“La xente avérase muncho al asturianu pola música”

XAUME MARTÍNEZ

Anque la xente lu conoz principalmente pola curdión, cola que percuerre de magar munchos años los escenarios d’Asturies, ello ye que David Varela (Xixón, 1975) fai munches más coses: toca un bon garrapiellu d’instrumentos; ye mayestru de música en Tinéu, Nava, Cangas del Narcea, Llaviana y Xixón; foi componente de bandes de gaites y grupos folk como Lliberdón, La Bandina o, anguaño, La Bonturné, y tien acompañao a artistes como Anabel Santiago o Marisa Valle Roso. Falemos con elli d’educación musical, del papel de la llingua na enseñanza y de tocar música pa nenos.

Esti día falábemos de la importancia de la tresmisión xeneracional pal caltenimientu de l’asturianu. Nel so casu, la familia foi decisiva nel empiezu, ¿non?
Yo en casa tengo un hermanu gaiteru, asina que crecí cola gaita. Entamé col tambor y hasta güei. Los primeros años nun me dediqué profesionalmente a la música (personalmente, siempres) pero anguaño ye la mio actividá profesional tamién.

Read Full Post »

El cantar ‘Los fayeos de mayo’, de Felpeyu, ye’l meyor de la música asturiana, según un ranking de RPA

El tema del grupu Felpeyu ‘Los fayeos de mayo’ ye’l meyor de la historia de la música asturiana, según la encuesta fecha pola Radio del Principáu d’Asturies (RPA) ente una trentena de personalidaes del mundu de la cultura asturiana.

La emisora pública emitió a lo llargo d’esta Selmana l’espaciu ‘Top 25 n’ast’, onde se dieron a conocer los 25 temes más votaos por xuráu de más de 30 personalidaes del mundu de la cultura asturiana –académicos, filólogos, músicos, escritores, actores, promotores, xestores culturales y profesores universitarios–. D’una primer esbilla salieron 200 cantares de la que les 25 que se sintieron en RPA foron los más votaos.

Read Full Post »

TPA estrena esti martes “El club musical”

El próximu martes 2 de xunetu, a les 23:15 hores, la canal de televisión autonómica TPA va estrenar un programa nuevu tituláu El Club Musical, de periodicidá selmanal, dedicáu a la escena sonora asturiana y presentáu por Xune Elipe.
Goxe Producciones ye la encargada de llevar alantre esti proyectu, xestáu a lo llargo de los últimos dos años, nos que la productora axuntó un equipu de persones bien conocíes nel ámbitu musical y audiovisual del país, casu de Javier Lueje (realizador), Pablo Quiroga o Guillermu Fernández (cámares), Rubén Álvarez (soníu), Tamara Rosa (rexidora), Víctor Vivar (illuminación) o Jorge Cambareli (sintonía), ente otros.

Read Full Post »

Damián Barreiro: ‘Pasín a pasu, vamos llegar dalgún día al últimu Conciertu pola Oficialidá’

DAMIÁN BARREIRO

Hai 25 años, l’asociación cultural Xunta pola Defensa de la Llingua Asturiana (XDLA) decidió entamar una actividá pa dar a conocer d’una manera festiva, al empar que reivindicativa, la esixencia de la oficialidá como mediu pa garantizar los derechos llingüísticos de los asturianofalantes. Yera’l I Conciertu pola Oficialidá, un festival musical que cumple un cuartu de sieglu gracies al compromisu de la xente de la música asturiana, que collaboró de manera desinteresada y que foi fundamental pa qu’esti actu fore posible añu tres añu. Asina, más de 70 grupos xubieron enriba l’escenariu pa reclamar a los responsables políticos del nuestru país que tomen la midida qu’otros tomaron nes comunidaes con situaciones llingüístiques asemeyaes: la oficialidá.

L’actu foi testigu de la evolución de la música qu’utilizó l’asturianu como idioma vehicular. Val con mirar el cartel del primer conciertu y el del que fai’l cuartu de sieglu, que se celebra esti 8 de xunu en Xixón. Na primer edición participaron dos bandes de gaites (Naranco y Uriellu), dos grupos de folk (Balandrán y Llan de Cubel) y dos bandes de rock (The Podres y Dixebra), mentes que na edición d’anguaño va sonar folk (N’Arba, La Bandina y Felpeyu), ska (La Tarrancha), rock (Dixebra) y hasta DJs (Dani Stylo).

Read Full Post »

Carlos Pulgar García: “La oficialidá ye cada vez más urxente”

PABLO R. GUARDADO

El sábadu día 8 va tener llugar en Xixón el XXV Conciertu pola Oficialidá. Carlos Pulgar García (Ḷḷena, 1975), voceru de la Xunta pola Defensa de la Llingua Asturiana (XDLA), faló con Asturies.com del eventu y de la situación del idioma.

El Conciertu pola Oficialidá cumple 25 años. ¿Nun son yá munchos?
La verdá ye que sí, un cuartu sieglu nin más nin menos, y una amuesa más del enquistamientu que la nuestra clase dirixente quixo facer de lo que teníen que ser derechos y ferramientes de futuru.

Read Full Post »

Dixebra, Felpeyu y N’Arba van actuar nel XXV Conciertu pola Oficialidá

El Conciertu pola Oficialidá celebra’l sábadu 8 de xunu nel Parque Inglés de Xixón la so edición númberu 25. Nesta ocasión tán especial va contar coles actuaciones de Dixebra, N’Arba, Felpeyu, La Tarrancha, La Bandina y Dani Stylo.

