L’Ayuntamientu xixonés financió con 1,2 millones un tornéu nel que prohibieron el topónimu Xixón

PACO ÁLVAREZ

Hai coses que salen cares, como por exemplu organizar un tornéu del circuitu ATP (Asociación de Tenistes Profesionales) y hai coses otres que siguen saliendo gratis, como por exemplu burllase de los derechos de les y los falantes d’asturianu. Salen gratis porque esta llingua tovía nun tien l’amparu y l’abellugu mínimu y necesariu que supón la oficialidá —y nun va tenela a curtiu plazu porque’l diputáu forista Adrián Pumares nun fue quien a planta-y cara, cuando llegó la hora de la verdá na negociación del Estatutu, al sector más ranciu del so partíu—; salen gratis tamién porque la defensa de lo poco que tenemos conquistao a nivel institucional dacuando depende de persones o de sigles que, nel fondu, caguen pa les dos llingües oriundes d’Asturies.

Organizar un tornéu internacional de tenis sal caro, anque se trate d’un Open 250 ATP, que vien a ser una competición de tercer división (per debaxo de les cuatro del Grand Slam, de los torneos ATP 1000 y ATP 500). L’Ayuntamientu de Xixón llogró la sede del ATP 250 que-y quitaron a Moscú tres la invasión rusa d’Ucrania, ufrió tou tipu de facilidaes p’acoyer el tornéu y fizo un esfuerzu descomanáu, con cargu a les perres de quienes vivimos en Xixón, pa financiar con 1,2 millones d’euros esti tornéu. El tornéu organizábalu la Real Federación Española de Tenis (RFET) y dalgún palurdu cosmopaletu o dalgún cayetanu con voz y mandu na organización pensó que’l topónimu Xixón nun yera mui chic, nin mui fashion, nin mui hosties en vinagre, y la RFET dio-y la razón al babayu de turnu con eso qu’en tenis llamen la Gran Willy: devolver la pelota cola raqueta pasándola pela entepierna. La pelota que pasaron pela entepierna los de la RFET ye’l topónimu Xixón, que dende va tiempu ta presente nel Palaciu de Deportes (n’igualdá de condiciones col topónimu en castellanu), pero que durante la celebración ellí del tornéu desapaeció dafechu del Palaciu de Deportes y nun tuvo nenguna presencia nel logu, nin nes redes sociales, nin nos trofeos, nin en nenguna otra ‘cancha’ informativa o publicitaria del Gijón Open ATP 250.

Read Full Post »

Ediciones Seronda zarra tres cuatro años de trabayu

El proyeutu editorial Seronda cesa l’actividá tres cuatro años de trabayu y trés llibros n’asturianu. La crisis y la falta d’una política llingüística, dalgunos de los motivos d’esta decisión.

Laura Tuero y Paco Álvarez principiaron a últimos del 2010 esta aventura que fina esti febreru con ocho títulos espublizaos, dalgunos de munchu ésitu como los dedicaos a Manuel Preciado o a los futbolistes de lleenda de la primer división inglesa, de nome ‘Mañana saldrá el sol’ y ‘Leyendas de la Premier’, de manera respeutiva. Nel so catálogu apaecen los llibros n’asturianu ‘Un país llamáu Dixebra’, del propiu Álvarez; la torna del italianu a la llingua asturiana de ‘Una storia semplice’, de Leonardo Sciascia; y la obra billingüe ‘El pasáu’, de Miguel Rojo.

Read Full Post »

La invisibilidá de la lliteratura n’asturianu

QUIQUE FAES

¿Cuánto tien de ficción la lliteratura n’asturianu? Dos mil títulos editaos nos últimos cuarenta años esperen pola visita d’un llector más o menos espectral. Son el productu d’un mercáu estrañu, condicionáu poles subvenciones públiques, que por primer vez en décades paez tar bastante peor de lo que taba: la llamada crisis económica y el propiu esbarrumbe d’un modelu cultural afitáu enriba de bases febles propiciaron el pieslle de les más emblemátiques llibreríes, obliguen a los editores a facer piruetes pa encarar el futuru y castiguen a los autores con remuneraciones cada vez más ruines. Sumíos nuna nublina que paez condenalos a una invisibilidá n’aumentu, unos y otros faen autocrítica.

