César García Santiago: “Ye más difícil asoleyar obres n’asturianu pero hai que siguir lluchando pola nuesa llingua”

César García Santiago (Grau, 1979) ye maestru de formación, pero la so vocación dende bien mozu ye la de ser editor. Collaborador en medios de comunicación, Moscón d’Oru y premiu Moscones en Xixón de periodismu, en 2007 creó la editorial La Cruz de Grau y espublizó dende entós una llarga y variada llista d’obres d’estremaos xéneros. Fálamos con él de l’actividá de la so editorial y del momentu que vive la edición n’Asturies.

¿Cómo surde’l so interés pol mundu editorial?
L’interés surde al descubrir con dieciséis años la Gran Enciclopedia Asturiana del editor Silverio Cañada. Too entamó gracies al exemplu de trabayu d’esti xixonés que llogró llanzar en trenta años alredor de 2.000 títulos.

Read Full Post »

La revista Formientu convoca un certame de microrrellatos con llingüaxe SMS

L’asociación Xareos! Xestión Cultural y la revista Formientu, en collaboración cola editorial La Cruz de Grau, convoquen la segunda edición del Certame de Microrrellatos Mozos “Formientu”, que nesta ocasión ha escribise con llingüaxe SMS embaxo’l títulu “¡Si nun llego a recibir aquel SMS…!”. Nel Certame ha escribise colos 160 caracteres que formen un mensaxe unviáu con un teléfonu móvil. Dende Formientu, camienten que “pue que seya hasta l’únicu tipu de testu que les xeneraciones más moces redacten y remanen con más remangu que les más madures”.

Read Full Post »

Pablo A. Quiroga y Rubén Rey ganen el I Certame de Microrrellatu Mozu “Formientu”

El xuráu de la primer edición del I Premiu “Formientu” de Microrrellatu Mozu, formaú pol escritor Xuan Xosé Sánchez Vicente; el xerente d’ediciones La Cruz de Grau, Cesar García Santiago; la filóloga y escritora Laura Marcos; l’escritor Benxa Pérez y el director de la revista Formientu, Inaciu Galán, como secretariu, y al traviés de conceyu virtual, decidió declarar ganadores del certame ex aequo a Pablo A. Quiroga Prendes y Rubén Rey Menéndez.

Read Full Post »

La Cruz de Grau convoca’l I Premiu de Narrativa “Concepción García Armiñán”

La editorial La Cruz de Grau, a comuña cola Casa Cultura de Grau y la Biblioteca Municipal “Valentín Andrés Álvarez”, convoca un concursu de narrativa pa noveles escrites n’asturianu o en castellán con tema llibre y una estensión d’ente 100 y 150 fueyes. El plazu d’almisión termina’l 30 d’ochobre y el premiu ta dotáu con 600 euros.

Los testos han presentase por cuadruplicáu a cai Cerro de La Muralla, s/n 33820 Grau o per corréu lletrónicu a edlacruzdegrado@yahoo.es

Read Full Post »

Convocáu’l Certame de Microrrellatos Mozos Formientu

L’asociación Xareos! y la revista Formientu, en collaboración cola editorial La Cruz de Grau, convoquen el I Certame de Microrrellatos Mozos «Formientu» “col envís d’afalar la creación lliteraria ente los escritores más mozos y ayudalos a esplorar les sos posibilidaes”. El plazu ta abiertu hasta’l 31 d’agostu d’esti añu.

La escritura de microrrelatos mínimos ye, según los responsables de la revista Formientu, “ un exerciciu perfectu pa desendolcar esa capacidá de síntesis y suxestión capaz de impactar al llector y dexalu prendáu d’una historia”, ye por ello que convoquen esti concursu nel que puen participar toes aquelles persones nacíes de 1975 n’adelantre, con un númberu ilimitáu de microrrellatos, de tema llibre y escritos n’asturianu.

Read Full Post »