Feeds:
Antradas
Comentairos

Posts Tagged ‘La Milagrosa’

PABLO R. GUARDADO

María Jesús Prieto (Xixón, 1963) y Xulia Alonso (Xixón, 1975) son profesores d’asturianu nel Evaristo Valle. Los escolinos y escolines de quintu y sestu de Primaria d’esti colexu, a los que dan clase, tán acabantes de ganar el ‘Ruempi la Mollera’.

¿En qué consiste’l Concursu ‘¡Ruempi la mollera!’?
‘Ruempi la Mollera’ ye un xuegu-concursu d’entrugues y rempuestes organizáu pola Oficina Municipal de la Llingua del Ayuntamientu de Xixón, destináu a los escolinos y escolines del Tercer Ciclu de Primaria que tien l’oxetivu d’usar la llingua asturiana pa deprender coses de Xixón, del barriu, de persones relacionaes cola ciudá, curiosidaes… El concursu preséntase como una manera d’averar la llingua asturiana al alumnáu de Xixón al traviés de la cultura, los personaxes y la historia del conceyu.

Nes primeres convocatorias yeren ocho entrugues les que teníamos que responder a lo llargo’l cursu, pero la esperiencia foi demostrando que yeren munches y agora llevamos dos años nos que’l númberu redúxose a cuatro. Al entamu del xuegu, llega a les escueles participantes un panel onde van apegándose unes tarxetes coles entrugues y, poco a poco, otres tarxetes coles puntuaciones que vamos algamando tolos centros que participamos. Les entrugues mándenles cada dos meses, más o menos. Na nuesa escuela decidimos que repartiríamos les entrugues alternativamente ente los dos cursos del ciclu. Cuando damos cola solución, entama un trabayu d’investigación, de búsqueda d’información, pa depués repartirse n’equipos tres decidir y distribuyir los distintos apartaos que va tener el trabayu que vamos facer. Casi siempre, xunto a un trabayu escritu a mano –que nun debe ser mayor de 25 páxines, según les bases del xuegu– y nel que s’ argumenta y xustifica la rempuesta, presentamos una aportación plástica –maqueta, figures, dibuxos, xuegos…– como complementu. Cada rempuesta valórase de 0 a 3 puntos y tiense en cuenta, amás de dar cola rempuesta correuta, l’asturianu usáu, los dibuxos y que se vea que ta fecho a comuña, principalmente.

(more…)

Read Full Post »

La Xunta pola Defensa de la Llingua Asturiana denuncia un nuevu “ataque a la llingua asturiana nel sistema educativu”, nesti casu nel colexu La Milagrosa d’Uviéu, onde, según la organización “ta ocultándose la información pública pa la matriculación d’asturianu”.

Según delles denuncies feches por dalgunos padres a la Xunta pola Defensa de la Llingua Asturiana, nel colexu La Milagrosa, nel conceyu d’Uviéu, tán negándo-yos el derechu de matricular a los fíos na asignatura d’asturianu con “mentires qu’incumplen la llei y con ocultaciones de les informaciones asoleyaes pa les matriculaciones. Como, por exemplu, nun dexar que puean facelo nun cursu si nun lo ficieren nún anterior, lo que va contra la circular que se mandó dende la Conseyería d’Educación qu’aclaraba que sí podía facese”.

Amás sorrayen el fechu de que nel colexu tea dándose información venceyada a que la enseñanza d’asturianu ta llendada a la rede pública, nun pudiendo ufiertase nos colexos privaos y concertaos, cuando la llei “qu’afita l’enseñu d’asturianu tanto pa los colexos públicos como pa los concertaos y qu’obliga, nos dos casos, a la ufierta pública de matriculación”.

La Xunta pola Defensa de la Llingua treslladará esta quexa a la Conseyería d’Educación, a la qu’acusa de pasividá énte “una situación que se repite sistemática y xeneralizadamente añu tres añu”, cuando l’asignatura d’asturianu tendría d’ufiertase “en tolos centros, en tolos niveles y pa tolos escolinos y escolines”.

(d’Asturies.com, 25-06-2008)

Read Full Post »