Higiénico Papel gana’l Premiu Nel Amaro de teatru n’asturianu y gallego-asturianu cola obra ‘El viaxe de Covaletti’

Higiénico Papel ganó la cuarta edición del Premiu Nel Amaro de Teatru Profesional en llingua asturiana y gallego-asturianu, que concede la Conseyería de Cultura, Política Llingüística y Turismu del Gobiernu asturianu y ta dotáu con 6.000 euros. La compañía foi gallardonada pola obra ‘El viaxe de Covaletti’.

El xuráu encargáu de valorar les obres finalistes, qu’aconceyó ayeri baxu la presidencia d’Irene Arce, xefa de serviciu de la Dirección Xeneral de Política Llingüística, tuvo integráu por María Cotiello, actriz y filóloga, Pilar Fernández, escritora y filóloga; Mar Friera, filóloga y profesora, Chechu García, escritor y profesor, y Eva Vallines, actriz y crítica teatral. Actuó como secretaria Juncal García, tamién xefa de serviciu de la Dirección Xeneral de Política Llingüística.

Read Full Post »

Cultura inclúi nel Conseyu Asesor de Política Llingüística a 25 persones de diversos ámbitos de la sociedá asturiana

La Conseyería de Cultura, Política Llingüística y Turismu del Gobiernu asturianu abrió’l Conseyu Asesor de Política Llingüística a 25 persones procedentes de diversos ámbitos de la sociedá asturiana.

Nel organismu, presidíu pola conseyera Berta Piñán, van tar presentes tamién los responsables, o les persones na que deleguen, de la Universidá d’Uviéu, l’Academia de la Llingua Asturiana (ALLA) – , el Real Institutu d’Estudios Asturianos (Ridea) y Radio Televisión del Principáu d’Asturies (RTPA).

Read Full Post »

La revista lliteraria Brixel tien un númberu nuevu disponible

El númberu de la revista Brixel, que correspuende al añu 2019, ábrese con una entrevista a Marta Mori, autora del poemariu ‘Orfandá’, a la que sigue un artículu d’Henrique G. Facuriella sobre Dino Buzzati Facuriella firma tamién la entrevista al novelista Manuel García y la traducción de dellos poemes del inglés Thom Gunn. Damián Barreiro entrevista a Inaciu Galán y fala con él de la lliteratura más moza.

Sibisse Rodríguez fala sobre les rellaciones ente la lliteratura y la maxa, y Damián Barreiro, trata la influencia de la lliteratura na música asturiana nos cuarenta años últimos. Ente les firmes que se pueden atopar tán tamién les de Mario Baragaño, Alberto Suárez, Laura Iglesia, Juan Carlos Aparicio o Marina Sanmartín, que fala sobre’l llibru ‘No me cuentes cuentos’. Como ye vezu la revista inclúi delles crítiques lliteraries a obres n’asturianu asoleyaes a lo llargo del añu.

Read Full Post »

Higiénico Papel presenta una casa onde dexar tola preocupación fuera

HENRIQUE G. FACURIELLA

Asistir a una representación de la compañía Higiénico Papel ye garantía de disfrutar el tiempu qu’ún tea sentáu na sala. El trabayu cuidáu del grupu que dirixe Laura Iglesia fai que’l públicu se meta del too na historia que-y tán contando y escaeza los problemes y les preocupaciones que lu esperen fuera del teatru, y esto foi lo que pasó’l vienres 22 de payares, nel Teatru Filarmónica, na representación de la pieza Una casa, cola qu’Higiénico Papel participa nel III Festival «Nel Amaro» de Teatru profesional en llingua asturiana y gallego-asturianu.

Una y bona s’iguaron los problemes col soníu del principiu, el cuasi monólogu de Carlos Dávila representando al rapacín Andrés –convertíu dacuando nun diálogu cola voz n’off de la madre o del güelu– foi rodando ensin torgues al mesmu tiempu que’l públicu diba entrando nos cuartos de la casa grande au esi mesmu Andrés vive cola familia –la má, el pá, les hermanes ximielgues Clara y Marta, güelito Lluís y el perru Cocu–. La casa de muñeques armada en mediu del escenariu y los xuegos de lluces qu’indicaben en qué parte taba desenvolviéndose l’acción que diba contando Andrés creaben la ilusión de tar viendo unos dibuxos animaos alemanes o suecos, como aquellos que, nos primeros años 90, echaben pela televisión.

Read Full Post »

Entrega de premios del segundu concursu “Selmana de les Lletres na FSA-PSOE” de microrrellatos en Twitter

La sede de la FSA-PSOE na Eria, n’Uviéu acueye güei la entrega de premios del II Concursu de microrrellatos al rodiu de la 40º Edición de la Selmana de les Lletres asturianes. Nesta edición recibiéronse más de ochenta textos.

La calidá de los textos fue destacada polos integrantes del xuráu: el periodista, profesor y presentador de televisión, Inaciu Galán y González, l’escritor, profesor y académicu de la llingua nuevu, Pablo Texón, la poeta y directora de la Editorial Trabe, Ester Prieto y la secretaria de Educación, Universidad y Normalización Llingüística, Marí Luz Pontón.