Read Full Post »

Francisco Álvarez y la orixinalidá, creatividá y frescura d’Ediciones Seronda

Ta acabante de publicar Un país llamáu Dixebra, y tamién firmó de recién La tierra de la libertad. Crónica de los derechos civiles y sociales en el mundo, asina como la traducción Una historia cenciella, que vierte al asturianu un testu de Leonardo Sciascia. Trés obres que Francisco Álvarez (Xixón, 1970) publica con Ediciones Seronda, fundada por esti autor nel añu 2011 xunto a Laura Tuero, y que nació cola vocación d’“atrapar la palabra n’espacios abiertos, amasala con dedicación y envasala con ciñu pa servila a esos llectores que, como nosotros, intúin y suxeren qu’inda queden por andar caminos nuevos y vieyos nel vastu mundu editorial español”. Un sellu independiente qu’apuesta pola busca de “pequeñes voces lliteraries, cercanes o distantes nel tiempu y nel espaciu, y na edición d’obres que de dalgún mou ayuden a divulgar idees y a difundir conocimientos”. Estremaes facetes de les que falamos nesta entrevista.

“Añu 1987, 6 de xineru. Cuatro mozos ventiañeros de la comarca avilesina aconceyen nunes cocheres del conceyu de Corvera pa tratar d’echar del cuerpu un diañu musical que lleven dientro. La materia prima p’aquella sesión ye más escasa que’l material quirúrxicu d’un santeru. Nun tienen amplificadores nin micrófonos, nun hai temes qu’interpretar nin repertoriu que siguir. Dediquen la tarde a maltratar la voz y los instrumentos, pero d’aquel ensayu va surdir la declaración d’independencia d’un país llamáu Dixebra qu’en 2012 cumplió 25 años d’esistencia, d’insistencia y de resistencia.” ¿Cómo se podría definir lo que significa Dixebra hoi?
Si se me permite otru xuegu de pallabres, Dixebra ye la denuncia d’una renuncia, ye la voz y el son que suena contra un cuartu de sieglu de renuncies del pueblu asturianu y d’otros munchos pueblos del mundu: la renuncia a una llingua propia y desprotexida, la renuncia a lluches sociales que siguen siendo xustes y necesaries, la renuncia a siguir suañando con un mundu más llibre y más solidariu. Dixebra canta y toca pa da-y forma a esa crónica social na que la esperanza combate contra’l desánimu y p’animanos a siguir lluchando por una sociedá meyor. Too ello, con un discursu nel que cohabiten l’asturianismu y l’internacionalismu.

Read Full Post »

Ediciones Seronda prepara un llibru sobra la historia de Dixebra

Ediciones Seronda yá tien n’imprenta Un país llamáu Dixebra. La historia y les lletres de la banda decana del rock n’asturianu (1987-2012), de Francisco Álvarez. Un llibru que, como bien diz el títulu, recueye los feches y les feches, les lletres y les semeyes de la banda más llonxeva en llingua asturiana, qu’esti añu cumplió un cuartu de sieglu nos escenarios.

Francisco Álvarez González nació en Xixón en 1970. A los 18 años empecipió estudios de Periodismu na Facultá de Ciencies de la Información de la Universidá Complutense de Madrid y dos años depués incorporóse a la plantiya del diariu El Comercio, nel que trabayó venti año como redactor nes secciones de local, sucesos, cultura y deportes.

Read Full Post »

El Campionatu d’España de duatlón preséntase n’asturianu

Cásique un millar de competidores de tol país van alcontrase nel Campionatu d’España de Duatlón 2010, que se va disputar en Xixón los díes 17 y 18 d’abril. Un alcuentru deportivu nel que l’asturianu tien un sitiu propiu na información y na propaganda de la convocatoria, fecha en castellanu y n’asturianu.

Read Full Post »