Un añu más, Dixebra van ser los encargaos d’encabezar el festival. La mítica banda avilesina namái se perdió dos ediciones, les dos por falta xustificada, nos 25 años de vida del conciertu qu’entamen la Xunta pola Defensa de la Llingua Asturiana y Xunta Moza, al qu’acompañaron de manera fiel dende la so conceición. El cartelu complétase col folk de N’Arba, Felpeyu y La Bandina, el ‘mecigayu-ska’ de La Tarrancha y los ritmos hip hop de Dani Stylo. Los artistes reivindicarán la oficialidá del asturianu sobre l’escenariu al traviés de la so música y nun ambiente festivu.

Read Full Post »

L´asturianada ensin repolitar presta más

AURELIO ARGEL

El año recién termináu remató entregando trabayos variaos cola asturianada como protagonista. Delles voces d’esta asturianada apurrieron discos curiosos con tratamientu, acompañamientu, producción y presentación estremáes que son exemplu de pluralidá y riqueza pero tamién de cómo entender, sentir y tratar -o saber tratar – el xéneru más representativu de la música d’esti país. Títulos y pieces perclásiques, arranxos sobre la tradición, igües curiosines y hasta temes novalinos apaecen con pesu en «Poema sinfónico» de la Banda Gaites «Noega», grabación conxunta con otros artistes y tamién, d’otros modos, a manera de cantares populares reibilicoquiaos con otros sones, alcuéntrense nel discu de Fernando Valle Roso «Camín d’ayures» (EveryGoodSong) que llevó’l premiu a «Meyor discu del añu» pa la Crítica de la RPA. D’igual manera les grabaciones cencielles pero necesaries qu’entrega añu ente añu la Fonográfica Asturiana contaron con «Recordando mi niñez», de la veterana María Teresa González Soto, acompañada a la gaita por unu de los grandes del xéneru, Óscar Fernández, y que ya recibi’l premiu de la Crítica de RPA a «Meyor discu del añu» na estaya de canción asturiana. Pero sobremanera, hai tres títulos de rescample pa señalar: «Aire», «Cancios y asturianáes» y «Cola lluz de l’alborada.

Read Full Post »

La XDLLA convoca pal 4 de mayu la manifestación pola oficialidá

La Xunta pola Defensa de la Llingua Asturiana (XDLLA) tien convocada pal vienres 4 de mayu la manifestación que, con motivu del Día de les Lletres Asturianes, se fai pa reclamar la igualdá llegal plena del asturianu col restu de llingües oficiales del Estáu. La marcha va arrancar a les 19.30 hores de la Estación del Norte d’Uviéu y desfilar peles cais d’Uría y San Francisco hasta llegar a la Plaza Porlier, onde, alredor de les 20.30 hores, va lleese un comunicáu.

La manifestación coincide esti añu una selmana depués del Conciertu pola Oficialidá, qu’entama dende hai 24 años la XDLLA y que, nesta ocasión, va celebrase’l sábadu 28 d’abril, a partir de les les 19.30 hores, nel Parque Inglés de Xixón. A los dos escenarios del conciertu van xubir dellos de los meyores grupos asturianos d’anguaño: Dixebra, Alfredo González, La Bandina, Macadamia, Tuenda, Fala non Caduca y De Miguel, Wolfe & Quintana, que van enllenar ocho hores de música de calidá y cien por cientu n’asturianu.

Read Full Post »

El Conciertu pola Oficialidá va celebrase nel xixonés Parque Inglés

PABLO R. GUARDADO

La XDLA ta acabante de confirmar el cartelu definitivu del XXIV Conciertu pola Oficialidá, que repite en Xixón, anque esta vegada nel Parque Inglés. Siete grupos de dellos estilos van actuar el 28 d’abril na carpa instalada nel llugar.

Asina, les persones que s’averen a la zona agora nomada Parque de los Hermanos Castro, n’honor a los futbolistes Enrique Castro ‘Quini’ y Jesús Castro, fináu en Pechón tres rescatar de morir afogaos a unos neños británicos, van poder sentir la música de cantautor d’Alfredo González, la tradicional de Tuenda, el folk baillable de La Bandina, la revisión personal de la música asturiana que faen De Miguel, Wolfe y Quintana, l’apuesta novedosa de Macadamia col so free folk, la mecigaya punk-rock y ska de Fala non Caduca y el rock combativu de Dixebra. Un cartelu pa tolos gustos que, de xuru, va permitir que la carpa asitiada nel Parque Inglés viva un gran ambiente.

Read Full Post »

Toli Morilla, La Bandina, La Col.la Propinde y La Tarrancha, principales atracciones en el Conciertu pola Oficialidá

La Xunta pola Defensa de la Llingua dio a conocer güei los nomes de los grupos qu’actuarán nel XXIII Conciertu pola Oficialidá: Blima, Llangres, La Bandina, La Col.la Propinde (folk), Toli Morilla (pop, cancíu d’autor), Misiva (rock-hardcore) K-Nalón (hip-hop) y La Tarrancha (ska-reggae).

La entidá organizadora fizo pública güei una nota prensa, a la que tuvo accesu Europa Press, anunciando pal próximu llunes, 4 d’abril, la presentación oficial d’esta cita, que tendrá llugar, el sábadu 16, na Feria de Muestres de Xixón, igual que l’añu pasáu. Les puertes abrirán a les 19.00 hores.

Read Full Post »