Ábrese la receición de candidatures pa los Premios Andrés Solar

La Xunta pola Defensa de la Llingua Asturiana convoca públicamente a proponer candidatures tanto pal Pegollu (el premiu que reconoz a aquella persona o entidá que destacare nesti añu 2020 por normalizar l’usu del asturianu), como pa la Madreña de purpurina (pa quien fixere tolo contrario y fore protagonista d’ataques o desprecios al asturianu).

Na edición anterior, que por primer añu nun coincidió coles feches del cabudañu del autor y que se cellebró como una xinta familiar, el Pegoyu foi dedicáu a la familia D’Andrés nes figures de Lali Solar y al so home, Jesús, precisamente parte de la organización de los premios demientres toos estos años, como reconocimientu al so llabor dientro los premios mesmos. Nun s’entregó’l Madreñazu, non por falta de posibles candidatos con méritos pa él.

Read Full Post »

Reteyaores demanda la traducción de documentos básicos pa normalizar l’idioma nel sector de la construcción

La empresa Reteyaores recibió’l vienres en Xixón el Pegollu de los XXXII Premios Andrés Solar. Moisés Noval, representante de la firma con sede en Sariegu, demandó “a los órganos competentes nestes materies” la so intervención pa la traducción de documentos básicos pa normalizar l’usu del idioma na construcción.

“Nun sólo taríemos poniendo escuela y creando una ferramienta motivadora pa trabayar nel mio sector na nuesa llingua, sinón qu’amás facilitaríamos el trabayu a aquellos arquiteutos y aquirteutos téunicos que quieran trabayar nel nuesu idioma que nun tienen la posibilidá porque nun tienen los conocimientos básicos de la llingua o nun tienen el valor o la inconsciencia que tenemos los ‘reteyaores’. Ye urxente y necesario si queremos normalizar l’usu del asturianu, se saque a la cai, y l’asturianu ande en tolos sectores de la vida cotidiana”, afirmó Noval. Ente los documentos necesarios que citó pa la so torna al idioma, taben “el Códigu Téunicu de la Edificiación (CTE) n’España y los documentos básivos vixentes que lu acompañen, y les Bases de Precios de la Construcción d’Asturies”.

Read Full Post »

Pulgar: “Ye tiempu de cumplir la llei y facer pola normalidá del idioma”

PABLO R. GUARDADO

La Xunta pola Defensa de la Llingua Asturiana fixo entrega del pegollu de los XXVII Premios Andrés Solar a los responsables del vinu Ḷḷumés. El so voceru, Carlos Pulgar, señaló que “ye tiempu de cumplir la llei y facer pola normalidá del idioma”.

El Centru de Cultura Antiguu Institutu acoyó l’actu d’entrega de los premios que lleven el nome del escritor de Deva, eventu qu’aconceyó a numberosu públicu. Naciu Varillas foi l’encargáu de presentar esta ceremonia que, como ye vezu, contó cola presencia de familiares de Solar. Tres un introducción breve de Varillas, Iris Díaz Trancho, secretaria del xuráu encargáu de decidir les persones o entidaes merecedoras de los dos gallardones que componen los premios, destacando’l consensu pa otorgar el madreñazu d’esta edición a César Movilla Anta, alcalde de Noreña, “pola so actitú repetida de rechazu al usu de la llingua asturiana nel ámbitu de la so competencia, vulnerando d’esta manera tanto los derechos de la ciudadanía xeneral como la de los sos llexítimos representantes democráticos”. Al nun apaecer el premiáu, como ye habitual nesti gallardón, Varillas señaló que los miembros de la XDLA van facer por unvialu a la Casa Conceyu de Noreña.

Read Full Post »