Read Full Post »

“Tamos equí por amor, y l’amor siempre gana”

PABLO R. GUARDADO

Los mensaxes destinaos a los intolerantes, a aquellos sectores qu’ataquen y traten de facer de menos a la llingua asturiana, protagonizaron los discursos de los Premios Lliterarios 2018 y del II Nel Amaro de teatru profesional. “Tamos equí por amor, y l’amor siempre gana”, aseguró’l poeta Pablo Texón na so intervención.

L’escritor de Felechosa consiguió’l XXIV Premiu Xuan María Acebal de poesía por ‘Allumamientu’. Yera ún de los premiaos ayeri, xunto con Manuel García Menéndez (XXXIX Premiu Xosefa Xovellanos de novela por ‘El visitante impropiu’), Damián Barreiro (XXIV Premiu Máximo Fuertes Acevedo por ‘Asturploitation’), Lluis Aique Iglesias (XI Premiu María Xosefa Canellada de lliteratura infantil y xuvenil por ‘Invisible’), Anxelu González (X Premiu Alfonso Iglesias de cómic por ‘Cacique blancu’) y Laura Iglesia (direutora de ‘Hansel y Gretel’, obra d’Higiénico Papel Teatro merecedora del II Premiu y Festival de Teatru Profesional en Llingua Asturiana y Gallego-asturiano).

Read Full Post »

‘Hansel y Gretel’, d’Higiénico Papel, lleva’l II Premiu «Nel Amaro» de Teatru Profesional n’asturianu

El xuráu del II II Premiu «Nel Amaro» de Teatru Profesional n’asturianu y gallego-asturianu decidió, por mayoría, que la meyor de les cuatro producciones finalistes ye Hansel y Gretel, de la compañía Higiénico Papel. Según reza nel acta del fallu, el xuráu emponderó la sensibilidá, l’humor y l’inxeniu d’esta adaptación del cuentu clásicu, «onde se mecen los personaxes del cuentu colos de la obra y los intérpretes, nun xuegu metateatral cenciellu y brillante». L’acta tamién destaca’l «procuru llingüísticu» del testu asturianu, un llabor del que foi responsable Xuan Costales. El xuráu señaló tamién la calidá tan grande de toles obres fianalistes, lo que fixo mui complicao llegar al veredictu.

Nesta edición del certame, el xuráu encargáu de valorar les obres finalistes presidiólu’l director xeneral de Planificación Llingüística y Normalización, Fernando Padilla Palicio, y formáronlu Eva Vallines Menéndez, actriz y crítica teatral; Esther Castro Manzano, responsable del Serviciu de Normalización Llingüística de Siero; Cristina Muñiz Martín, escritora; José Ramón Iglesias Cueva, secretariu de l’Academia de la Llingua Asturiana, y Roberto Corte Martínez, director y críticu teatral.

Read Full Post »

‘Hansel y Gretel’ d’Higiénico Papel Teatro: muncho más qu’un cuentu

HENRIQUE G. FACURIELLA

Que un montaxe teatral lleve’l títulu d’un cuentu infantil nun quier dicir, necesariamente, que sía una obra ñoña, facilona o inmadura, sinón que lo más probable ye que sía tolo contrario. Les producciones Disney y asemeyaes esblancuñaron y acarambelaron unes narraciones que, nel so orixe, yeren mui dures pero, como munchos críticos lliterarios y psicólogos tienen apuntao, daben a los neños unes ferramientes pa enfrentase a un mundu que yera –y sigue siendo– de too menos fácil.

La pieza Hansel y Gretel –que la compañía Higiénico Papel Teatro armó enriba de les tables del Filarmónica’l vienres 9 de payares, dientro del II Festival «Nel Amaro» de Teatru profesional n’asturianu y gallego-asturianu–, ensin ser una adaptación que se recree nes cares más sangrines del cuentu orixinal, nun ye tampoco una versión Disney de la historia, anque se mande de dellos clixés de la factoría estaounidense.

Read Full Post »

Galán: “Ye necesario implicar a la sociedá si queremos que l’idioma tenga futuru” (I)

PABLO R. GUARDADO

Inaciu Galán y González (Xixón, 1986) entama con ilusión un mandatu nuevu de trés años al frente d’Iniciativa pol Asturianu. Asturies.com ufre la primer parte de la entrevista col escritor, que va tener continuidá’l llunes.

¿Cómo afronta esta etapa nueva na presidencia d’Iniciativa pol Asturianu?
Con ganes, sabiendo que ye pa min la segunda y última parte d’un camín qu’entamaba en 2011 cola fundación d’Iniciativa pol Asturianu. Entós tuvimos que construyir una organización de cero, dala a conocer, crear un estilu propiu y caltener esi llabor a lo llargo de trés años. Agora l’oxetivu ye dir afitando la organización, creciendo y sobre manera faciendo medrar la nuesa implantación social y capacidá d’influencia. Siguimos teniendo nidio que ye necesario implicar a la sociedá na reivindicación llingüística si queremos que l’idioma tenga futuru.

Read Full Post »