de la Fundación Caveda y Nava que tuvo llugar el sábadu na Casa Cultura Marta Portal de Nava, onde impartió la conferencia ¿Qué pue facer Europa poles llingües minoritaries? El casu asturianu’. Frente a un públicu formáu por patronos de la entidá presidida por Ramón d’Andrés –escusaron la so ausencia por motivos personales o profesionales Carmen Ruiz Tilve, cronista oficial d’Uviéu; Enrique Castro ‘Quini’, delegáu del Sporting; Pepe Monteserín, cronista oficial de Pravia; y Ana María Cano, presidenta de l’Academia de la Llingua– y xente interesao pola temática, ente ellos la diputada de Foro María del Mar García Poo, acompañada pol ex direutor de Política Llingüística Alfredo Ignacio Álvarez Menéndez, el caderalgu de Derechu Constitucional de la Euskal Herriko Unibertsitatea esplicó a los presentes qué ye la Carta Europea de Llingües Rexonales o Minoritaries y les so posibilidaes, afondando nel casu asturianu y la percepción del Comité d’Espertos sobre la situación del nuesu idioma dende’l primer informe hasta anguaño.

Read Full Post »

¿Qué pue facer Europa poles llingües minoritaries?: El casu asturianu protagoniza la X Xornada de la Fundación Caveda y Nava

“¿Qué pue facer Europa poles llingües minoritaries?: El casu asturianu” ye la conferencia qu’esti próximu sábadu 31 de Mayu , a les 12 del meudía na Casa de la Cultura de Nava, protagoniza la X Xornada de la Fundación Caveda y Nava.

A cargu de D. Alberto López Basaguren, miembru del Comité d’Espertos de la Carta Europea de Llingües Rexonales o Minoritaries (Conseyu d’Europa), la conferencia tará presentada por D. José Manuel Pérez Fernández, Profesor Titular de Derechu Alministrativu de la Universidá d’Uviéu.

Nel actu van intervenir el Presidente de la Fundación Caveda y Nava y les autoridaes presentes y n’acabando l’actu, habrá convidada con sidra na mesa villa.

(d’Asturnews, 19-05-2014)

Read Full Post »